Македонија
Предметот за организаторите на 27 април продолжува со завршни зборови, судот не дозволи одново да се предлагаат докази
Откако Вилма Русковска го измени обвинението за „Организатори на 27 април“, адвокатите на обвинетите побараа одлагање на рочиштето за да се произнесат дали предметот да се врати во доказна постапка или да се продолжи со давање завршни зборови. Судот прифати да се одложи расправата, но потенцираше дека обвинителот има право да го измени обвинението. Следното закажано рочиште треба да продолжи со завршни зборови.
„Вие сте искусни и спремни адвокати за секогаш да дадете завршен збор. Главната расправа може да се одложи. Имајќи предвид дека обвинетите и нивните бранители бараат одлагање за подготовка на завршни зборови, главната расправа се одлага за 6 и 12 јули“, рече судијата Илија Трпков.
Адвокатот Гоце Ристески, кој го застапува Спиро Ристовски, наведе кои се промените во изменетиот обвинителен акт за неговиот клиент.
„Во текот на доказната постапка, по првичното обвинение, по околностите кои ги наведов, одбраната предложи, а судот прифати и испита 63 сведоци. Во овој момент, одбраната на Спиро Ристовски не може да се произнесе дали понатаму ќе предложи враќање на предметот во доказна постапка или ќе продолжи со давање завршни зборови, бидејќи денеска е примено изменетото обвинение. Предлагаме главната расправа да се одложи за да одбраната може да се спреми за понатамошниот тек на постапката“, рече адвокатот.
Според адвокатот Дончо Наков, постојат пресуди на апелационите судии каде што предмети биле враќани на повторно судење, бидејќи на одбраната не ` било овозможено по измена на обвинителен акт да даде контрааргументи.
„По изменетиот обвинителен акт, доколку влегувате во фаза на завршни зборови, ниеден од обвинетите не се произнел за правото или признавањето на евентуална вина по изменетиот акт. Ниеден од обвинетите по изменетиот акт не дал своја одбрана по дејствијата кои се изменети. Ниеден од обвинетите не е повикан, ако продолжите со завршен збор, да даде контрааргументи и одбрана, во поглед на ваквиот изменет обвинителен акт. Во судската пракса постојат повеќе пресуди во кои апелациониот суд го враќа предметот, бидејќи не се пружени правата на одбрана кои ги цитирав. Елементарните. Сметам и сакам да кажам дека примарните права на обвинетите на одбрана се повредени. Се приклучувам кон предлогот на Гоце да се даде рок на одбраната за правата на обвинетите да ви бидат предочени“, рече Дончо Наков.
Исти ставови имаа и останатите адвокати.
„Ова ја менува структурата и концепцијата на завршниот збор, којашто како бранител би ја дал за обвинетиот Трајко Вељановски, измените за Спиро Ристовски ги кажа колегата, а такви измени има и кај Миле Јанакиески. Предлагам во овој момент да ни биде овозможено, онака како што наведоа колегите, да се преструктуираме и подготвиме завршниот збор“, рече Еленко Миланов, кој ги застапува Трајко Вељаноски, Миле Јанакиески и Спиро Ристовски.
Претходно, завршен збор даваше обвинителката Вилма Русковска. Таа кажа дека сè се знаело, сè било испланирано, само не се знаел датумот. Според неа, обвинетите не биле изманипулирани, туку знаеле што прават.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.
Македонија
Проданоски: Експресниот пат Градско-Прилеп ни од далеку не е готов, да ставиме крај на лагите на СДСМ на 8 мај
Тука сме на лице место за да ги разобличиме лагите кои што СДСМ се обидуваат да ги пласираат до јавноста, рече Дејан Проданоски, претседател на ОК на ВМРО-ДПМНЕ Прилеп.
– Овде во Дреновската клисура каде што сме на самиот старт на почетни градежни активности, а за кои што слушнавме дека во 90 % експресниот пат е завршен. Овие се истите лаги исто како оние на почетокот на нивниот мандат кога Фејсбук и Гугл чекаа на граница, истите лаги како фабриката за автомобили во Тетово. Но, македонските граѓани треба да видат и да знаат дека овде на ова место е сам старт на почеток на градежни активности, а не е видлив ниту крајот на она како што тие сакаат да го пласираат. Да не зборувам тука и за третата фаза од експресниот пат за која што има обезбедено средства и за која што можеше исто да биде завршена ако не беа платени пеналите кон компанијата на која што и се бараше рекет за да остане да го гради автопатот и се изгуби значително голем период од изградба на патот и барање на друга компанија, рече тој.
На лагите од СДСМ им нема крај, овие лаги мора да завршат, затоа на 8-ми мај ве повикувам сите да заокружите број 2 за да и ова автопатско решение биде завршено и биде ставено во функција на секој граѓанин на Република Македонија, додаде Проданоски.