Македонија
Претседателот на Собранието Талат Џафери, добитник на титулата Doctor Honoris Causa во Тирана

Денеска во Тирана, претседателот на Собранието, Талат Џафери, присуствуваше на одбележувањето на „Златната годишнина“ на Универзитетскиот колеџ „Ќириази“ на покана на претседателот и ректорот на Универзитетскиот колеџ а по одлуката на нивниот Академски сенат да му ја додели нему највисоката титула на овој универзитет, односно титулата Doctor Honoris Causa.
На одбележувањето присуствуваа истакнати лица од академскиот свет. Оваа титула, како што стои во образложението на одлуката, се доделува на претседателот Џафери за „неговиот особен придонес во официјализирањето на албанскиот јазик, за слободата и правата на Албанците во Северна Македонија, за мудроста и високите интелектуални и државотворни вредности во заштита на националниот идентитет, за неговите душевни врски со иконите на националното образование, Севасти и Параскеви Ќириази и Кристи Дако, кои се историско наследство и продолжение на универзитетскиот колеџ „Ќириази“.
„Ова е посебна емоција, посебна чест да целиот живот се круниса со ваква награда, вакво признание како што е денешново од Универзитетскиот колеџ ‘Ќириази’. Тоа е признание за цела една плејада луѓе кои посветено настојувале да го сочуваат, да го издигнат и надградат нашиот статус, било политички, било општествен, во деловите каде што живееме надвор од просторот на Република Албанија и несомнено дека оваа награда, првенствено се посветува на сите тие мои сопатници со кои заедно сме делувале за да стигнеме таму каде што сме денес, за да можеме да продолжиме понатака кон предизвиците што стојат пред нас“, рече Џафери.
Во рамките на одбележувањето се одржа и историски симпозиум во чест на 131-годишнината од основањето на Институтот „Ќириази“ во Корша и 100-годишнината од повторното отворање во Тирана.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре ќе се одржат внатрепартиските избори за Претседател на СДСМ

Утре ќе се одржат директните внатрепартиски избори за Претседател на СДСМ кои беа одложени поради трагедијата во Кочани.
„Социјалдемократскиот сојуз на Македонија е единствена партија којашто Претседателот го избира на непосредни, внатрепартиски избори.
Изборите ќе се спроведат во општинските организации на СДСМ ширум републиката, на 78 избирачки места, кои на денот на гласањето ќе бидат отворени од 08 до 20 часот.
Централната изборна комисија го потврди и го затвори Избирачкиот список, на кој активно регистрирани се 23.712 членови, обезбеден е избирачки материјал, паравани за тајност на гласањето, избирачки кутии, ознаки и се што е потребно за изборниот ден.
Сите активно регистрирани членови на СДСМ ќе можат да го остварат своето право на непосредно и тајно гласање за избор на Претседател во својата општина на соодветно гласачко место.
Членовите што гласаат, со себе задолжително треба да ја има електронската членска картичка на СДСМ и важечки личен документ за идентификација (лична карта или пасош).
Гласањето на болни и немоќни е овозможено, еден ден порано, односно во сабота на 05.04.2025 година.
Сите детални информации, одлуки, правилници, роковници и останати документи поврзани со внатрепартиските избори за претседател на СДСМ се достапни на веб страната на СДСМ или директно на следниот линк:
Надлежна за спроведување на гласањето е Централна изборна комисија.
Информација за резултатот ќе го соопштиме во недела по завршување на процесот на гласањето“, стои во соопштението на СДСМ.
Македонија
Министерство за здравство: 69 пациенти се на лекување во странство и нема промена во нивната состојба

Министерството за здравство информира дека во моментов 69 пациенти се на лекување во странство и нема промена во нивната состојба, во споредба со претходните денови.
Непроменета е и состојбата на пациентите во критична состојба.
Во установите во Скопје се лекуваат 15 пациенти и тоа:
– Во Хируршка клиника „Св Наум Охридски“ – 6,
– На Клиника за пластична хирургија – 4 пациенти пристигнати синоќа од странство,
– На Клиника за токсикологија има двајца пациенти (еден од претходно кој е префрлен од Хируршка клиника ,,Св. Наум Охридски” и еден кој ноќеска е дојден од Шпанија) и еден пациент е хоспитализиран на Клиника за пулмологија.
– Во Систина се лекуваат двајца пациенти.
Сите пациенти кои се третираат во нашите установи се во стабилна состојба, известија од Министерството за здравство.
Македонија
(Видео) Спасовски: Градоначалникот на Крива Паланка лажеше дека има цијанид 100-тици пати над дозволеното

Градоначалникот на Крива Паланка лажеше дека во водата во Крива Паланка има цијанид 100-тици пати над дозволеното, за да шири паника и манипулира пред избори, кажа денеска на прес-конференција Емил Спасовски, пратеник на ВМРО-ДПМНЕ.
„Сашко Митовски свесно ги лажеше граѓаните и на Крива Паланка и на целата држава дека загадувањето на водата во Крива Паланка со цијанид е 100-тици пати над дозволеното. Анализите кои ги објави Државниот инспекторат за животна средина го покажуваат спротивното и го демаскираат трулиот обид на Митовски да манипулира. Мизерно е како Митовски не се колебаше да манипулира со најчувстителната тема за граѓаните – безбедноста на водите и почвата, само за да шири паника и ќари некој ситен политички поен пред избори“, рече Спасовски.
Пратеникот го повика Јавното обвинителство да поднесе кривична пријава против Митовски, за ширење паника.
„Дејствијата на Митовски се дотолку поголеми што тој е носител на јавна функција, која во дел од јавноста може да создаде краткотраен привид дека тој ја говори вистината, и со тоа да предизвика огромен страв. ЈО треба да ги земе во предвид овие околности, но и стварниот ефект предизвикан од паниката која ја рашири Сашко Митовски и да поднесе кривична пријава против него“, истакна Спасовски.