Македонија
Побарајте деблокирање на сметките блокирани од извршител пред 5 август 2013 година, Глигорова подели упатство

Активистката Ана Глигорова ги повикува сите граѓани, жртви на извршителите, да поднесат барања за деблокирање на сметките доколку поминале десет години од решението од извршител или, пак, корекција на каматата кај оние од понов датум. Иако има отпор кај некои извршители, кои бараа насоки за постапување, Глигорова вели дека измените на Законот за извршувањето се во сила и деблокадите може да се реализираат.
„Сите граѓани што добиле решение од извршител со датум пред 5 август 2013 година во овој момент веќе имаат законска можност да побараат деблокирање на сметките оти извршувањето е застарено. Оние, пак, што сѐ уште исплаќаат долгови на извршител, но од добивањето на решението не поминале десет години, може да побараат корекција на каматата. Таа не треба да го надмине износот на основниот долг. Кај многумина може веќе да е исплатен долгот и тие немаат никаква обврска, а кај другите значително ќе се намали сумата што треба да ја платат. Не може повеќе за казна од 1.000 денари да се плаќаат 10.000 денари. Со измените каматата не смее да надмине 1.000 денари“, вели Глигорова, активистка од здруженијата „Човекот над профитот“, „Но пасаран“ и „Стоп за грабежот“, за „Макфакс“.
Глигорова вели дека барањата за застарување и за корекција на каматата нема потреба да се поднесуваат преку адвокати. Доволно е граѓаните да ги следат нејзините упатства и сами да ги пополнат барањата.
„Нема потреба граѓаните што имаат едноставни случаи да се изложуваат на дополнителни трошоци за адвокати за да поднесат барања за заостреност. За им излезам во пресрет, на мојата фејсбук-страница објавив детаљно упатство за пополнување на барањето. Доволно е да внимаваат, да го следат и сами да го поднесат. Ние имаме околу 180.000 блокирани сметки. Од нив околу 50.000 се сигурно веќе застарени. Има луѓе што отплаќаат долгови од 1992 година, цели триесет години се под блокади“, објаснува активистката Глигорова.
„Макфакс“ побара бројка на блокирани сметки во моментот, а праша и колку од нив се блокирани од извршители, но од Народната банка на Македонија објаснија дека точна бројка не е достапна оти состојбата се менува.
„Вкупниот број на блокирани трансакциски сметки е високоменлива категорија ако се земе предвид дека, на пример, еден правен субјект може да блокира наеднаш повеќе трансакциски сметки, како и дека еден имател може да располага со повеќе трансакциски сметки. Народната банка го објавува вкупниот број на блокирани трансакциски сметки, кој е достапен со состојба на крајот на март 2023 година“, велат од Народната банка за „Макфакс“.
Според објавата од март годинава, кога е објавен последниот пресек на блокирани сметки, во земјата има 243.999 блокирани сметки.
Застарувањето и корекцијата на каматите беа овозможени со измените и дополнувањата на Законот за облигационите односи изгласани минатиот месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Време е за ресетирање на правосудниот систем

Христијан Мицкоски, претседателот на ВМРО-ДПМНЕ, имаше свое обраќање на денешниот народен митинг одржан во општина Сопиште, во рамки на изборната кампања 2025 година, за претстојните локални избори, чиј слоган е ,,Вистинскиот избор! Твојот човек! Твоето место! Твојата иднина!“.
Тој се осврна на темата за правдата во државата, а го потенцираше правосудниот систем кој според него, треба да биде непристрасен, да има судии кои судат според законот, процедури кои ќе ја вратат довербата, а додаде и дека правдата не смее да биде привилегија на малкумина.
Како што вели Мицкоски, постојат кочници кои се вградени во институциите на државата и функционираат како длабока држава во државата.
„Многу ме прашуваат изминатиов период, зошто и како не правиме реформи во судството, реформи во обвинителството. Тоа е нешто кое што претставува и за сите нас болка, бидејќи и судството и обвинителството се сегменти коишто се уште, претставуваат последните бастиони во одбрана на претходната влада. Ако некој ме праша зошто, затоа што инсталациите таму, и покрај десетиците би рекол, повеќе од стотина пријави кои што доаѓаат од надлежните институции, поткрепени со докази не ги процесуираат, туку ги држат во фиока. Но после овие локални избори, ќе се навратиме и на таа тема“, кажа Мицкоски.
Мицкоски потенцираше дека е време за ресетирање на системот, со цел да се изгради држава на правда, а во истата таа држава на правда правосудниот систем мора да биде непристрасен и непокорлив.
Како што кажа тој, здравствениот систем ќе биде столб на државата, со достапни лекови, модерни болници и стручен кадар.
,,Моментот што го чекале генерации е пред нас време за ресет на системот, време да ги скршиме ланците на неправдата и да изградиме држава на правда, слобода и грижа за секого. Судството мора да биде непристрасно и непокорливо, судии кои судат според законот, а не според влијанија; институции кои штитат, а не кои молчат; процедури кои враќаат доверба, а не кои создаваат сомнеж. Правдата не смее да биде привилегија на малкумина, туку право на секој граѓанин брза, достапна и ефикасна. Слободата не е само збор во уставот, туку жив начин на живот: слобода на мислење, слобода на говор, слобода од страв и притисок. Здравствениот систем е биде столб на оваа држава — модерни болници, достапни лекови, стручен кадар и превенција што штити семејства, наместо да ги остави ранливите сами да се борат. Ќе поставиме јасни правила, транспарентни процеси и нулта толеранција кон корупцијата која тоне животи и ја кочи промената “, рече Мицкоски.
Мицкоски ги потенцираше кочниците кои се вградени во сите институции и го кочат напредокот на граѓаните, затоа што истите функционираат како длабока држава, низ мрежи кои се шират низ сите институции, а понекогаш дури и низ етничките заедници.
,,Не можеме да го чекаме утрото додека ситни и големи кочници ја гушат работата на државата, кочници што се вградени во институциите, што делуваат тајно или откриено, и тие ја претставуваат во суштина длабоката држава во државата“, заклучи Мицкоски.
Македонија
Утре сончево време со локална облачност

Времето утре ќе биде сончево со мала до умерена локална облачност. Ќе дува слаб до умерен, наместа долж Повардарието повремено засилен ветер од северен правец, информира УХМР.
Минималната температура ќе биде во интервал од 4 до 10, а максималната ќе достигне од 14 до 21 степен.
Во Скопје, сончево со мала до умерена облачност. Ќе дува слаб до умерен, во делови од котлината повремено засилен ветер од северен правец. Минималната температура ќе се спушти до 8, а максималната ќе достигне до 20 степени.
До почетокот на следната седмица ќе преовладува стабилно, сончево и релативно топло време со локална појава на облачност во текот на денот. Ќе дува слаб до умерен, а во сабота долж Повардарието повремено засилен северен ветер.
Македонија
Наскоро зонско паркирање во Автокоманда

Во скопската населба Автокоманда наскоро ќе биде воведено зонско паркирање, најави кандидатот за градоначалник на Општина Гази Баба, Бобан Стефковски.
„ Со особено задоволство ги информирам жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање – решение кое жителите на Автокоманда го очекуваат повеќе од една деценија“, рече Стефковски.
Тој додава дека во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок.
Стефковски најави дека секое домаќинство ќе добие две бесплатни картички за паркирање.