Македонија
Преку амандманите ВМРО-ДПМНЕ тврди дека СЈО ја постигнало целта и нема потреба повеќе да постои

Бришење цели членови од предлог-законот за Јавното обвинителство и додавање нови членови кои го позиционираат СЈО само како одделение во состав на Обвинителството за гонење организиран криминал и корупција, со мандат додека траат тековните судски процеси.
Ова се накратко некои од 65-те амандмани кои ВМРО-ДПМНЕ ги поднесе како предлози за иднината на специјалното јавно обвинителство, а до кои дојде „Макфакс“.
Од поднесените амандмани може да се заклучи дека ВМРО-ДПМНЕ инсистира СЈО да биде надлежно само за поднесените обвиненија заклучно со 30 јуни 2017 година и штом правосилно ќе се завршат сите постапки, СЈО да згасне.
Освен што во секој амандман стои „Република Северна Македонија“, забележливо е дека дел од образложенијата се напишани со задебелени букви и извичници за да се потенцира нивната важност, па така на пример, во делот за рокот за поднесување обвиненија, пишува:
„Постапките кои се засноваат на нелегитимно собрани докази од нелегитимен орган не можат да бидат предмет на било каква постапка во македонскиот правосуден систем! Сето претходно наведено дава апсолутен нелегимитет на постапките кои се започнати од страна на Специјалното Јавно обвинителство во периодот од 30 Јуни 2017 година како и доказите употребени после овој период од страна на ова обвинителство!“.
Во образложението на осмиот амандман пишува: „Специјалното јавно обвинистелство ја исполни целта заради која беше формирано и повеќе нема потреба од негово постоење, со што сите одредби во овој закон кои се однесуваат на Специјалното јавно обвинистелство, треба да се избришат“.
ВМРО-ДПМНЕ предлага да не постојат и вишите јавни обвинителства.
„Имајќи предвид малубројноста на основните обвинители, со негово укинување и прераспределување на сега вишите обвинители со еден потег ќе се добијат повеќе придобивки како кон подобрување на функионалноста, така и кон подобрување на ефикасноста и одговорноста во работењето на новото ЈО на РМ“
Во амандманот 48 е образложено дека е неоправдано СЈО да има посебен буџет и платите на специјалните обвинители да бидат на ранг на вишите јавни обвинители.
„Ако веќе СЈО се инкорпорирано во рамки на единствениот јавно обвинителски систем, тогаш која е оправданоста да има посебен буџет. Со оваа одредба се дава автономија и слобода на СЈО сами да изготвуваат предлози за буџет и финансиски план до Министерството за финансии. Исто така спорно е, а пред се` е нееднаков третман во однос на платите на обвинителите во СЈО во споредба со платите на обвинителите во Основните јавни обвинителства. Обемот на работа и видовите на работни активности се исти и на едните и на другите, па зошто обвинителите во СЈО да имаат плата на ниво на јавен обвинител од Вишо Јавно обвинителство. Со ваквото решение многу извесно е дека ќе се створи револт кај обвинителите од основното јавно обвинителство заради нееднаквиот третман“, пишува во образложението на еден од амандманите.
Во образложението на 14 амандман пишува дека амандманот се предлага бидејќи со предложениот членот за надзор над работата на СЈО за кој е надлежен државниот јавен обвинител директно се повредува принципот на хиерархија и субординација.
„Не е јасно зошто има потреба од вакво законско потенцирање дека кај СЈО надзорот не смее да загрозува автономијата на СЈО, а такво нешто не е предвидено кај другите обвинителства. Опстојување на вакво законско решение ќе создаде раздор и несигурност помеѓу самите обвинители без оглед на кое обвинителство припаѓаат, особено ако се има предвид дека условите за избор на обвинители се исти за сите обвинители“, пишува во образложението.
Во амандманот 20 пишува дека со постојниот предлог-закон се испреплетени надлежностите на СЈО и на Основното јавно обвинителство за гонење кривични дела на организираниот криминал и корупцијата. И двете обвинителства се надлежни за кривичното дело перење пари и други приноси од казнено дело од членот 273 од Кривичниот законик.
ВМРО-ДПМНЕ предлага државниот јавен обвинител да биде на предлог на најголемата опозициска партија во државата.
На дуелот меѓу премиерот Заев и претседателот на ВМРО-ДПМНЕ Христијан Мицкоски на Канал 5 телевизија, Заев рече дека „секој амандман што не крие заштита на криминалот е прифатлив за нив“.
Викендов продолжуваат преговорите меѓу претставниците на ВМРО-ДПМНЕ и работната група од Министерството за правда за амандманите во Законот за јавно обвинителство. Во досегашните преговори немаше поголеми поместувања во однос на позициите на двете страни.
Со новиот Закон за Јавно обвинителство треба да се регулира статусот на Специјалното јавно обвинителство во рамки на редовното обвинителство и е еден од условите за почеток на преговорите за членство во ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски во дводневна посета на Лондон на Самитот за Западен Балкан

