Македонија
Петрушевски: Идната Влада на ВМРО-ДПМНЕ ќе работи на развој на индустриска зона во Куманово бидејќи е крстосница на Коридорот 8 и Коридорот 10

„Многу ветуваа овие двајца функционери од Куманово конкретно за Куманово и кумановци, меѓутоа бенефит освен тие двајца на високи плати, друг кумановец не виде од нив. за жал гледаме градот не само што стагнира туку и се уназадува, па дури и од овдека можеме да погледнеме одредени објекти кои што се ругло на градот, кои што апсолутно немаат намера барем да ги отстапат на Општината за да може да ги реконструира. Имаше последен таков случај со познатиот Пионерски дом, го знаат кумановци, посебно повозрасните. Шест години го раководи МТСП и шест години објектот пропаѓа. Тој објект го побараа од Општината да го добие, да го реконструира меѓутоа беше одбиено со образложение дека зградата ќе била наменета за свои потреби“, истакна Бране Петрушевски, пратеник од редовите на ВМРО-ДПМНЕ во воведниот дел на трибината на тема „Младински политики“ која е во рамки на акцијата „Ова е Македонија за сите“.
Петрушевски додаде дека не само што се гледа негрижата туку се гледа и осветата на Социјалдемократскиот сојуз кон кумановци затоа што првпат по 30 години не им ја дадоа власта во Куманово за да ја узурпираат Општината како што впрочем тоа го правеа изминатите 30 години.
„Од друга страна она што мора да се истакне, а е актуелно периодов тоа е нели онаа фамозна изградба на Коридорот 8. Меѓутоа делниците од Коридорот 8 кои што ќе се градат само Тетово, Гостивар, Букојчани, Требеништа, Струга, Ќафасан, јас морам од ова место, од оваа позиција пред сите Кумановци овдека да ги потсетам дека на Коридорот 8 лежи и Куманово. На Коридорот 8 лежи и Крива Паланка. И на Коридорот 8 завршува или почнува, зависи како гледаме од Деве Баир, така што мислам дека и жителите на овие градови заслужуваат автопатско решение како би можел тој Коридор 8 да биде комплетен“, појасни пратеникот.
Тој посочи дека од друга страна мора да ги потсети и граѓаните дека на времето ВМРО-ДПМНЕ имаше реконструкција на Коридорот 10 значи Куманово – Скопје автопатот до Миладиновци, меѓутоа изградба на нов автопат од Куманово до Табановце од Коридорот 10 кој што не беше автопатско решение. Тоа се дела кои што се гледаат.
„За жал иако споменавме дека нели Куманово е крстосница на Коридорот 8 и Коридорот 10 и геостратешки има многу поволна позиција за развој на стопанствата, на економијата и со тоа нови работни места, не се чувствува тоа апсолутно во градот. Она што фали во градот е една индустриска зона која што ќе ги провлече тие инвестиции странски и она што можам да го кажам е дека идната Влада на ВМРО-ДПМНЕ предводена од претседателот Христијан Мицкоски апсолутно ќе се ангажира во делот на развој на една таква зона и провлекување на странски инвестиции затоа што Куманово има таква геостратешка положба како крстосница на двата Коридора“, нагласи Петрушевски.
Тој истакна дека Куманово е заборавено од страна на власта. Граѓаните се разочарани од власта и бараат избори за да ја казната сегашната Влада.
„Театарот се реконструира не знам колку години само заради тоа што се неспособни, еден обичен тендер за реконструкција на театар не знаат да направат. И затоа кумановци се ускратени долг период да немаат театарска претстава. Домот на културата не ја презеде таа функција, апсолутно лошо се менаџира. Од друга страна народот си го бара своето, а казната ќе им стигне на наредните избори кога ќе објаснат зошто немаме кино, зошто немаме театар и зошто немаме културен живот, и зошто младите се оставени сами на себе“, порача пратеникот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во Кочани се одржа седмиот марш на ангелите, родителите со порака: „Нашиот молк нема да трае долго“

