Македонската сцена се простува од водителот, шоумен, пејач, композитор Драган Вучиќ, по неговата смрт на Инфективната клиника како последница на коронавирусот. Многумина познати личности споделуваат фотографии, но и моменти кои ги поминале заедно со него. Меѓу нив, актери, писатели, пејачи, композитори, соработници, колеги, поддржувачи. Сите со неверување ја примиле веста за смртта на Вучиќ.

„Го сретнав, не знам каде… Му реков: – Тој сутлијачот што го рекламираш во емисијата е навистина убав, редовно го купувам. – Навистина ти се допаѓа? -Да, му одговорив. Следниот ден ме побара и ме праша за адресата, му ја кажав. Дојде и ми донесе цел пакет од сутлијачот.„Повели” ми рече со насмевка. Таков човек беше Драган Вучиќ. Почивај во мир!“, напиша актерот Драган Спасов-Дац.

„Кога еден автор си заминува, дел од него останува и живее вечно… преку неговите песни. Почивај во мир голем човеку и нека ти е светол патот. Ми беше чест да познавам некој толку позитивен и легендарен како тебе. Сочувство до семејството“, напиша пејачката Сара Костадиновска.

Откако дознав за неговата состојба и дека е хоспитализиран минатиот вторник, без размислување му пишав СМС за поддршка и побрзо закрепнување. Ми врати едноставно во негов стил „Ти си ми едно големо срце“. Е па денес тоа срце е тажно. Загубивме еден голем човек, пред сè татко, дедо, музичар, шоумен, професионалец и дефинитивно еден од најхаризматичните ликови во нашата земја и на естрадата. Ми беше чест што те познавав. Длабоко сочувство до фамилијата и блиските. До следно наше гледање пријателе. Легендите живеат вечно“, пишува Владимир Блажев од групата „ДНК“

„Многумина пробуваа да те омаловажат, но тоа го правеа луѓе кои не те познаваа. Беше и ќе останеш медиумски маг, човек пред времето, секој телевизиски производ повеќе од успешен, музичар од којшто многумина научија нешто. Како во музиката, така и во телевизијата беше неприкосновен. Зар треба ова да се случи за да сфатиме што сме имале? Зар е тешко да се почитува некој? Ако за еден уметник зборуваат делата, за тебе ќе се зборува уште долго. Нека ова нè поттикне да бидеме подобри и да го почитуваме она нашето. И ние овде имаме луѓе кои мораме да ги почитуваме додека се меѓу нас“, пишува пејачката Елена Велевска.

„Догледање Име. Ми свири ‘Липе цвату’ во моментов и сфаќам дека без твојата тамбура тоа немаше да биде тоа“, објави писателот Драган Таневски.

„Почивај во мир, Драгане. Ти остави силна трага зад себе, за сите. Сочувство до семејството“, напиша пејачот и композитор Александар Митески.

„Лесна ти земја пријателе. Баш ми е жал. Сочувство до семејството“, напиша Бранко Огњановски.

„Почивај во мир Драган. Беше еден и единствен“, напиша пејачката Тамара Тодевска.

„Почивај во мир чичко Драган“, напиша пејачката Каролина Гочева.

Вучиќ беше композитор на бројни хитови како „Свирете ја Зајди Зајди“, „Ангели ме носат“, „Кажи ѕвездо“ а во 2005ж ја компонираше песната „Make My Day“ со која неговиот син, Мартин Вучиќ, ја претставуваше Македонија на Евровизија. Во 90-тите беше пејач на поп-фолк групата „Кода“. Познат е во јавноста и по бројните емисии и квизови како „Вашите пет минути“, „Среќни луѓе“, „Возење со Вучиќ“ и други.

Последен негов проект е „Гурмански муабети“, емисија која се снимаше низ повеќе земји на Балканот со познати пејачи, актери, артисти.

Драган Вучиќ почина на 65-годишна возраст.