Не смееме да се спуштиме на уличарско ниво, вели претседателот Стево Пендаровски негирајќи дека ја заострил реториката во комуникацијата со Бугарија по кочницата за почнување на преговорите со ЕУ. Пендаровски смета дека неговиот став оти Бугарија не може да обвинува за непочитување на договорот за пријателство и во исто време да додава нови барања не е обид да се покажеме како поголеми патриоти од соседите.

„Јас не мислам дека ја заострувам реториката воопшто. Јас во тоа интервју само кажувам дека последните бугарски барања не се содржани во договорот за добрососедство. Може да ги земете сите мои интервјуа наназад, пет-шест месеци, дури и една година, не постои заострување на реториката или обид сега да се покажеме како поголеми патриоти. Мојот став е дека ние не смееме да се спуштаме на уличарско ниво во разговорите со Бугарија, со Германија, во разговорите со кого било. Ние во овој момент имаме доверба од граѓаните да ја водиме оваа држава. И не само во овој спор, ние мора да прикажеме географски дека сме европска држава, во која има демократска власт, која владее на демократски начин и се изразува на европски начин. Не само во овој момент, ниту еден момент не е добар со лажен патриотизам да правите политички рејтинг“, рече Пендаровски.

Премиерот Зоран Заев вели дека ако седне на маса со Мицкоски, може да се извлечат само мотивации за нови кавги меѓу Македонија и Бугарија.

Тој додаде: „Ако сакаме да се скараме со Бугарија, не ми треба Мицкоски, тоа можам и сам да го направам. Целта е градење пријателство“.

„Продолжуваме со пријателска реторика. Реторика на дијалог, а не реторика на создавање конфликти. Ние со Бугарија имаме комуникација на сите нивоа. Секако, доминантно комуникацијата е меѓу двајцата министри за надворешни работи. Работат работни групи и негуваме надеж да направиме сè, додека е тоа возможно, до почетокот на декември, односно одржување на првата меѓувладина конференција. Ние сме пријатели со Бугарија. Колку и да е тешко и болно ова што го чувствуваме како неправда, сепак треба да изнајдеме европско решение преку дијалог, инвентивност, разговор, разбирајќи се меѓу себе за сопствените позиции. Само преку такви начини тоа ќе го направиме. Испраќам порака за наратив што ќе нè држи пријатели со соседите“, рече Заев.

Договорот за добрососедство не создава правна основа за блокирање, рече Пендаровски.