Македонија
Поради фекалиите во дворовите, жителите на струшко Враништа протестираат и бараат канализација

Жители на село Враништа, кое се наоѓа на пет километри од Струга, цел викенд протестираа со барање во селото да се постави нова водоводна мрежа, а за првпат да имаат и канализациска мрежа. Тие со транспаренти порачаа дека кога има дожд се излеваат нивните јами, па настануваат фекални поплави. Се жалат дека непонослива смрдеа се шири насекаде, поради што се отвора можноста да се шират и заразни болести. Барањата за канализација и водовод ги упатија до Општината Струга и Министерството за транспорт и врски.
Обраќајќи се до градоначалникот Рамиз Мерко и институциите, жител на селото посочи: „Цели 30 години жителите на село Враништа се соочуваат со голем проблем. Граѓаните се принудени да градат и нови септички јами, чие траење е неколку години. Таквите јами се излеваат низ селските канали и дворови. Од нив има непријатен мирис. Тоа го прави селото неадекватно место за живеење. И покрај ветувањата од властите, жителите на Враништа останаа без канализација. На само 50 метри од Враништа е колекторот кој ги канализира отпадните води низ цел Струшки Регион. При изградбата на колекторот во 70-години, земјиштето припаѓало на Враништа. Жителите на Враништа плаќале и пари за изградба на канализација, за што имаме и докази. Во однос на водоводната мрежа, ќе истакнам дека цевките се веќе стари и мора да се променат. Притисокот на водата, особено во лето, е мал. Тоа е проблем кој мора да се земе предвид“.
„Инсталација на целосна водоводна мрежа“, „Заштита на животната средина“, „Социјален живот, пешачки и велосипедски патеки“, „21 век без канализација“, „Протест против никого, заедно за интересите на село Враништа“, беа дел од транспарентите.
Засега, нема реакција на нивните барања. Жителите најавуваат дека протестите ќе продолжат ако за 15 работни денови, Струга и Министерството за траснпорт и врски не се изјаснат по нивните барања. Тие посочија дека бараат да не се ризикува нивното здравје.
„Се протестира за добивање нова канализациска мрежа и нова водоводна мрежа. Сме се обратиле до Министерството за транспорт и врски и Општина Струга. Граѓани на Враништа, со нерешавање на овој проблем се соочуваат со неопислива смрдеа поради што се принудени да ги оставаат своите септички јами по нивните дворови и селските канали, а се ризикува да се шират многу заразни болести. Апелот до надлежните е што побрзо да ги чујат нашите барања на канализациска и водоводна мрежа и да одговорат што побрзо. Доколку не одговорат на нашето барање во рок од 15 работни дена, ние како месна заедница и цело население на Враништа ќе продолжиме што поригорозно да настапиме и да го блокираме патот. Да не се воведеме во ситуација да го блокираме и колекторот, па така да се блокира и цела општина“, велат жителите на протестот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ ги соопшти имињата за градоначалници и во Тетово и Желино, за Гостивар ќе чека предлог од Таравари, а за Струга од Села

Претседателот на Демократската унија за интеграција (ДУИ), Али Ахмети, свика редовна седница на Централното претседателство на партијата, на која беа разгледани актуелните политички случувања во земјата и подготовките за претстојните локални избори.
Централното претседателство едногласно го именува Фатон Ахмети, генерален секретар на ДУИ, за шеф на Централниот изборен штаб.
Исто така, со целосен консензус беа потврдени кандидатите кои ќе се натпреваруваат за градоначалници и носители на советнички листи во повеќе општини:
Во Општина Тетово, кандидат ќе биде Бајрам Реџепи, потпретседател на ДУИ.
Во Општина Желино, кандидат ќе биде Гемир Сулејмани, претседател на општинската организација на ДУИ.
Во Општина Гостивар, носител на советничката листа ќе биде Валдет Џафери, претседател на огранокот на ДУИ. Во Општина Струга, носител на советничката листа ќе биде Фатон Пололжани, претседател на огранокот на ДУИ.
Во наредните денови, по завршување на внатрепартиските и коалициските консултации, ќе бидат потврдени дополнителни кандидати за останатите општини.
Од Алијансата за Албанците, преку Зијадин Села, се очекуваат предлози за кандидати за градоначалници во општините Струга, Харачина и Дебар, а од Арбен Таравари – за Гостивар, Врапчиште, Теарце и Сарај.
Од ДУИ велат дека остануваат посветени на фер, инклузивен и програмски силен изборен процес, а граѓаните се повикуваат како на референдум да ја потврдат следната победа на локалните избори.
Македонија
Бујар Османи ја објави кандидатурата за градоначалник на Чаир: „Не се работи за функција“

