Утрово, во Брисел, министерката за одбрана, Славјанка Петровска, се сретна со претседавачот на Воениот комитет на Европската Унија, генералот Роберт Бриегер, со кого разговараше за придонесот на Северна Македонија кон регионалната и глобалната безбедност и за интензивирањето на одбранбената соработка помеѓу нашата држава и Европската Унија.

„Навистина можеме да се гордееме на постигнатото. Од увозник на безбедноста, Северна Македонија се позиционира како столб на регионалната безбедност и стабилност. Потврда за тоа е нашето учество во операцијата на ЕУ во Босна и Херцеговина, АЛТЕА, од 2006 година, како и нашето учество во борбените групи на Унијата“, рече министерката на состанокот. Информира дека досега 363 армиски припадници биле дел од АЛТЕА, а во мисијата на ЕУ во Централноафриканската Република учествувале 6 армиски офицери.

Петровска изрази задоволство од силниот интензитет на одбранбената соработка помеѓу земјата и Европската Унија и се заблагодари за европската поддршка на процесот на модернизација и опремување на Армијата со девет милиони евра обезбедени преку Европскиот мировен фонд.

„Фактот дека Европскиот мировен фонд покажа интерес да ги поддржи опремувањето и модернизацијата на Армијата со 9 милиони евра укажува на тоа дека интересот за уште поблиски односи помеѓу Северна Македонија и Унијата е голем. Нашата земја го почна пристапниот процес, нашето општество е базирано на современи европски вредности и ние ѝ припаѓаме на Европа“, заклучи министерката.

Генералот Бриегер изрази задоволство што и двете страни се амбициозни во намерата да ја зацврстат одбранбената соработка и се заблагодари за долгогодишното учество на припадниците на Армијата на Република Северна Македонија во мисии и операции на Унијата.