Министерката за одбрана, Славјанка Петровска, во рамките на самитот на НАТО, кој се одржува во Мадрид, беше дел од панел-дискусијата: „Придонесот на НАТО за безбедноста и стабилноста во неговото соседството“ и на оваа тема дебатира заедно со министрите за одбрана на Португалија и Бугарија, Хелена Кареирас и Драгомир Заков, и претседавачот на Воениот комитет на НАТО, адмирал Роб Бауер.

Петровска во своето обраќање нагласи дека овој самит на НАТО е одлична можност да се испрати порака за единство на демократските земји во одбрана на демократијата и нејзините вредности и да се брани меѓународниот поредок врз основа на правила.

За време на панелот, Петровска дискутира за зајакнувањето на долгорочното одвраќање и одбрана на НАТО, а во ера на стратешки натпревар, истакна дека партнерството на НАТО и ЕУ е од суштинско значење за безбедноста и просперитетот на евро-атлантската област, при што политичкиот дијалог меѓу двете организации останува од суштинско значење за продлабочување на оваа соработка.

Осврнувајќи се на значењето на регионот на Западен Балкан, Петровска потенцира дека овој регион е важен дел за европската безбедносна архитектура, како и дека на стабилноста не смее да се гледа како на еднаш засекогаш воспоставен факт.

Додаде дека земјите од Западен Балкан се соочуваат со сè поголемите надворешни влијанија, како што се хибридните закани, сајбер-нападите, информациските манипулативни кампањи, кои придонесуваат за подгревање на национализмот.

„Западен Балкан е многу важен дел за европската безбедност и затоа потребно е НАТО заедно со ЕУ и другите партнери да продолжиме на зајакнување на одбранбените системи, да ги вложиме сите напори за забрзување на реформите и да се изнајдат иновативни решенија за надминување на отворените прашања за целосна евро-атлантска интеграција на регионот. Сега повеќе од кога било евро-атлантската и ЕУ-интеграцијата на регионот потребно е да се гледаат како алатка за подобрување на безбедноста, а со самата интеграција директно ќе се придонесе и кон спречување надворешни хибридни влијанија“, потенцира Петровска.