Поради неуредна достава на поканата за сведокот Дејан Панделески, синот на газдата на Пелистерка, повторно беше одложено судењето за случајот „Рекет“.

Во 11:30 часот Апелацискиот суд треба да расправа по жалбата за мерката притвор на Бојан Јовановски – Боки 13, кој бара да биде пуштен во домашен притвор.

Рочиштето за „Рекет“ се одложува вторпат – вчера требаше да сведочи сопственикот на „Тинекс“, Владимир Тодоровиќ, кој достави потврда дека е на службен пат.

Се очекува тој во вторник да се појави пред судот кога треба да сведочи и Сергеј Варошлија, пријател на Јовановски и поранешен вработен во 1 ТВ. В среда, пак, пред судот како сведоци треба да се појават сопругот на Фросина Ременски од СДСМ, Јовче Ременски, и Дејан Панделески.

Случајот се наоѓа во доказна постапка и го води судијката Васка Николовска-Масевска, а застапник на обвинението е Вилма Русковска.

Одбраната на Бојан Јовановски има предложено 12 сведоци.

Основното јавно обвинителство за гонење организиран криминал и корупција во октомври лани поднесе обвинение против Бојан Јовановски, Катица Јанева и Зоран Милески Кичеец.

Првообвинетиот Јовановски се сомничи дека сторил кривично дело перење пари и други приноси од казниво дело и за примање награда за противзаконито влијание. Второобвинетата Јанева се товари дека сторила кривично дело злоупотреба на службена положба и овластување.

На првото рочиште за „Рекет“, кое се одржа на 3 декември минатата година, третообвинетиот Зоран Милески-Кичеец призна вина за делото примање награда за противзаконито влијание, по што беше осуден на три години затвор.