Македонија
Петровска: Целосно размонтирање на случајот за убиството пред „Мавровка“ – МВР криеше кои се убијците

Поранешната министерка за одбрана и актуелна пратеничка, Славјанка Петровска вели дека е потребно целосно размонтирање на убиството кое деновиве се случи кај „Мавровка“.
„Кога Мицковски зборува за политички глодари, треба да се потсети на неговите некрофилски изјави во минатото. А сега да потсетиме на фактите за осомничените за убиството кај Мавровка.
Убиството се случува на 20.08.2024 година, во сред бел ден, во центарот на Скопје. МВР соопштува дека еден осомничен е уапсен, се трага по вториот кој е во бегство. Имиња ниту пак иницијали нема.
Ова е крајно невообичаено затоа МВР секогаш соопштува имиња или барем иницијали на приведените.
Особено ако трага по опасен, вооружен криминалец, зарем не чувствуваа одговорност кон граѓаните да ги предупредат за лицето кое е вооружено и бега!?
На 21.08.2024, 24 часа по убиството при мој телевиски настап поставувам прашање: Зошто иницијалите на приведениот и оној по кој се трага се кријат?
Дали е тоа можеби затоа што двајцата се затвореници, кои се избегани од затвор и го сториле убиството?
Одговор од МВР нема.
После нов 24 часовен молк, и притисок од новинарите МВР срамежливо, но потврдно одговара на моето прашање.
Денес, Премиерот на хартија, зошто појма нема што му се случува во државата, на оваа тема вели: да, избегани се, ама во време на СДСМ.
Ајде вака Премиерче на хартија: на 28 јануари 2024 година, е избрана нова Влада, во која по предлог на ДПМНЕ, министер за внатрешни работи е Панче Тошковски, партиски адвокат и претседател на комисијата за правни прашања на ДПМНЕ( патем и пишувач на партискиот статут на ДПМНЕ во кој името на државата е избришано)
Истиот тој, тогаш и сегашен министер за внатрешни работи потпишува повеќе од 100тина решенија за распоредување на полициски службеници, меѓу кои и раководни лица согласно неговите убедувања. Па така началникот на СВР Скопје, кој да потсетам е задолжен за редот, мирот и безбедноста во градот Скопје е негов избор, не на СДСМ.
Е сега, кога има бегство од затвор, на сила стапува МВР, тие распишуваат потерница и имаат законска обврска за пронаоѓање на бегалецот.
Кој е министер за внатрешни работи? Панче Тошковски. Кој го предалага него? Мицковски и ДПМНЕ. Што не ти е јасно тука?
Одиме на вториот бегалец. Тој бега во месец јули, кога Министер за внатрешни е Панче Тошковски, а директор на Управата за извршување на санкции, Александар Пандов. Целата структура во МВР е променета по налог на Панче Тошковски.
Повеќе од 30 дена и овој затвореник е во бегство и МВР не го наоѓа.
Е сега имам нови прашања:
МВР знаеле уште од април, односно јули месец дека двајцата затвореници се во бегство. Но, исто така знаеле и за каков профил на криминалци станува збор. Имено, од нивните досиеа и претходни дела знаеле дека се опасни, секогаш вооружени, корисници на наркотични средства и често агресивни и насилни.
Знаејќи го ова, прашувам кои се оперативни активности биле превземени од денот на нивното бегство до кобниот ден на убиство на невин човек?
Колку пати биле проверени куќите и објектите за кои МВР од претходно имало оперативни сознанија дека тие ги користат. Дали биле применети посебно истражни мерки над нив и над членовите на нивните семејства?
И конечно, како способните началници на Панче и МВРО дозволија овие опасни криминалци во сред бел да дојдат во центарот на градот и да извршат убиство? “, пишува Петровска.
Колку за споредба, како што вели, во време на СДСМ еден од овие затвореници беше успешно вратен во затвор, без во меѓувреме да стори убиство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.
Македонија
Меџити: Бит Пазар е економска и културна гордост на Чаир

Првиот вицепремиер и министер за животна средина и просторно планирање, воедно и кандидат за градоначалник на Општина Чаир, Изет Меџити, денеска оствари средба со трговците на Бит Пазар.
Во разговорот со нив, Меџити истакна дека Општина Чаир, иако нема индустриска зона и големи компании, се издвојува со голем број на мали и средни бизниси, со Старата Чаршија и со Бит Пазар, кои претставуваат економски и културен столб на нашата општина.
Тој нагласи дека Бит Пазар одиграл и продолжува да игра значајна улога во економската благосостојба на семејствата од Чаир и пошироко. Исто така, Старата чаршија, заедно со Скопското Кале и Бит Пазар, треба да функционираат како комплетна туристичка понуда за домашните и странските посетители.
Меџити се обврза дека трговците ќе бидат заштитени од нелојална конкуренција и дека ќе имаат институционална поддршка за развој на нивната дејност.
„Роден и израснат во Чаир, чувствувам дека Бит Пазар е вредност игордост за секој скопјанец. Затоа, мојата заложба е и институционално да помогнеме и да го развиеме овој историски, економски и културен капитал,“ нагласи Меџити.
Македонија
Ѓорѓиевски : Љубљана ќе биде град-партнер за развојот на Скопје

Остваривме извонредна и пријателска средба со долгогодишниот градоначалник на Љубљана, господинот Зоран Јанковиќ, објави актуелниот градоначалник на Општина Кисела Вода и кандидат за градоначалник на Скопје, Орце Ѓорѓиевски.
Средбата, додава тој, поминала во пријателска атмосфера, при што биле разменети значајни искуства и визии за идната соработка помеѓу Скопје и Љубљана.
„Добив драгоцени совети и поддршка од градоначалникот Јанковиќ, со јасна определба Љубљана да биде град-партнер и вистински пример за развојот и модернизацијата на Скопје.
Посебен акцент ставивме на најголемите предизвици со кои се соочува нашиот град – јавниот превоз и чистотата.
Градоначалникот Јанковиќ ни даде ветување дека експертски тимови од Љубљана ќе бидат континуирана поддршка за Скопје, но не само во овие сфери, туку и во секоја област во која ќе побараме помош.
Договоривме интензивна соработка и зајакнување на капацитетите на градот Скопје во насока на креирање, планирање и спроведување европски проекти.
Верувам дека преку ова партнерство ќе изградиме поефикасен и поевропски град Скопје, достоен за своите граѓани.
Со задоволство го потврдивме статусот на побратимени градови и во таа насока упатив срдечна покана до господинот Јанковиќ за негова официјална посета на Скопје, град кој сака да учи од најдобрите“, вели Ѓорѓиевски.