Македонија
Перински во Врање за ИПА 3: Имаме можност да го продолжиме развојот на прекуграничниот регион и да овозможиме поквалитетен живот

Министерот за локална самоуправа, Златко Перински, денеска во Врање, Србија, заедно со министерката за Европски интеграции на Република Србија, Тања Мишчевиќ и шефот на Европската делегација во Република Србија, Емануеле Жиофре, го објавија Првиот повик за поднесување на предлог проекти во рамки на ИПА 3 прекуграничната пограма Србија – Македонија 2021-2027. Заинтересираните субјекти ќе можат да аплицираат до 22.октомври и во оваа фаза предвиден е буџет од 5.400.000 евра. За потребите на заинтересираните апликанти и оние кои ќе имаат потреба од логистичка поддршка и помош за пронаоѓање партнери, функционира заеднички технички секретаријат со канцеларија во Лесковац и Куманово.
„Дозволете ми да ги повикам сите заинтересирани страни, кои сакаат да се јават на овој јавен повик, да ја искористат можноста да аплицираат на повикот кој ќе трае до 22.октомври, а за кој е обезбеден буџет од 5.400.000 евра. Како и досегашните програми ИПА 1 и ИПА 2, очекуваме и оваа ИПА 3, да биде навистина успешна, да придонесе во соработката помеѓу двете држави, да го подобри капацитетот на пограничните региони и овозможи подобар и поуспешен и поквалитетен живот на граѓаните од овие области, што практично во основа е и основна цел на оваа програма“, изјави Перински, кој верува дека проектите од оваа програма ќе го унапредат и квалитетот на живот на граѓаните, но и ќе ја продлабочат соработката помеѓу пограничните региони.
Изборот на проекти кои ќе се финансираат, како што напомена Мишчевиќ, ќе го врши соодветна комисија.
„Ниту министерот Перински, ниту јас, немаме никаква улога во одлучувањето. За изборот на проектите ќе одлучува соодветна стручна комисија, која прави проценка на проектите, во однос на исполнување на критериумите и слично. Може да бидеме горди од досега спроведената ИПА 2, при што стапката на искористеност е 94 отсто од вториот, односно 98 отсто на реализираност од првиот повик“, истакна Мишчевиќ.
Задоволство од досега реалзиираните програми, изрази и шефот на Европската делегација во Република Србија, Жиофре, кој посочи дека од исклучителна важност се добрососедските односи и соработка помеѓу земјите.
„Меѓудругото, преку реализацијата на оваа програма, таа ќе помогне на локалните заедници во решавање на социјалните проблеми со кои се соочуваат ранливите категории на лица, а друга важна компонента на оваа програма е подобрување на туристичката инфраструктура.
Сметам дека овие клучни програми ќе овозможат економски развој и раст во пограничниот регион“, додаде Жиофре, кој посочи дека Европската Унија донира 5.400.000 евра за оваа фаза од ИПА 3.
Посетата на Врање, Перински ја искористи и за работна средба со градоначалникот на Град Врање, Слободан Миленковиќ, а посети и неколку локации кои веќе имплементираа проекти од ИПА 2 програмата. Заедно со министерката Мишчевиќ ги посетија Секторот за вонреди ситуации при Министерството за внатрешни работи во Врање и јавните претпријатија „Комрад“ и „Водовод“.
Благодарение на проектот „Заеднички интервенции во вонредни ситуации во пограничниот регион Србија и Бугарија“, зајакнати се капацитетите на единиците во Врање и Лесковац, кои сега со набавена опрема имаат можност да реализираат навремена координирана акција помеѓу земјите во регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наскоро зонско паркирање во Автокоманда

Во скопската населба Автокоманда наскоро ќе биде воведено зонско паркирање, најави кандидатот за градоначалник на Општина Гази Баба, Бобан Стефковски.
„ Со особено задоволство ги информирам жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање – решение кое жителите на Автокоманда го очекуваат повеќе од една деценија“, рече Стефковски.
Тој додава дека во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок.
Стефковски најави дека секое домаќинство ќе добие две бесплатни картички за паркирање.
Македонија
Уапсена сопругата на докторот кој беше застрелан во Куманово, била вмешана во обидот за неговото убиство

Полицијата ја уапси сопругата на докторот кој беше застрелан вчера во Куманово. Тој со повреди беше пренесен во болница, но се наоѓа во стабилна состојба. Според информациите на МВР, сопругата е осомничена дека е вмешана во обидот за неговото убиство.
„Вчера полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско“, велат од МВР.
Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес.
По целосно документирање на случајот, против сопругата ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава.
Од Министерството за здравство вчера соопштија дека во вооружениот напад во Куманово е повреден докторот Зекирија Шаини. Од таму известија дека повредите не се животно-загрозувачки и дека докторот е во стабилна состојба и се опоравува.
Од ДУИ, пак, информираа дека станува збор за нивен кандидат и носител на листата во Општина Липково.
Македонија
Евакуации во објектите околу плоштадот „ВМРО“ поради куфер оставен на плочникот, полицијата утврди дека е празен

Обезбедувањето на Јавното претпријатие за државни патишта пријавило во полиција дека две лица денес оставиле куфер на плочникот пред нивниот објект сместен на плоштадот „ВМРО“ веднаш до седиштето на владејачката партија ВМРО-ДПМНЕ. Полицијата веднаш излегла на терен, почнала евакуација на вработените од објектите околу плоштадот, а проверките покажале дека куферот е празен.
„Денеска (08.10.2025) во 12.55 часот лице од обезбедувањето на ЈП ‘Државни патишта’ пријавило дека на видеонадзор пред канцелариите на ЈП ‘Државни патишта’ на плоштадот ‘ВМРО’ во Скопје биле забележани две лица како го разгледуваат местото, а едно од лицата оставило куфер. Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен“, соопшти МВР.