Македонија
Петковски: Само што седна Џафери во фотелја, Ахмети фати џаде за Приштина, заедно со Курти да кова план за претседател на Македонија
Техничкиот премиер ми личи на техничка грешка во кошарката, но останува нејасно кој ја направи техничката СДСМ или ДУИ, пишува на социјалните мрежи поранешниот собраниски спикер Тито Петковски околу изборот на техничкиот премиер.
„Техничка влада!
Ми се допадна споредбата што еден познат колумнист ја направи техничката влада со техничката вода. Техничката вода луѓето не ја пијат, но со неа многу валканици можат да се измијат.
Техничкиот пак премиер, ми личи на техничка грешка во кошарката.
Тимот оштетен со техничката грешка има право на слободни фрлања и топка од страна, за нов напад.
Останува нејасно, кој ја направи техничката, СДСМ или ДУИ?
По оној триумфализам, егзалтација и гламурозно прославување што го организира ДУИ во чест на техничкиот премиер, се чини дека техничката грешка е свирена на СДСМ. ДУИ продолжи да игра уште поагресивно. Само што седна техничкиот премиер во техничката фотеља, истиот ден, Али Ахмети и останатите лидери на партиите од албанскиот политички кампус, фатија џаде за Приштина. Отидоа по совет кај Албин Курти, таткото на сите Албанци од Македонија и Косово, како да играат понатаму.
Многу мала им се виде победата со техничкиот премиер, па сега, заедно со Курти, коваат план за претседател на Македонија. Сите, освен Ахмети, сметале дека сега му е мајката да се влезе во игра за претседател. Ахмети, како најискусен играч, малку го разочарал целиот тим во Приштина, советувајќи ги да не се истрчуваат туку така, бидејќи се уште е рано за голема победа. За да се добие
натпреварот, треба да се игра тактички, мудро, стрпливо и со долготрајни напади, мудрувал Али“, додава во напишаното Петковски.
Сепак, како што вели, конечниот победник од овој маратонски натпревар ќе го дознаеме на денот на изборите.
„Само во едно сум сигурен, граѓаните или народот, како што велат денешните политичари, веќе се исфрлени од игра“, пишува Петковски на социјалните мрежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Битиќи: ВМРО-ДПМНЕ ги потврди добрите политики на СДСМ кои доведоа до намалување на маржата на цената на струјата
„Новата Влада на ВМРО-ДПМЕ уште еднаш ги потврди добрите политики на владата предводена од СДСМ, а тоа е во насока на заштита на интересите на граѓаните“, рече пратеникот од СДСМ Фатмир Битиќи, образложувајќи го ставот на пратеничката група на СДСМ за поддршка на Предлог на закон за дополнување на Законот за енергетика, кој по скратена постапка беше денес усвоен во Собранието.
Битиќи нагласи дека измените кои денеска се предлагаат се последица на успешната тендерска постапка за избор на Универзален снабдувач, која заврши пред неполн месец дена, а на која што беше избрана ЕВН Хоме.
„Тоа што е ново е дека постигнавме да ја намалиме маржата која универзалниот снабдувач ја аплицира кон крајните корисници од 11,5% на 9,9%. Ова е една од најниските маржи досега аплицирани кон крајните корисници и сметаме дека ова е нешто на кое сите треба да се гордееме“, рече Битиќи.
Образложувајќи го ставот на пратеничката група на СДСМ, Битиќи појасни дека со овие законски измени се овозможува аплицирањето на намалената маржа кон крајните корисници да стапи на сила веднаш, пред Регулаторната комисија за енергетика (РКЕ) да ја донесе одлуката за цената на струјата од 1 јули до крајот на годината.
Зборувајќи за законските измени, Битиќи образложи дека една од причините за поддршка од пратеничката група на СДСМ е тоа што со истите се предвидува производителот на електрична енергија со најголем инсталиран капацитет на Универзалниот снабдувач да му понуди на продажна во 2024 година 40% од вкупните годишни потреби на снабдувачот.
„Тоа значи дека ЕСМ, која што се пријавила пред само 10 дена, а слушавме помпезно како тоа само 85% ќе понуди, нуди двојно повеќе од тоа што укажува Законот дека треба да го понуди. Нуди по цена која е 60% субвенционирана, пониска цена од производната цена“, рече Битиќи.
Пратеникот Битиќи во своето обраќање потенцираше дека ова е начинот на кој една разумна и конструктивна опозиција треба да се однесува во Собранието, а тоа е да се поддржуваат сите законски решенија кои имаат за цел поддршка на граѓаните и квалитетот на нивниот живот.
„Вака СДСМ и коалицијата ќе продолжи да се однесува и наредните четири години секогаш кога е во прашање интересот на граѓаните“, порача Битиќи.
Македонија
Петровска: СДСМ е државотворна партија и повторно ќе се врати на победничките патеки
Кандидатката за претседател на СДСМ, Славјанка Петровска денеска пред членовите од Велес ги претстави клучните приоритети од нејзината програма „Манифест за социјалдемократијата“.
„СДСМ е државотворна партија и повторно ќе се врати на победничките патеки онаму каде што припаѓа. Тоа ќе го постигнеме само ако сме обединети и ако постојано го слушаме нашето членство. Тоа, јас како иден претседател, се обврзувам да го правам, да ги слушам членовите кои како што го избираат претседателот на партијата, така ќе ги избираат и претседателите на општинските организации, но и идните пратеници, советници, градоначалници“, посочи Петровска и дополни:
„Заедно ќе успееме, заедно ќе го вратиме СДСМ на кормилото на државата“.
Македонија
Собранието го донесе Законот за енергетика со кој ќе се спречи поскапување на струјата
Со 84 гласа ЗА, и ниту еден против и воздржан, Собранието го донесе Законот за дополнување на Законот за енергетика што го најави ВМРО-ДПМНЕ, за да се спречи зголемување на цената на струјата.
Пратениците на СДСМ претходно најавија дека ќе го поддржат законот, посочувајќи дека тој е продолжение на добрите политики на минатата влада.
Од Левица реагираа за овој Закон, но на крајот немаше гласови против.
Претседателот на Комисија за економски прашања, труд и енергетска политика, Бојан Стојаноски од ВМРО-ДПМНЕ, кој е и еден од предлагачите на законското решение, посочи дека измените се многу суштински, но се прилично едноставни, поради што законот е поднесен по скратена постапка.