Македонија
Повик до единиците на локалната самоуправа за Лигата на шампионите за локален развој
Локалните самоуправи од целиот регион, од денес, имаат можност да се пријават за учество во Програмата за сертификација на градови и општини со поволно деловно опкружување во Југоисточна Европа (BFC SEE) и со тоа системски да ги унапредат условите за привлекување инвестиции и побрз развој на постоечкото стопанство.
Партнерството за конкурентен регион (CORE Partnership) во соработка со Германската развојна соработка што ја спроведува ГИЗ, објави Јавен повик до лидерите на локалните самоуправи за подобрување на работата и ефикасноста на локалната администрација со следење на критериумите за сертификација на BFC SEE и со тоа да го заслужат епитетот Општина по мерка на бизнисот. Повикот е отворен за вкупно 50 единици на локална самоуправа од регионот, кои досега не учествувале во BFC SEE програмата.
-Почетен чекор во овој процес е локалната самоуправа да ги препознае единствените потенцијали и улога на стопанството во креирање одржлива стратегија за развој. Во тоа, BFC SEE програмата помага давајќи јасни насоки за зачувување на вработеноста и отворање работни места преку јакнење на партнерствата со локалните бизниси. Критериумите ги следат развојните и просторни планови, и помагаат да се унапреди организацискиот капацитет, ефикасноста и нивото на дигитализација на општинските услуги. Стандардот рангира и конкуретност во смисла на локалните давачки и особено ја вреднува поддршката на претприемништвото, иновациите и зелената економија – вели Душица Перишиќ, извршна директорка на Заедницата на единиците на локалната самоупрва (ЗЕЛС).
BFC SEE програмата се спроведува од 2012 година и досега повеќе од 100 градови и општини поминаа низ процесот на сертификација, а во моментов 45 локални самоуправи се носители на сертификат кој претставува печат за квалитет на нивното деловно опкружување. Резултатите од истражувањето спроведено од Партнерството за конкуретен регион покажуваат дека повеќе од три четвртини од локалните самоуправи кои поминале низ овој процес, сметаат дека процесот е корисен и истакнуваат дека најмногу ги мотивирало унапредувањето на ефикасноста во работата на администрацијата, привлекување нови инвестиции и препознатливост на локалните самоуправи. Од нив, 98% би ја препорачале BFC SEE програмата и на други градови и општини.
Процесот на сертификација е во времетраење од 12 месеци и започнува со обука на тим на локалната самоуправа кој е задолжен за исполнување на поставените критериуми. Следи процес на евалуација, во кој се оценува моменталната состојба во градот или општината, по што се доставува извештај до раководството со конкретни препораки за унапредување што е потребно да се применат во зададен период. На крај од процесот, независна верификациска комисија проценува дали локалната самоуправа ги исполнува условите за BFC SEE сертификат.
– Досега BFC SEE сертификат добија Град Скопје, Велес, Струмица, Штип, Илинден, Гази Баба и Богданци, и тие се меѓу најуспешните локални самоуправи кога станува збор за привлекување инвестиции и развој на локалното стопанство. Сакаме и другите да ги мотивираме да се придружат на клубот на најдобрите. Сертификатот BFC SEE на единиците на локална самоуправа им носи препознатливост во однос на другите локални самоуправи, подобра позиција на инвестициската мапа на Југоисточна Европа и поголеми шанси за привлекување вложувања. Добиваат и можност за учество во регионални проекти финансирани од меѓународни донатори и можност за размена на знаење со најуспешните локални самоуправи. Сé ова на крај води до нови работни места и подобар квалитет на живот за граѓаните – истакнува Перишиќ.
За учество во Програмата, заинтересираните единици на локална самоупрва може да достават пријава преку веб страницата www.bfc-see.org или да се обратат до ЗЕЛС како надлежен Технички секретаријат за спроведување на BFC SEE Програмата во С.Македонија. Во периодот што следи ќе биде организирана и инфо-сесија „Како да се достигнат стандардите за меѓународна BFC SEE сертификација“. Во оваа прилика, сите заинтересирани учесници, претставници на единиците на локална самоуправа ќе може дополнително да се информираат за деталите и условите за учество во BFC SEE Програмата.
