Македонија
Пендаровски: Условите на Бугарија не беа очекувани, ЕУ не смее да дозволи блокада поради историски прашања
Претседателот Стево Пендаровски смета дека недозволиво е да се блокираат преговорите на Македонија за влез во ЕУ поради историски прашања. Тој упати јавна порака до Унијата дека не смее да се проблематизира влезот на која било земја ако тоа нема поврзаност со реалните вредности и принципи. Пендаровски посочи дека граѓаните со право се прашуваат како да бидат сигурни дека во иднина нема на друга земја членка да ѝ текне да ја блокира Македонија со ново барање.
„Морам да бидам искрен дека условите што последните две години ги поставува Бугарија не можеше никој да ги предвиди дека ќе бидат поставувани. Бидејќи комплетен консензус, во кој учествуваше и бугарската влада во 2017, 2018, 2019 година, кога додаваме Северна кон Македонија, имаше општ консензус дека нови барања нема да има. Со право и граѓаните прашуваат од каде овие барања се додаваат. И сега логично прашање е дали, ако сега ги направиме овие уставни промени, утре-задутре некоја друга земја членка или истата што нè блокира 2,5 години, нема да ѝ текне да постави ново барање? Јас се надевам дека нема да се случуваат такви работи“, рече Пендаровски.
Упати и јавни пораки до Европската Унија.
„Кредибилитетот на ЕУ како организација, која со децении е сметана за шампион за промоција на човекови права и демократија, беше драстично нарушен, со тоа што РСМ сè уште чека во предворјето соочувајќи се нови барања. ЕУ самата внатре не смее да дозволи која било членка да поставува прашања или да проблематизира нечиј влез кој нема врска со реалните критериуми, вредности и принципи поради кои е формирана и поради кои постои. Да блокирате држава поради историски прашања – е недозволено и не би требало да биде дозволено во модерна Европа“, посочи Пендаровски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Отфрлени се тужбите на „Европскиот фронт“ од Уставниот суд, ќе има прегласување
До доцна во ноќта Уставниот суд расправаше по тужбите на одлуките на Државната изборна комисија – ДИК за неколку избирачки места поднесени од коалицијата „Европски фронт“. Од судот соопштија за шест одлуки според кои тужбите се отфрлени како неосновани, а тоа значи, согласно одлуките на ДИК, дека ќе има прегласување на конкретни избирачки места.
„Европскиот фронт“ имаше поднесено седум тужби на одлуките на ДИК, а Управниот суд беше ограничен со роковите за нивно решавање.
Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица.
Според Изборниот законик, доколку одлуката за прегласување на едно избирачко место може да влијае на конечните резулатите од изборите, ДИК ќе организира повторно гласање 14 дена од одржувањето на изборите, односно на 22 мај.
Македонија
Фирма од Чаир монтира небезбедно панорамско тркало во Карпош, обвини Град Скопје
Град Скопје информира дека правното лице Дизниленд реквизити, фирма од Чаир регистрирана пред само еден месец, без соодветни документи и дозволи, без потребна документација која гарантира безбедност, монтира панорамско тркало и останати реквизити во Карпош пред Борис Трајковски.
„Град Скопје, во рамки на своите надлежности изврши надзор, превзема мерки и го казни правното лице, но тој сепак насилно продожува да работи. Ги повикуваме надлежните институции и апелирам да постапат во најкус можен рок, бидејќи се доведува во прашање безбедноста на децата и на сите останати посетители поради практицирањето на ваквото самоволие“, велат од таму.
Македонија
Вработен во МВР фатен со мито од 12.500 евра
Вработен во Министерството за внатрешни работи е фатен со мито од 12.500 евра, соопшти министерот Панче Тошковски. Како што вели тој, лицето И.М. било вработено како виш аналитичар во СВР Скопје. Осомничениот е лишен од слобода под сомневање за сторени кривични дела измама предвидени по чл. 247 од КЗ.
„Од страна на Одделот за внатрешна контрола, криминалистички истраги и професионални стандарди во координација со Одделот за криминалистичка полиција се постапуваше по пријава од три оштетени лица и на ден 17.05.2024 година наведеното лице е фатено на лице место во моментот на примопредавање на 12.500 евра, претходно криминалистички обработени кои ги прибавила за наводно посредување за добивање на социјални станови од Б категорија. Во врска со кривичното дело извршен е претрес во службените простории кои ги користела пријавената при што е пронајдена пообемна сомнителна документација која е поврзана со кривичното дело во вид на разни документи за кои постои сомневање дека се фалсификувани, разни договори за позајмици, договори за посредување за доделување на социјални станови, имотни листови, како и тефтер со ракопис во кој е водена евиденција за лица за кои биле вршени определени работи“, соопшти Тошковски.
При извршен претрес во дом и други простории кои ги користи лицето И.М. лоцирани во Општина Сарај, беше пронајдено и огнено оружје со шест парчиња муниција кое оружје и муниција најверојатно ги поседува без дозвола, за што известено е и Одделението за недозволена трговија со оружје при СВР Скопје заради преземање на дополнителни мерки.
Министерот додава дека МВР и понатаму продолжува со преземање на мерки и активности насочени кон испитување на евентуална поврзаност на наведеното лице со други високи полициски службеници.