„Моќта на луѓето е посилна од луѓето што се на моќ“, „Не чекајте катастрофа, дејствувајте сега“, „Ефективен притвор”, „Секој може да е следен”, „Системот убива”. Со вакви транспаренти денес во Кочани се одржа седмиот марш на ангелите.
На маршот, предводен од родителите на загинатите деца во пожарот „Пулс“ и денес, беше побарана правда.
Родителите чекореа во тишина, држејќи ги во рацете фотографиите на своите деца, придружени од граѓани кои им се приклучија за да ги поддржат.
„Нашиот глас е гласот на оние кои трагично заминаа во огнот, молк што зборува повеќе од илјада зборови. Но нашиот молк нема да трае долго како вашето судење”, беше порачано на протестот.
Претходно денес, Обвинителството соопшти дека обвинителите кои постапуваат во истрагата во врска со пожарот во кочанската дискотека „Пулс” почнуваат да сослушуваат претставници на семејствата на починатите. Од Обвинителството велат дека преку исказите дадени пред јавен обвинител тие ќе можат да си ги остварат своите права како оштетени и да се приклучат кон кривичниот прогон. Исто така, ќе можат и директно да се информираат за текот и фазата во која се наоѓа постапката, но и да кажат свои сознанија за настанот.
Македонија
Градоначалниците од СДСМ, Герасимовски и Христовски ќе бидат во трката за нов мандат

Претседателот на СДСМ, Венко Филипче, изјави дека партијата веќе работи на подготовките за претстојните локални избори, со јасни критериуми за избор на коалициски партнери и кандидати за градоначалници.
Тој информираше дека СДСМ веќе има потврдени коалициски партнери во рамки на постојната коалиција и дека се работи на консолидација на советничките листи.
„Веќе имаме потврдено коалициони партнери во рамки на веќе постојната коалиција за локалните избори работиме на консолидирање на советничките листи, и за двајца градоначалници сме веќе прилично сигурно дека ќе трчаат на локаните избори и тоа се сегашни актуелни градоначалници на општина Центар, Горан Герасимовски и на Крушево, Томе Христовски“, изјави претседателот на СДСМ.
Филипче истакна дека сè уште немал средба со Арбен Таравари, но дека е отворен за разговор.
„Доколку партнерот којшто го бараме за локалните избори, како политичка партија е партнер со којшто ќе изградиме прво однос на доверба, понатаму соработка којашто ќе значи остварување на програмата којашто ќе биде дадена на локалните избори и взаемно почитување на политичкиот субјект, тогаш тоа ќе биде начинот на којшто ние ќе ги идентификуваме нашите коалициони партнери“, истакна Филипче.
Македонија
Филипче сака на лидерска да се разговара за реформите и националните интереси, ќе предложи агенда в понеделник

Претседателот на СДСМ, Венко Филипче, најави дека в понеделник, на Националниот совет за евроинтеграции со кој претседава во Собранието, ќе предложи конкретна агенда составена од најважните точки поврзани со реформскиот пат и националните интереси, за кои најголемите политички партии треба да разговараат на лидерска средба.
„Јасни се пораките од ЕУ. Сите укажуваат дека патот по кој треба да се движиме е јасен. Додека чекаме и не правиме ништо, сè што се случува е само губење на време. Младите тоа го гледаат и го доживуваат како дополнителен стимул за побрзо иселување. Никој повеќе од младите генерации нема да ја гледа својата иднина во Македонија ако не направиме ништо за да го откочиме евроинтегративниот процес и заеднички да работиме на унапредување на многу сфери во нашата земја, што ќе го направи животот подобар и поквалитетен“, истакна Филипче, одговарајќи на новинарско прашање.
Филипче рече дека тој и Социјалдемократскиот сојуз често се иницијатори на заеднички средби и разговори за теми од национален интерес, за кои е потребен национален консензус.
„Многу пати иницираме и работа на конкретни теми. Инициравме заеднички средби за реформската агенда и за постигнување консензус околу тие прашања“, рече Филипче.
Сепак, и покрај конструктивниот пристап и учеството во работните групи за клучни закони – како што е Законот за енергетика – Филипче смета дека Владата во последен момент поднела амандмани спротивни на европските стандарди.
„За жал, добро започна работата со Законот за енергетика, но во последен момент Владата даде амандмани кои се целосно спротивни на вредностите што ги промовира Европската Унија. Со тие амандмани, во регулаторните тела ќе влегуваат лица кои претходно работеле во индустрии што биле под надлежност на истите регулаторни тела. Тоа не постои никаде во Европа“, оцени Филипче.
Претседателот на СДСМ очекува продолжување на работата на реформската агенда, особено во делот на правосудството. Тој нагласи дека експертите номинирани од СДСМ ги дале своите мислења за предложените закони, но досега не добиле никаков одговор. Сепак, тој повтори дека СДСМ останува подготвен да работи заеднички за доброто и напредокот на државата.