Македонија
По скандалот на Онкологија, 12 раководители ги одобруваат терапиите за секој пациент, уверува министерот Меџити

За терапијата на секој пациент на Клиниката за онкологија одлучуваат дванаесетмина раководители на оддели и можноста за пропуст е минимална, уверува министерот за здравство, Фатмир Меџити. Тој денес извести дека присуствувал на лекарски колегиум на Онкологија и лично се уверил во овој начин на функционирање за кој тврди дека бил воведен уште пред да се појават во јавноста тврдењата дека на пациентите им бил даван физиолошки раствор место антиканцерогени лекови, кои завршувале на црниот пазар.
„Токму поради индициите што ги имале, лекарите на Клиниката презеле мерки и за терапијата на секој еден пациент одлучуваат 12 раководители оти Онкологија има 12 оддели, а гласот на директорката е изземен за да нема сомнеж за злоупотреби. За сите дијагнози, за сите лекови, за тоа кој пациент како и кога ќе го прими лекот, како и за утврдување точни дози, одлучуваат сите раководители. Ме радуваше начинот како се одлучува со 12 раководители, можноста е минимална и ќе сносат одговорност сите што ќе згрешат“, рече министерот Меџити.
Системот за контрола на аплицирањето лекови на Онкологија, кој е набавен, но не се користи, Меџити објасни дека го известиле дека работел кратко време, а потоа употребата престанала оти трошокот за соодветни кеси за негова употреба бил голем. Сега се анализира дали да се врати во употреба тој систем или да се набави нов, посовремен.
„Тој систем не го препознава лекот, туку ги регистрира во милилитри како се троши лекот. И вода да има внатре, тој ќе регистрира колку милилитри некому му се дадени“, објасни министерот Меџити.
Тој апелира да не се шират шпекулации за лековите на болните и пациентите и јавноста да дозволат МВР и Обвинителството, кои првпат влегоа на Онкологија, да си ја завршат работата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Кашиковски од ССМ со плата од над 50.000 денари, Трендафилов и луѓето околу него со енормни примања

Кашиковски од ССМ со плата од над 50.000 денари, Трендафилов и луѓето околу него со енормни примања. Според информациите кои стигнаа до нас од свиркачи од ССМ, Стојанче Кашиковски, претседател на синдикатот на работниците од угостителството, туризмот и комунално-станбено стопанство остварува и дополнителни годишни примања покрај платата. Вкупните примања на Кашиковски во 2023 година, во кои влегува неговата плата и примања по други основи, биле над 810.000 денари, изјави
Бране Петрушевски, пратеник на ВМРО-ДПМНЕ.
– Ова се синдикалците на Трендафилов и ССМ, не се знае кој од кој поголеми примања има. Според свиркачите од ССМ, кои се разочарани од актуелното раководство, Трендафилов и луѓето околу него го претвориле синдикатот во приватна фирма. Трендафилов и луѓето околу него одработуваат за нивните позиции по ноти на СДС, кои и ги поставија на нелегитимен начин. Ова се луѓето кои додека ги лажат работниците за минималец, тие земаат плати неколку пати поголеми од тоа од синдикатот, рече Петрушевски.
Македонија
Илиевски: Нов скандал во министерството на Андоновски, тендер добиле родители на негов вработен

По објавувањето на скандалот за судир на интереси во Министерството на Стефан Андоновски, каде тендер доби сопругот на Државната секретарка, ДКСК отвори предмет. Граѓаните сеуште чекаат да постапи Јавното обвинителство за случајот, за истиот да добие разрешница. Додека целата јавност беше во тага и болка за несреќата во Кочани, каде што загинаа 59 млади луѓе а речиси 200 беа повредени, на само три дена по трагичниот настан Андоновски побара извинување од СДСМ, изјави Методија Илиевски, потпретседател на СДСМ.
– Шокантно е што барањето за извинување пристигна на 19 март на самиот ден на погребот на загинатите од несреќата кога целата нацијата беше во шок. Тоа го покажува степенот на загриженоста на министерот за трагичниот настан. СДСМ е одговорна партија која се бори секогаш да излезе вистината на виделина, и да зборува во насока на заштита на јавниот интерес пред се!
Токму затоа, наместо извинување До Министерот Андоновски, денес ќе објавиме индиции за уште еден скандал. Се работи за тендер од 600.000 денари за набавка на систем за контрола на пристап, добиен од фирмата „БОКИ СИМПЛ ТЕК СОЛУШНС“ ДОО Скопје. Според информации од свиркачи кои ги добивме, сопственици на оваа фирма се родителите на Борче Младеновски, инаку вработен во ИТ секторот на истото министерство. Го повикуваме Андоновски да излезе и да одговори дали е ова точно?
Дали тендерот тежок 600.000 денари завршил кај родителите на вработен во министерството? Индикативен е називот на меилот кој правното лице го има дадено во доставената документација за контакт со министерството кој гласи [email protected]. СДСМ се обиде го најде список на вработени во Министерството за дигитална трансформација, но на сајтот на министерството тој податок не е достапен, таму стои дека сеуште тој документ е во изработка.
Дали на повидок е уште еден скандал на непотизам и конфликт на интереси во министерството на Андоновски? Селективноста и селективната правда е потребна за сите други случаи на власта кои ги прави, а не само за трагедијата во Кочани. Институциите не смеат да молчат за тендерските мрежи на ДПМНЕ бидејќи станува збор за пари на граѓаните, рече Илиевски.
Македонија
Момчето херој Јован Костадинов во посета на Бигорски манастир

Јован Костадинов, момчето кое спаси 21 живот од пожарот во дискотеката „Пулс“ во Кочани на 16 март, е во посета на Бигорскиот манастир.
Во објава на Фејсбук стои дека Јован не е само херој на Кочани, туку е „херој на целата наша држава Македонија”.
-Симбол на тоа што значи да се стави човечноста над стравот. Потсетник за сите нас колку многу може да направи едно дете со големо срце, се наведува во објавата.