Четириесетина минути траеше увидот во доказите за предметот „Моќник”, кој осомничениот пратеник Антонијо Милошоски го направи со адвокатот Димитар Дангов. Милошоски по увидот тврдеше дека 15 пратеници од опозицијата биле на распит во СЈО по референдумот.

„По неуспешниот референдум, приближно 15 пратеници, мои колеги, вклучително и јас, сме повикани од страна на СЈО”, рече Милошоски.

„Сметам дека со тоа се покажува дека обвинителството има своја политичка намена, односно сите овие случаи, постапки и распити имаат за цел да принудат дел од пратениците да гласаат против волјата на народот, односно за измена на уставот на РМ”, рече пратеникот.

Истрагата не ја коментираше.

„Предметите не би ги коментирал во подробности. Би кажал дека истите се неосновани и самиот тајминг на покренувањето на предметите по пропаднатиот референдум навестува дека СЈО има селективна правда и е политичка институција, која сака да изврши притисок врз поголем дел од пратениците на опозицијата”, рече Милошоски.

Не одговори на прашањето на „Макфакс” дали се чувствувал како моќник. Неофицијално, Милошоски следната недела треба повторно да се јави во СЈО на распит за истата истрага.

СЈО во 2017 година отвори истрага наречена „Моќник“, за пратеникот на ВМРО-ДПМНЕ Антонијо Милошоски за незаконска продажба на објект во Македонски Брод на неговиот татко. Истрагата се води против 13 лица, поради сомневање дека му нанеле штета на државниот буџет од околу 50 000 евра.

Покрај пратеникот, осомничени се и неговиот татко и тогашниот градоначалник на општината Македонски Брод. Истрагата на СЈО за „Моќник“ во еден дел е за нарачаната лустрација кај тогашниот состав на Лустрациската комисија предводена од Томе Аџиев на кичевскиот судија Драган Билески. Комисијата ја поништи одлуката од 2010 година за судијата Билески и донесе нова одлука дека тој бил кодош.

Прислушуваните разговори што се водат помеѓу Томе Аџиев, претседател на Лустрациска, и пратеникот Антонио Милошоски откриваат договор за лустрирање на Драган Билески, судија од Основниот суд во Кичево. Постапката ја иницирал Антонио Милошоски, кој го известил Аџиев дека ќе најдат некое лице, како трето лице заинтересирано, што ќе поднесе барање, а Аџиев ветува дека ќе го средат судијата.