Македонија
Радев и Јотова спроведуваат екстремна политика на негирање кон Македонците – Николоски пред Советот на Европа

Во извештајот е правилно напишано дека за да се спротивставиме на овие предизвици за основните вредности што Советот на Европа има за цел да ги поддржува, извештајот повикува на зајакнато придржување кон основните вредности. Ова вклучува зајакнување на законодавството за спротивставување на екстремно десничарскиот екстремизам, подобрување на образованието и медиумската писменост и борба против онлајн радикализацијата, истакна Александар Николоски, потпретседател на ВМРО-ДПМНЕ во Советот на Европа.
Посочи дека во Нацрт-резолуцијата се нагласува дека политичарите и политичките партии треба да бидат во првите редови и да одговорат на крајниот десничарски екстремизам, како во јавната одбрана на човековите права и демократските принципи, така и во недвосмисленото отфрлање на сите форми на расизам и нетолеранција, тоа е нешто што мора да го направиме овде.
„Крајно десничарската идеологија можеме да ја најдеме во многу земји-членки на Советот на Европа.
Сакам да го потенцирам примерот на Бугарија, каде претседателот на државата Румен Радев и потпретседателката Јотова спроведуваат крајно десничарско екстремистичка политика. Радев и Јотова го користат членството на Бугарија во ЕУ за да и наметнат вето на Македонија, барајќи од Македонците да ја променат историјата, јазикот и културата за да започнат преговори за пристапување.
Истовремено, тие не им даваат никакви човекови права на Македонците кои живеат во Бугарија, лишувајќи ги од правото на самоопределување, употреба на мајчин јазик и право на образование и здружување. Во последните месеци тие отидоа чекор понатаму барајќи од Македонците во Албанија да го сменат идентитетот од Македонци во Бугари. Во Албанија никогаш немало Бугари и со векови живеат Македонци. Но, Бугарија ја уценува Албанија со нејзиниот напредок кон ЕУ барајќи од нив да им наметнат нов идентитет на своите граѓани. Ќе се согласите дека ова не се европски вредности. Ова е крајно десничарски екстремизам и идеологија што се случува во 21 век. И затоа треба да се бориме“, нагласува Николоски во својот говор.
Тие, како што вели, ги користат сите средства за да најдат ваков идентитет таму каде што не можат да најдат.
„На граѓаните им нудат пасоши кои се и ЕУ пасоши само за да се изјаснат поинаку од тоа што се. Тие го злоупотребуваат своето членство во ЕУ за да го променат националниот идентитет. Затоа барам ЕУ да ја преиспита својата политика кон Бугарија и да не дозволи злоупотреба на нивното право на државјанство и пасоши за политички цели и промена на националниот идентитет.
Така Бугарија го продолжува овој пример на национална асимилација. Го уценуваат Македонецот, ставаат вето и ја запираат Македонија да стартува преговори за членство со ЕУ, исто така не ги почитуваат човековите права на Македонците во Бугарија и не ги спроведуваат пресудите на Европскиот суд за човекови права и ја уценуваат Албанија обидувајќи се да најде идентитет што не постои.
Нема да успеат. Но, ова е најдобар пример за крајно десничарска идеологија, и затоа го поддржувам овој извештај кој треба да даде насоки во борбата против овој крајно десничарски екстремизам и крајно десничарска идеологија“, порача потпретседателот на ВМРО-ДПМНЕ во Советот на Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Костова: Бројот на работници во индустријата намален за 2,6 процента, лоши политики на Мицкоски и ДПМНЕ