Бујар Османи од Демократската унија за интеграција (ДУИ) денес официјално ја објави својата кандидатура за градоначалник на општина Чаир. Одлуката, како што истакна, е резултат на долг период на консултации и сериозно преиспитување, донесена заеднички со луѓето што му се најблиску.
„Не се работи за функција. Они кои ме знаат, добро знаат дека сѐ што правам, во секој предизвик, влегувам искрено, влегувам целосно без никакви задршки. Се работи за одговорност кон сопствениот дом, затоа што граѓаните на Чаир не заслужуваат да живеат во супстандардни и небезбедни услови, не заслужуваат да бидат игнорирани и омаловажувани.“, порача Османи.
Тој истакна дека влегува во оваа трка со посветеност, посочувајќи дека сака иднината на децата во Чаир да биде подобра, а нивното секојдневие побезбедно и поквалитетно.
„На Чаир му се потребни промени вистински, длабоки и човечки промени. Знам дека тие промени не се лесни, и затоа долго размислував пред да ја донесам оваа одлука. Јас не бегам од тешки мисии, напротив, верувам дека со чесна намера, секојдневна работа и професионален пристап, можеме да го промениме Чаир. Да го вратиме достоинството и да отвориме нова страница, со врата што никогаш нема да биде затворена за граѓаните“, рече Османи.
На крајот од своето обраќање, им се заблагодари на сите кои му ја изразиле поддршката во изминатиот период.
Македонија
Сиљановска-Давкова го прими министерот за економија на Азербејџан, Џабаров

Претседателката Гордана Сиљановска-Давкова денеска оствари средба со Микаил Џабаров, министер за економија на Азербејџан, на којашто беше потврдена спремноста за продлабочување на соработката во областа на економијата, но и во други сфери, како инфраструктурата и туризмот.
За соговорниците, потпишувањето Декларација за стратешко партнерство и пријателство, е неопходен чекор кон склучувањето договор за стратешка соработка во областа на енергетиката.
На средбата, министерот Џабаров ја информираше претседателката за подготвеноста на Азербејџан да потпише со нас договор за долгорочно снабдување со гас, со којшто азербејџанската национална нафтена компанија SOCAR ќе го зајакне присуството во регионот и уште еднаш ќе го потврди угледот како сигурен и доверлив снабдувач со енергетски ресурси на европскиот пазар.
За претседателката, оваа иницијатива гарантира сигурна енергетска транзиција кон Зелената агенда. Таа очекува приклучување кон ТАП (Трансјадрански гасовод), како потенцијално решение за справување со глобалната енергетска криза.
Со оглед на брзиот инфраструктурен развој на Азербејџан, претседателката изрази став дека азербејџанското искуство и експертиза може да ни помогнат за поефикасна реализација на тековните и идни инфраструктурни проекти.
Министерот Џабаров изрази подготвеност за помош на овој план, укажувајќи на позитивното искуство со неколку земји од регионот.
Соговорниците се согласија околу потребата од визна либерализација како важен и неопходен чекор за меѓусебно зближување.
Обајцата укажаа на потребата од иницирање партнерски проекти во сферата на туризмот.