Министерка за европски прашања при Министерството за Европа и за надворешни работи на Француската Република, Натали Лоазо, на денешната средба со претседателот на Владата, Зоран Заев, ја истакна поддршката на Франција на патот кон ЕУ, таа ги поддржа храброста и визијата во постигнувањето на договорот од Преспа и отворениот процес на влегувањето во НАТО.

„Нема сомнеж за Франција дека иднината на Северна Македонија е во Европската Унија“, додаде министерката Лоазо, која дополни дека треба да се изоди дел од патот, а тука ги посочи реформите значајни за европските перспективи.

На средбата е истакнато како многу важна имплементацијата на донесените реформски закони, посебно во делот на обезбедувањето правна држава и на одбраната.

На средбата беше потпишана спогодба помеѓу владите на двете држави којашто се однесува на средните училишта со франкофонски двојазични паралелки и имаше изјави за јавност.

Оценето е дека спогодбата, со којашто се зголемува фондот на часови по француски јазик во средните училишта и воведувањето франкофонски двојазични паралелки, е чекор во насока на унапредувањето на соработката помеѓу двете држави, за што постои интерес од двете страни.

И премиерот Заев во изјавата посочи дека денешниот настан во Скопје е значаен доказ за пријателството помеѓу двете земји.

„Спогодбата што ја потпишавме во областа на образованието е силна политичка порака дека во Франција гледаме голем пријател и партнер во реформите и напорите за напредокот на нашата држава, како на домашен така и на меѓународен план“, рече премиерот Заев.

Претседателот на Владата посебно се заблагодари за поддршката од францускиот претседател Макрон и на Владата на Француската Република во реформите и зајакнувањето на билатералната соработка.

На средбата беше посочено дека земјите од Западен Балкан се дел од Европа и дека сè што е добро за Балканот е добро и за Европа.

Се разговараше и за важноста на претстојните европски избори и за реформирањето на една силна, зајакната, интегрирана Европа.

Договорено е да се обрне внимание и на потребата на зајакната соработка во борбата против тероризмот.