Македонија
Перински во Радовиш: Инвестираме во објект што ќе ги обедини културата и традицијата

Министерството за локална самоуправа продолжува со теренските посети на општините „Каде што срцето е дома“. Денеска, министерот Златко Перински, заедно со претседателот на Владата, Христијан Мицкоски, министерот за култура и туризам, Зоран Љутков и заменикот за локална самоуправа, Ерџан Селими, беа во Општина Радовиш каде започна обновата и адаптацијата на старата Стоковна куќа во мултифункционален културен центар. Овој проект, ќе се реализира фазно, а првата фаза ќе се изведе со средства од државниот буџет одобрени на првиот јавен повик за поддршка на инфраструктурни општински проекти. Општина Радовиш веќе поднесе апликативен формулар за втората фаза на проектот, која би требало да биде реализирана со средства од вториот јавен повик.
Владините претставници заедно со градоначалникот Ацо Ристов ја посетија старата Стоковна куќа, каде теренот веќе е подготвен за предвидените градежни работи. Градоначалникот Ристов истакна дека овој објект за радовишани ќе значи многу, во него ќе се одвиваат сите настани од културата, образованието, ќе има содржини за едукација.
„Радовиш немаше ваков центар во кој граѓаните ќе можат да ги остваруваат своите потреби во делот на едукација, образование, култура, информации и многу други содржини кои ќе ги имаа во објектот, а кој ќе биде наменет за сите од 6 до 66, па и понатаму. Објектот ќе биде самоодржлив, затоа што ќе има такви содржини кои ќе го овозможат тоа“, изјави градоначалник Ристов кој изрази благодарност до Владата за дадената поддршка во реализација на проектот.
Министерот Перински изрази благодарност за проактивноста на градоначалникот и неговиот тим за подготовка на проектната документација и изрази надеж дека со исто, но и засилено темпо ќе продолжат во таа насока, а Владата ќе продолжи со поддршката за сите локални самоуправи.
„Денеска сме во Радовиш да го одбележиме отпочнувањето на градежните активности за реконструкција на старата Стоковна куќа, објект кој повеќе од 30 години беше симбол на еден транзициски и тежок период за целата држава. Согласно средствата кои самата Општина ги доби од првиот јавен повик за првата фаза и се надевам од вториот јавен повик за втората фаза, општина Радовиш ќе добие еден репрезентативен и прекрасен објект во срцето на самата општина на општо задоволство на сите граѓани“, истакна Перински.
Изградбата на објектот, според министерот за култура и туризам, Зоран Љутков, значително ќе придонесе и за развој на туризмот.
„Како Влада многу инвестираме во Радовиш и ќе продолжиме да инвестираме, продолжуваме да градиме, затоа што тоа е она коешто претставува наша инспирација и заедничка цел. Македонија мора да се гради. Јас знам дека граѓаните имаат лоши спомени од минатото, чувствуваат гнев, затоа што наместо да се гради, Македонија се крадеше. Но, сега имаме поинаква Влада, со поинаква амбиција и во таа насока продолжуваме да функционираме“, порача премиерот Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова ќе учествува на Состанокот на лидерите на земјите учеснички од Процесот „Брдо-Бриони“

Претседателката Гордана Сиљановска-Давкова од денеска престојува во работна посета на Драч, Република Албанија, заради учество на Состанокот на лидерите на земјите учеснички од Процесот „Брдо-Бриони“.
Во фокусот на годинашниот состанок ќе бидат неколку теми: Европската интеграција, Планот за раст на ЕУ, младинската политика и одливот на мозоци (brain drain), како и регионалната соработка и безбедност.
Главната цел на процесот е интеграција на сите земји од регионот во Европската Унија, како и стабилизирање на состојбите на Западен Балкан преку јакнење на регионалната соработка. Лидерите на земјите учеснички од Процесот „Брдо-Бриони“ се состануваат најмалку еднаш годишно.
Процесот „Брдо-Бриони“ е заедничка иницијатива на претседателите на Република Словенија и на Република Хрватска. Првиот состанок на лидерите се одржа во 2013 година, во Брдо кај Крањ.
Македонија
(Видео) Петрушевски: Заев своевремено зема куферче од Бојко, што зема сега Филипче за да ги продава националните интереси?

„Заев своевремено зема куферче од Бојко, што зема сега Филипче за да ги продава националните интереси?“, праша денеска на прес-конференција, Бране Петрушевски, пратеник на ВМРО-ДПМНЕ.
„Бојко Борисов своевремено сам кажа дека лично ја помогнал опцијата на Зоран Заев за доаѓање на власт. Од тогаш до сега во СДС ништо не е сменето, тоа што функционирало со Заев, функционира и со Филипче, затоа што првиот е ментор на вториот. Ако тоа го направиле еднаш и знаеме како заврши, тогаш што сега ќе добие СДС за бонбона бизнисот со Бугарија? Таканаречената Резолуција која ја брендираа со таканаречени црвени линии не се ништо друго, туку Тројански коњ за измама на народот. Но едно забораваат, народот нема да падне на нивните лаги, ниту можат повеќе да го лажат. Граѓаните видоа што се вистинските намери на СДС и затоа жестоко ќе ги казнат на овие избори“, истакна Петрушевски.
Македонија
Мециновиќ: Енегријата е очигледна, одиме во втор круг

„Енергијата е очигледна. Луѓе, одиме во втор круг! Таму ќе разговараме за многу нешта затоа што во првиот круг противкандидатите ќе бегаат од дебати. Но, во втор круг нема каде да избегаат и ќе се сретнеме конечно. Ние во мандатот ќе се залагаме за градскиот превоз, за загадувањето на градот, за зајакнување на претпријатијата и преку тоа создавање на функционални јавни претпријатија кои сите услуги ќе ги даваат на задоволително ниво. Утре продолжуваме понатаму, по улиците, онаму каде што патот ќе нè однесе. На улиците ги промовираме нашите спотови кои се цензурирани. Ова движење не е запрено, тоа станува сè поголемо од ден на ден,“ изјави Амар Мециновиќ, пратеник и кандидат за градоначалник на Скопје од редовите на Левица.
Мециновиќ заедно со кандидатот за градоначалник на Аеродром, Марјан Димитриев и советниците за Град Скопје и Општина Аеродром одржаа средба со граѓаните.
„На терен сме, лице в лице со народот – ја слушаме секоја мака и секој предлог. Нашата сила е токму во народот, а нашата визија е чиста, праведна и современа општина и град по мерка на жителите,“ порачаа од партијата.
Димитриев, кој во Аеродром влегува со амбициозна програма, пред граѓаните потенцираше:
„Денес сме тука да ја претставиме нашата програма. Дел од приоритетите се чиста и здрава општина, да ставиме крај на загадувањето и конечно да го решиме паркинг просторот. Аеродромци се спремни за победа, така што морам да кажам – доаѓа нашето време.“
Од Левица нагласуваат дека нивната цел е да го вратат Скопје и Аеродром во рацете на народот – преку транспарентно и одговорно управување во интерес на сите граѓани.