Партнерството за конкурентен регион (CORE Partnership) е претставен од над 20 институции и организации од Југоисточна Европа. Спроведувањето на BFC SEE програмата го поддржува ГИЗ Отворен регионален фонд за модернизација на општински услуги (GIZ ORF MMS).
Критериуми за стекнување со сертификат
Квалитетот на локалното деловно опкружување се оценува на основа на повеќе од 60 критериуми групирани во 10 категории. Тоа се, пред сé, поседување стратешки план за развој со план за капитални инфраструктурни вложувања, постоење на функционална канцеларија за локален економски развој, како и Економски совет за постојана комуникација и соработка со стопанството со цел креирање подобри услови за бизнис. За секоја модерна локална самоуправа неопходно е и да има ефикасен систем за издавање градежни дозволи, да располага со информации за можности за вложувања и понудени поволности за инвестирање, и да е транспаретна по прашање на деловни трошоци за стопанството. Потребно е да се поседува програми за преквалификација на работна сила согласно потребите на инвеститорот. Посебно се вреднува стимулирање на развојот на претприемништво преку финансиски и нефинансиски бенефиции и олеснувања, посветеност на заштита на животната средина, како и дигитализација на административните процедури и решенија за поефикасно информирање на граѓаните и стопанството.
ПР-текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски: Аеродром го заслужува најдоброто, започнува реализацијата на голем капитален проект
Градоначалникот на Општина Аеродром, заедно со претседателот на советот, Дејан Митески и директорката на основното училиште „Блаже Конески“ утрово на работен состанок ја утврдија динамиката по која до крајот на оваа школска година треба да започне реконструкцијата и доградбата на основното училиште „Блаже Конески“.
„Станува збор за важен инфраструктурен проект, онаков каков што заслужуваат граѓаните на Аеродром. По неговото финализирање, Аеродром ќе добие модерно и современо училиште, направено согласно сите европски стандарди, училиште кое ќе биде пример за квалитетна градба, одржливост и енергетска ефикасност“, истакна градоначалникот Муцунски во својата објавата на Фејсбук.
Тој додаде дека најважно од се е што реконструкцијата и доградбата нема да го наруши нормалното функционирање на училишните активности, а нивната организација ќе биде направена во консултација и согласно барањата на родителите, со кои утрово Муцунски одржа состанок.
Македонија
(Видео) Ковачки: Со над 800 милиони евра владата од ВМРО-ДПМНЕ ќе ги решава проблемите на земјоделците
„Благодарност за поканата на нашиот градоначалник Виктор Паунов, тука сме заедно и со кандидатот за пратеник Гордана Барбашка. Како што нашиот градоначалник работи и покрај опструкциите од централната власт, гледате дека се развива и се гради. Во иднина ние планираме да дадеме 250 милиони евра за сите општини во Република Македонија без разлика кој е на власт. Само во Карбинци ќе доделиме 1,8 милиони евра за сообраќајна и комунална инфраструктура, значи дополнително општините ќе се градат и дополнително ќе се развиваат“, рече Драган Ковачки, член на ИК на ВМРО-ДПМНЕ и носител на Изборна единица 3.
„Како што работи нашиот градоначалник во Карбинци, така ќе работиме и ние на централно ниво. Дополнително за жителите од овој крај предвидуваме над 800 милиони евра во 4 годишен мандат за земјоделците што значи реконструкција на сите водоводни канали, да го решиме проблемот со водоснабдувањето, да го решиме проблемот со загарантираниот откуп, и да го решиме проблемот со загарантираната цена. Значи ќе отвораме и нови откупни центри.
Земјоделците од овој крај заслужуваат внимание, заслужуваат да си ја работат земјата тие, а не земјата да ја поседуваат феудалци како Љупчо Николовски и сличните на него.
Македонија е одлучна за промени, Македонија сака да биде горда, и Македонија заслужува да биде повторно твоја.
