Македонија
Рашковски реагира за начинот на кој се изведуваа комуникациите меѓу него и другите обвинети

Ексгенералниот секретар на Владата, Драги Рашковски, реагираше на начинот на кој се изведуваа комуникациите меѓу него и другите обвинети, за кои обвинителката Ивана Трајчева кажа дека се од апликацијата „Вибер“. Тој побара да се види патеката на ворд фајлот од каде се читаа пораките, за да се утврди каде е зачуван. Посочи дека со тоа ќе се утврди автентичноста. На ова реагираше обвинителката Ивана Трајчева, која рече дека пораките се презентираат од извештај направен од Истражниот центар на Обвинителството за гонење организиран криминал и корупција од каде се издвоени пораките кои се докази од приватната комуникација.
„Може да ме казните, ама морам да го кажам тоа што мислам. Сакам обвинителката да го отвори ворд документот кој беше презентиран. Сакам да стои во записник дека кога одите на file-save as-“, а реагираше Трајчева: „Судија!“, а Рашковски додаде: „Нема судија, одете! Ве молам да се утврди дека комуникацијата не произлегува од рапортот кој е презентиран. Ве молам да го отвориме УСБ-стикот, бидејќи ако изведуваме треба да биде од УСБ-стик. Молам обвинителството да стави УСБ-стик во компјутерот. Јас можам да ја потсетам на многу работи обвинителката од 2009 година. Каде се тие два УСБ-стика? Барам да асе изведат овие два стика, да се стават во компјутерот на Обвинителството. Сме ги барале пет пати, не ги даваат. Барам ворд документот, во ‘пропертис’ и да видиме кога документот е креиран. Да видиме кој го креирал документот. Да видиме која е автентичноста на тој документ и барам ‘ворд’ документот каде што има слика, да видиме како е дојдена таму, дали е импортирана, како произлегува, дали од телефонот или од друго место. Кога тоа ќе го направиме може да збориме за изведување докази. Во спротивно, ова е приказна.. Јас знам многу убаво како пишувала обвинителката во 2009 година“, рече Рашковски.
По ова, Трајчева потенцираше дека се презентира извештај со пораки разменети помеѓу обвинетите, кои Обвинителството сметало дека се докази.
„Јас и на почетокот кажав дека е извештај, кажав за кои докази се однесува, а кажав и дека се изведува извештај од Истражниот центар на Обвинителството. Ова од причина што во уредот има комуникации коишто воопшто не се однесуваат на предметниот настан, има приватни комуникации. Па со оглед откако е прегледана целата содржина која е екстрахирани од уредите што ги наведов, Обвинителството има направено од тоа што обвинителството сметала дека е доказ. Ова е извештај, за да не се повреди приватноста“, објасни Трајчева.
Инаку, на денешното рочиште се презентираат комуникации за кои обвинителката Ивана Трајчева кажа дека се екстрахирани од телефоните одземени од обвинетите, меѓу кои е и Драги Рашковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Борко Ристовски треба да си поднесе оставка за резил олимпијада и за хаосот во спортот

Македонија беше понижена, посрамотена и претставена како земја од 19-от век пред очите на меѓународната спортска јавност и тој резил со Младинската олимпијада е најголемиот дебакл во поновата спортска историја на државата, велат од СДСМ.
„Не е само катастрофалната организација, катастрофални се и резултатите на македонските спортски федерации, кои го одразуваат општото пропаѓање на спортот со оваа Влада и Ристовски како министер.
И додека најгордата Влада немала пари за соодветно сместување, вода, превоз, храна, клима-уреди и достоинствени услови за олимпијците имала за ПР и маркетинг!
Вработени во ПР-компанијата „ИДЕА Лаб“, чиј сопственик е близок до ВМРО-ДПМНЕ, добиле бизниси поврзани со олимпијадата, од маркетинг до менаџмент на социјални медиуми.
Значи има пари за ПР ама нема за основни услови за спортистите. Срамно и бедно.
Човекот кој пред неколку месеци ја убедуваше јавноста дека ќе организира „најдобра Младинска олимпијада во светот“ не може да побегне од одговорноста.
И не е само резил олимпијадата. ВМРО-ДПМНЕ и Борко Ристовски го деградираа и целосно го запоставија македонскиот спортот.
Намелена е поддршка на спортот на историски најниско ниво. Наместо 15 милиони евра субвенции, со ребаланост на буџетот поддршката се намали на само 6,7 милиони евра – најмалку досега.
Секој клуб, секоја федерација, секој спортист добива 40% помалку директна поддршка.
И сè уште нема отчет како се распределуваат тие пари.
Борко Ристовски е министер кој стана капитен на распадот во македонскиот спорт.
На Ристовски му стана поважна министерската фотелја отколку принципите по кои некогаш настапувал. Денес не ги поддржува спортистите, туку ги брани интересите на своите партиски шефови.
Бараме неотповиклива оставка од Борко Ристовски – веднаш!
Не само поради скандалот со Младинската олимпијада, туку и поради системското уназадување на македонскиот спорт. Одговорност мора да има!“, стои во соопштението на СДСМ.
Македонија
ВМРО-ДПМНЕ: Меѓусебната заштита на Коцевски со СДС и ДУИ е причина за 2% доверба во судството

СДС ги штитат корумпираните обвинители и судии бидејќи им овозможуваат закрила на нивните функционери, велат од ВМРО-ДПМНЕ.
„Клиентелизмот на Коцевски е гаранција за заштита и неказнивост на функционерите од СДС и ДУИ.
Поддршката што Коцевски ја доби од Филипче е меѓусебна заштита која ја гуши правдата во државата. Бидејќи доколку падне Коцевски, ќе се отворат врати за истраги како против Филипче така и за останатите функционери од СДС и ДУИ.
СДС со негласањето на интерпелацијата целосно се разголи, и на виделина пред јавноста излезе спрегата помеѓу СДС, ДУИ и Коцевски.
Очигледно е дека СДС и ДУИ стојат зад заштитата на Коцевски, кој за возврат не презема ништо за наводните злоупотреби и сомнежи за висоока корупција како и сомнителни тендери поврзани со Филипче, Заев и Ахмети.
Со одбивањето да ја поддржат интерпелацијата, СДС и ДУИ јасно покажаа кој го поставал Коцевски и кој го одржува на функцијата, јавниот обвинител Коцевски.
Се додека Коцевски е на позицијата, довербата во правосудството ќе биде помала од 2%, а одговорност за криминалите поврзани со СДС и ДУИ нема да има.
Доколку постои грам морална одговорност кај Коцевски, треба да ја препознае пораката од јавноста и да си поднесе оставка.
На Македонија и се неопходни темелни реформи во судството, правосудство растеретено од политички влијанија каде судиите и обвинителите ќе носат одлука врз основа на законите и Уставот а не под влијание на партиските интереси на СДС и ДУИ.
Во Македонија неопходно е правдата да завладее, неопходни се коренити реформи и трансформација на судскиот систем“, пишува во соопштението на ВМРО-ДПМНЕ.
Македонија
Времето денеска сончево со мала до умерена облачност, попладне локален пороен дожд и грмежи

Времето денеска ќе биде сончево со мала до умерена локална облачност.
Ќе дува слаб до умерен ветер претежно од југоисточен правец.
Попладне ќе има изолиран развој на нестабилна облачност со локален пороен дожд и грмежи.
Минималните температури ќе се движат од 12 до 20, а максималните од 26 до 36 степени целзиусови.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе биде 17, а максималната дневна ќе достигне 36 степени.