Во кругот фабрики во Штип, пред само неколку дена ѝ беше ставен клуч на уште една фабрика, чии работници останаа без плата, без здравствено и пензиско осигурување, без социјална безбедност.
Со Мицкоски и ДПМНЕ, фабричките погони се празнат и затвораат, работниците остануваат на улица, вели Кристина Костова, потпретседателкта на СДСМ.
„Индустриското производство паѓа, а за една година бројот на работници во индустријата е намален за 2,6 проценти. Ова е резултатот на лошите економски политики на Владата на Мицкоски и ДПМНЕ. Со овој податок јасно се потврдува дека и индустријата е во лоша состојба. Најсилен удар има во преработувачката индустрија, пад од 2,7 проценти, во рударството пад од 1,7, во енергетиката пад од 0,6. Странските инвестиции се преполовени за само една година.
Од јануари до август падот на бројноста изнесува 3,8 проценти“.
Овој пад, според неа е директен резултат на лошите економски политики на Владата на Христијан Мицкоски и ДПМНЕ.
Оценува дека без план за индустријата, без предвидливост и без сериозна поддршка за инвестициите и индустријата, економијата и натаму ќе биде во ризик.
Но, ова, според неа, не е единствен проблем во економијата.
„Нема реално зголемување на платите. На хартија нешто се менува, ама во паричникот ништо. Инфлацијата го јаде секој денар, стандардот паѓа, кошницата поскапува, а Владата не убедува дека сме биле четврта или шеста економија во Европа. Нема контрола на цените. Основните продукти се недостапни за илјадници семејства, маржите не се контролирани, инспекциите молчат. Економијата стагнира. Падот кај капиталните производи е 7,1 процент, што значи стопирани инвестиции и одложени набавки на машини. Тоа е јасен знак дека индустријата нема доверба во насоката на Владата. Енергетската политика е хаотична. Сметките за струја останаа високи, договорите непредвидливи, компаниите ја губат конкурентноста. Во вакви услови нема нови работни места, има само отпуштања“.
Како што вели таа аминистрацијата е партизирана, процедурите се бавни, повратот на ДДВ касни, извозниците чекаат. Кога државата кочи, економијата не може да оди напред.
Порача дека ова е владин неуспех.
СДСМ, подвлече таа, бара веднаш, план за стабилизирање на индустријата и стандардот. „Итни мерки за предвидливи енергетски договори за индустријата, зајакната контрола на цените во основната кошница, реален социјален дијалог за плати што ќе ја победат инфлацијата, деблокада на капиталните инвестиции и партнерство со извозниците“.
Македонија
Муцунски – Странд: посочена важноста од поголема динамика во процесот на интеграцијата на земјите од регионот во ЕУ

Денеска министерот за надворешни работи и надворешна трговија, Тимчо Муцунски, оствари средба со Јоаким Странд, министер за европски прашања и државно сопствеништво на Финска, кој престојува во работна посета на земјава.
Разговорите беа посветени на актуелните европски и регионални прашања, со посебен акцент на политиката на проширување на Европската унија и перспективите во пристапниот процес. Министерот Муцунски ја реафирмираше цврстата посветеност за забрзување на евроинтегративниот процес со цел полноправно членство во ЕУ, во согласност со воспоставените критериуми и стандарди. Тој истакна дека државата останува доследен и кредибилен партнер на ЕУ, кој континуирано работи на спроведување на реформите и активно придонесува кон регионалната стабилност и соработка.
Муцунски посочи и на важноста од поголема предвидливост и динамика во процесот на интеграција на земјите од регионот во ЕУ, изразувајќи благодарност за континуираната и принципиелна поддршка од страна на Финска.
Двајцата министри разговараа и за билатералните односи, потврдувајќи ја заедничката заложба за нивно натамошно продлабочување и унапредување на соработката во сите области од заемен интерес.
Македонија
Набавени 80.000 вакцини против сезонски грип – имунизацијата ќе почне во втората половина на месецот

Министерството за здравство информира дека е потпишан договор за набавка на 80.000 вакцини против сезонски грип.
Во текот на следната недела се очекува да пристигнат вакцините, по што традиционално, имунизацијата против грип ќе почне во втората половина на месецов, соопштуваат од министерството.
„Годинава се набавени најголем број вакцини за оваа намена досега. Станува збор за четиривалентна вакцина од реномираниот производител Абот од Холандија.
Со бесплатната вакцинација се опфатени ризичните групи население, како што се: повозрасни лица над 65 години, лица со хронични заболувања, здравствени работници, бремени жени, деца на возраст од 6 месеци до 5 години, како и лица сместени во установи за социјална заштита на стари лица и вработените во установи за социјална заштита на стари лица.
Вакцинацијата против сезонски грип е најефикасна мерка за превенција на грип, која спречува појава на потешки форми и компликации, особено кај ризичните групи“.