Затоа ги повикувам сите граѓани на 8 мај масовно да ни се приклучат да излеземе заеднички, да ставиме крај на овие црнила и овие сивила кои ги донесоа СДС и ДУИ“, изјави Драган Ковачки, член на ИК на ВМРО-ДПМНЕ и носител на Изборна единица 3.
Македонија
Oдбележување на 28 април – Светскиот ден на безбедност и здравје при работа
Во организација на МТСП и Меѓународната организација на труд со конференција на тема: „Климатските промени и безбедноста и здравјето при работа„ го одбележавме 28 април – Светскиот ден на безбедност и здравје при работа.
Сведоци сме на очигледни глобални климатски промени кои се случуваат насекаде на планетата. Резултат на тоа се сè почестите временски и климатски екстремни појави – изразито силни и чести топлотни бранови, силни врнежи, шумски пожари, поизразени сушни периоди итн. Никако не смее да се занемари фактот дека ваквите појави сериозно влијаат врз безбедноста и здравјето на работниците, кои честопати се и првите кои се изложени на овие опасности и тоа обично со изложеност која е подолготрајна и поинтензивна отколку на општата популација.
На одбележувањето на 28 април- Светскиот ден на безбедност и здравје при работа, министерот за труд и социјална политика, Ѓоко Велковски потенцирајќи го значењето на безбедноста и здравјето при работа, рече дека добар дел од несреќите при работа и појавата на професионални болести и заболувања кај работниците, можеле да бидат превенирани и спречени, но се токму последица на недоволното и несоодветното преземање на превентивни и заштитни мерки, неопходни да го заштитат здравјето и животот на работниците на работното место.
Во овој дел, тој се осврна на анализите и проценките на Меѓународната организација на трудот објавени пред извесно време.
„Проценки кои даваат една навистина застрашувачка слика, според која секоја година повеќе од 2,3 милиони работници ширум светот умираат од несреќи или заболувања кои се поврзани со работата и работното место, а дополнителни 340 милиони работници се повредуваат во различни несреќи при работа’, рече Велковски и додаде дека овие повреди и несреќи при работа, за жал се случуваат и во нашата држава.
Според податоците од Државниот инспекторат за труд, во текот на минатата – 2023 година се случиле околу 2,250 посериозни повреди при работа, од кои 17 завршиле трагично, со смртни последици по вработените.
„И токму затоа, спречувањето на ваквите ситуации, намалувањето на можностите за појава и настанување на несреќи при работа, намалувањето на ризиците на работното место, спречувањето или намалувањето на влијанието на различни опасности со кои се соочуваат или доаѓаат во допир работниците при нивната работа, … сето ова е нешто на што сите мораме заеднички и координирано да работиме, уште поинтензивно отколку досега”, потенцираше министерот Велковски.
Секоја година при одбележувањето на Светскиот ден за БЗР, во фокусот на дискусиите е одредена актуелна тема од областа на безбедноста и здравјето при работа. Така е и оваа година. Одбележувањето е тематски посветено на „Влијанието на климатските промени врз безбедноста и здравјето при работа“.
Министерот Велковски на оваа тема акцентираше дека: „Мораме да сме свесни дека промовирањето и почитувањето на основниот принцип и право на работа во безбедна и здрава работна средина, исто така помеѓу другото, значи и соодветно справување со опасните влијанија од климатските промени на работното место”.
На конференцијата, воведни обраќања, покрај министерот Велковски имаа и Владанка Трајковска, Претседателка на ОРМ, Слободан Трендафилов, Претседател на ССМ и Националниот координатор на МОТ, Емил Крстановски.
На темата: „Климатските промени и безбедноста и здравјето при работа”, говореа Горјан Јовановски, софтверски инженер и еко-активист, основач на AirCare и EarthCare.ai, проф. д-р Драган Мијакоски од Институтот за медицина на трудот и Билјана Ставреска, стручно лице за безбедност при работа од Институт за техничко испитување и безбедносен инженеринг ИТИ – Скопје.