Македонија
Пенов: Ќе ги зајакнеме капацитетите на општините

Министерството за локална самоуправа заедно со Бирото за регионален развој обезбеди поддршка од УНДП и од Шведската агенција за развојна соработка за поддршка на општините за изработка на проектна документација. Општините, особено помалите, кои имаат ограничени човечки и финансиски ресурси, тешко се снаоѓаат со подготовка на поголеми инфраструктурни проекти, кои бараат обемна техничка документација во согласност со стандардите на големите финансиски институции, како што се ЕУ, Светската банка и други, рече министерот за локална самоуправа, Ристо Пенов.
Вкупната вредност на проектот „Јакнење на општинските капацитети за имплементација на проекти“ е 2,6 милиона долари, од кои 1,8 милион долари се обезбедени од страна на Шведската меѓународна агенција за развојна соработка (СИДА), 500.000 долари од страна на Бирото за регионален развој, а кофинасирањето од речиси 240.000 долари се очекува да биде обезбедено од страна на општините. За техничкиот фонд за изработка на проектната документација наменети се 1,5 милион долари.
„Постојат многу извори на средства за финансирање проекти, но потребно е да се има добар, комплетен и конкурентен проект. Досегашното искуство покажува дека отсуствува квалитетна понуда на проекти од страна на општините, дури и кога имаме обезбедено средства. Во процесот на интегрирање во Европската Унија, покрај усогласување на законодавството, треба да покажеме и капацитет за имплементирање на фондовите на Европската Унија во согласност со нивните правила“, појасни Пенов.
Првиот повик за општините и за центрите за развој се очекува веќе во април.
„Важно е проектите да ги следат глобалните развојни трендови и да се вклопат во глобалната агенда за одржлив, зелен и инклузивен развој за да бидат препознаени и високо рангирани од финансиските институции. Поддршката ја имаат, се надевам дека општините паметно ќе ја искористат за да може процесот да се затвори до крај, до целосна реализација на проектите што ќе бидат понудени од нивна страна“, рече министерот за локална самоуправа, Ристо Пенов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Целосно изгаснат пожарот во општина Желино кој се прошири кон месноста Карпалак

Пожарот кој вчера изби на територијата на општина Желино во атарот на село Церово, а подоцна во вечерните часови се прошири во насока на месноста Карпалак покрај автопатот Скопје – Тетово, е целосно изгаснат, извести директорот на ДЗС, Стојанче Ангелов.
Врз него од тетовската страна дејствуваше ТППЕ Тетово, а од скопската страна БППЗ Скопје.
Ангелов упати голема благодарност до тетовските и скопските пожарникари кои во ноќни услови успеаја да го изгаснат овој голем пожар кој во делови се одвиваше на тешко пристапен терен.
Во текот на вчерашниот ден целосно се изгаснати 29 пожари на отворен простор. Во овој момент 4-те активни пожари на отворен простор се под целосна или делумна контрола, додаваат од ДЗС.
Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.