Претседателот на Владата, Христијан Мицкоски, заедно со владина делегација ќе присуствува на Самитот за Западен Балкан, кој оваа година се одржува во Лондон, Велика Британија.
Од Владата соопштија дека Мицкоски, заедно со вицепремиерот Александар Николоски, министерот за надворешни работи и надворешна трговија, Тимчо Муцунски, министерката за финансии Гордана Кочоска Димитриеска, како и министерот за евроинтеграција Орхан Муртезани ќе учествуваат на голем број состаноци во состав на Берлинскиот процес.
„На маргините на самитот, а и во рамки на посетата на Обединетото Кралство, предвидени се голем број на билатерални средби, за што навремено ќе ја информираме јавноста. При посетата на Обединетото Кралство, владината делегација ќе оствари повеќе економски работни средби кои ќе преставуваат економски исчекор за меѓусебната соработка“, велат од Владата.
Македонија
Мојсоска: 3.000 гласа вредни како 30.000, нашата борба можеби е тешка, но е праведна

Скоро 3.000 гласа вредни како 30.000, со овие зборови Јована Мојсоска, актуелен пратеник и кандидатка за градоначалник на Струга, им се заблагодари на своите сограѓани за поддршката на локалните избори. Во објава на социјалните мрежи, Мојсоска порача дека секој глас добиен за Левица е „чист како солза“, без поткуп, уцени или закани, туку даден од искрена желба за подобро утре.
„Мои стружани и стружанки, фала ви од срце за секој глас и поддршка, секој наш глас е чист како солза, без поткуп, уцени и закани – туку од искрена желба за промена и подобро утре. Тие чесни луѓе кои го ставаат јавниот пред личниот интерес се хероите на нашето време! Позитивниот прием кој го осетив изминатиов месец е само показател дека стружани имаат желба за промена и дека нашата борба допрва претстои“, истакнува Мојсоска.
Таа најави дека заедно со советникот Климе Карамитре ќе се борат за интересите на сите граѓани, со цел да се спречат, како што вели „лукративните пазари на бизнис партиите“.
Особено ја радуваат, додава, резултатите во градот, каде што на шест избирачки места, во училиштата „Ибрахим Темо“ и „Јосип Броз Тито“, Левица освоила прво место по број на гласови.
„Ме радуват и драстично зголемениот раст на поддршката во Подгорци, Октиси и Лабуништа – што покажвит дека времето на Левица во Струга допрва доаѓа“, додава таа.
Мојсоска завршува со порака: „Фала ви од срце убај луѓе – нашата борба можеби е тешка, но е праведна!“.
Македонија
Најголема победа во првиот круг има Јане Мицевски во Сопиште со освоени 80,2% од гласовите, вети нов резервоар за вода

Кандидатот за градоначалник на Сопиште од ВМРО-ДПМНЕ, Јане Мицевски, извојува најголема победа во првиот круг на овие локални избори со освоени 80,2% од гласовите на жителите со право на глас. Од запишаните 5.483 гласачи во оваа општина, на гласање излегоа 2.937 жители, а за него гласаа 2.524.
Тој на жителите на Сопиште им вети нов резервоар за вода, како еден од посериозните проекти на кои ќе работи во претстојниот мандат покрај многуте проекти за подобрување на инфраструктурата, спортот, образованието, безбедноста, транспортот и културата на кои рече дека активно ќе работи.
Мицевски на овие избори доби втор мандат од жителите на Сопиште. Тој и досега беше градоначалник на Сопиште. И во 2021 година во првиот круг беше избран за градоначалник со освоени 67,96% од гласовите кога за него гласаа 2.161 жител на општината.
Зад Мицевски со освоени 79,73% од гласовите е победата на Александар Георгиевски од ВМРО-ДПМНЕ во Илинден, кој исто така на овие избори доби втор мандат од граѓаните. Од вкупно запишани 14.908 гласачи, на гласање излегоа 7.746, а за него гласаа 6.386 граѓани.
И на претходните избори во 2021 година кога го доби првиот градоначалнички мандат, Георгиевски беше избран во првиот круг со освоени 54,75% од гласовите кога за него гласаа 4..861 жител на Илинден.
Меѓу тројцата градоначалници кои извојуваа најголема победа во првиот круг на овие избори е и Борче Митевски од ВМРО-ДПМНЕ, кој во Петровец доби петти мандат со освоени 77,43% или 3.493гласа. Во оваа општина се запишани 8.144 избирачи, а на гласање излегоа 4.410.
Убедлива победа има и Иван Јорданов од ВМРО-ДПМНЕ во Штип со освоени 76,74% од гласовите со што доби втор, последователен мандат.
Со 74% од гласовите победа во прв круг и втор мандат освои и Славе Андонов од ВМРО-ДПМНЕ во Василево.
Со убедлива победа трет мандат на овие избори освои Митко Јанчев кој доби 73,89% од гласовите, следуваат Марко Колев со освоени 73,34% од гласовите во Велес, Тодорче Николовски во Кратово со 73,2%, Киро Нацков во Градско со 71,92% од гласовите, Ристо Манчев во Босилово со 70,12 % од гласовите, а останатите градоначалници добија поддршка помала од 70% од гласовите.
Процентуално најголема поддршка вчера доби кандидатот на Алијанса за Албанците во Врапчиште, Исен Шабани. Тој според податоците од Државната изборна комисија доби 88,13 % од гласовите, но гласањето мора да се повтори поради мал одѕив на изборите На гласање излегле 24,41% од запишаните граѓани со право глас место една третина колку што пропишува Изборниот законик.
Во првиот круг избрани се градоначалници во 43 општини,а во останатите, како и во Град Скопје градоначалник ќе се бира во втор круг, на втори ноември.