Македонија
Потпишан договорот за финансирање на Центарот за развој на Пелагонискиот Плански Регион
Министерот за локална самоуправа, Горан Милевски, денеска во Битола, во присуство на градоначалниците на Пелагонискиот Плански Регион, го потпиша договорот за финансирање на Центарот за развој на планскиот регион за тековната 2019 година.
Милевски истакна дека со договорот се утврдуваат активностите кои што Центарот за развој ќе ги реализира оваа година, а коишто произлегуваат од Програмата за развој на Пелагонискиот Плански Регион. За реализација на оперативните активности на Центарот, поддршката од Министерството за 2019 година е 1,2 милиони денари, и исто толку за реализација на проектите за развој на планскиот регион. Тој ги информираше присутните дека Министерството за локална самоуправа веќе ги има започнато активностите на експертско ниво за подготовка на измените на Законот за рамномерен регионален развој.
„Во изминатиот период не се постигнати очекуваните резултати, развојните разлики се големи, особено меѓу урбаните и руралните општини, додека нивото на услуги во некои населени места е под стандардите. Оваа состојба мора да се менува со ефикасни политики и брзи решенија“, истакна министерот.
Во Пелагонискиот Плански Регион, нагласи министерот, од буџетската програма за рамномерен регионален развој, годинава се финансираат 15 проекти во вкупна вредност од 48 милиони денари. 8 проекти се за развој на регионот, 3 за развој на селата и 4 проекти за развој на подрачјата со специфични развојни потреби. Регионалниот развој се поттикнува со средства од буџетот, но буџетот не треба да биде единствениот извор за финансирање на проектите. Сериозно треба да се смета и на ИПА-инструментот на Европската Унија, затоа што со членството на државата во макро регионалните Стратегии на Европската Унија, можностите се уште поголеми, рече министерот за локална самоуправа, Горан Милевски.
Министерот Милевски најави ефективна соработка за решавање на прашањата кои се одразуваат на ефикасноста и на квалитетот на реализација на проектите и донесување сериозни одлуки за продолжување на процесот на децентрализација, на трансферот на нови надлежности и на финансиски средства.
Договори за финансирање ќе бидат потпишани со сите Центри за развој на планските региони за да не се доведе во прашање нивното тековно работење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Дел од неколку скопски општини без струја
Регионалниот центар за управување со кризи на Град Скопје, по добиеното известување од ЕВН, ги известува граѓаните дека поради технички зафати во електро дистрибутивната мрежа без електрична енергија ќе останат:
· од 08:00 – 14:00 часот, корисниците од дел од с. Студеничани. (Општина Студеничани)
· од 09:00 – 14:00 часот, корисниците од дел од улиците: Ринхини и Езерци во нас. Влае. (Општина Карпош)
· од 10:00 – 12:00 часот, корисниците од ул. Пелистерска бр. 2, во нас. Карпош 3. (Општина Карпош)
· од 13:00 – 14:30 часот, корисниците од дел од ул. Миле Поп Јорданов, (објектите во околината на Градинката Пролет). (Општина Карпош)
Македонија
Сончево и топло време преку ден, попладне краткотројно невреме
Времето денес ќе биде сончево и топло со мала до умерена облачност.
Попладне ќе има локален развој на нестабилна облачност со пороен дожд и грмежи, наместа со услови за појава на краткотрајно невреме. Ќе дува умерен до засилен ветер од југоисточен правец најизразен долж Повардарието. Минималната температура ќе биде во интервал од 10 до 16, а максималната ќе достигне од 23 до 27 степени, јавува УХМР.
Во Скопје променливо облачно со повремен дожд. Попладне во делови од котлината ќе биде нестабилно со краткотраен пороен дожд и услови за појава на грмежи. Ќе дува умерен ветер од југоисточен правец. Минималната температура ќе се спушти до 16, а максималната ќе достигне до 26 степени.
До среда ќе се задржи нестабилно време, претежно во попладневните часови со локален пороен дожд и грмежи. Наместа процесите ќе бидат поинтензивни во форма на краткотрајно невреме, со засилен ветер, обилен пороен дожд за кратко време и изолирана појава на град. Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок. Температурите ќе бидат без значителна промена.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.