Македонија
(Видео) По 3,6 години затвор добија функционерите на ДУИ, Гури и Алими, за уништување изборен материјал

Функционерите на ДУИ, Исмет Гури и Ејуп Алими, кои се гонеа за уништување изборен материјал, добија по 3 години и 6 месеци затвор. Ним во Кривичниот суд им се судеше вторпат откако еднаш Апелација ја укина пресудата. Судијката Марија Клетничка ги огласи за виновни бидејќи за време на локалните избори, кога се избирал градоначалник на Чаир, во група преправале списи, кои служеле за изборите и гласањето, со додавање и одземање гласови.
„Судот потенцира дека една од основните претпоставки за владеење на правото е избирачкото право. Избирачкото право претставува услов без кои не може една земја да се претстави како демократска. Ценејќи ги изведените докази, советот по советување и гласање, ја донесе следната пресуда: судот двајцата обвинети Исмет Гури и Ејуп Алими ги осудува на казна затвор во времетраење од 3 години и 6 месеци. Се задолжуваат да ги платат и трошоците на постапката“, рече судијката, која појасни дека постапила и по напатствијата од Апелација.
Таа рече сведоците во повторената судска постапка ги промениле исказите, но доказите покажуваат уништување изборен материјал. Според судијката, одбраната е дадена со цел обвинетите да избегнат одговорност, но не докажуваат нивна невиност.
„Судот ги ценеше и прифати доказите од одбраната. Но, тие не доведоа до поинаква фактичка состојба од онаа што судот ја утврди. Напротив, одбраната е спротивна на дадените докази, а дадена е со цел обвинетите да ја избегнат кривичната одговорност за предметните кривични дела. Иако преправањата на записниците не се нагодени за вештачење бидејќи се напишани со двојни повлекувања и потези, поради што од страна на кое било вешто лице не може да се анализираат општите и посебните графички карактеристики на извршените преправања, умислата и резултатот од умислата се на страна на двајцата обвинети. Наведеното беше неоспорно утврдено од страна на сведоците“, додаде судијката.
Исмет Гури и Ејуп Алими на 31 март 2020 година беа осудени по три и пол години затвор за „Титаник 3“ поради уништување изборен материјал на локалните избори во општина Чаир во 2013 година. Судијката Марија Клетничка при објавување на пресудата рече дека обвинетиот Гури е виновен затоа што за време на локалните избори во општина Чаир во 2013 година, заедно со сведоците Блерим Мухаџери и Ќани Точи, ги преправале записниците од гласањето. А обвинетиот Алими е виновен зашто презел противзаконски дејства за уништување изборен материјал.
Во 2021 година Апелација донесе одлука по предметот одново да се постапува. Апелација даде напатствија за правна оценка на кривичните дела за кои се гонат, да се провери и кој кое дело го сторил. Поради ова, имаше и ново вештачење, кое ги даде истите резултати како претходните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пронајдени двете девојки од Португалија кои се изгубија во реонот на Водно – Матка

Денес околу 17.00 часот од страна на Центарот за управување со кризи бевме известени за две изгубени туристки во реонот од врвот на Водно кон Матка, извести директорот на ДЗС, Стојанче Ангелов.
Како што информираше Ангелов, Дирекцијата за заштита и спасување итно извршила мобилизација на тимот за спасување на планина од Тетово и истиот веднаш бил упатен во пребарување на теренот.
Во 18.40 двете девојки од Португалија беа пронајдени и однесени до ресторанот Матка каде ги пречека Конзулот на Република Португалија, додава Ангелов.
Македонија
Дел од Ѓорче Петров утре без струја

Од ЕВН Македонија АД известуваат дека утре без електрична енергија ќе останат:
– во периодот од 09.00 до 15.00 часот, корисниците од улиците Веле Марков, Ибе Паликуќа, Воин Драшковиќ, Рафаел Батино. (општина Ѓорче Петров)
Македонија
Меџити прими жители од Страчинце: Анализите на експертите јасно покажаа дека отворањето на каменоломот ќе има сериозни последици врз животната средина

Првиот заменик-претседател на Владата и министер за животна средина и просторно планирање, Изет Меџити, денес ги прими во својот кабинет жителите од селото Страчинце, со кои одржа отворен состанок за одлуката за одбивање на барањето за отворање на каменолом во оваа скопско село.
Министерот Меџити ги информираше жителите за професионалните и институционалните причини што доведоа до оваа одлука. Анализите на експертите јасно покажаа дека отворањето на каменоломот ќе има сериозни последици врз животната средина, ризик од поплави и негативно влијание врз јавното здравје, велат од Министерството.
На состанокот беше истакнато дека приоритет е заштитата на животот и благосостојбата на граѓаните над секој економски интерес.
Меџити истакна дека следниот чекор е конечно поништување на концесијата во Влада, со што ова прашање ќе добие трајно решение.
Жителите на Страчинце се заблагодарија за одлуката и за приемот што го оствари министерот Меџити, нагласувајќи дека овој состанок е пример за владеење со отворен дијалог и чесна соработка со граѓаните.