Реакцијата на Град Скопје ја пренесуваме интегрално:

„Градот Скопје остро реагира на грешните наводи изнесени во текстот со наслов „Шилегов на здружението на својот шеф на Кабинет му додели 180 илјади денари“ објавен на вашиот медиум. Во комуникацијата што ја имавме со новинарот автор на текстот јасно беа наведени сите постапки и процедури по кои на најтранспарентен начин беа доделени средства за проекти на здруженијата кои ги исполнуваа критериумите. Беше наведено дека вработени во Град Скопје не се членови на „Плоштад Слобода“, а посочениот веќе неколку години не е претседател на здружението. Со оглед на тоа што, статусот на основач на здружение на граѓани не може да се повлече или поништи, тоа не може да биде критериум за оценување на сопственоста на здружението. „Плоштад Слобода“ има раководни органи каде што Никола Наумоски нема никакво влијание.

За потсетување, Градот Скопје минатата година за првпат на најтранспарентен начин, преку медиумите го објави јавниот повик за доделување средства за финансирање програми и проекти од областа на културата од интерес на Град Скопје, нешто што не беше пракса претходно.

Во овој повик беа објавени и критериумите за бодување на проектите по кои ќе работат стручните комисии. Проектите кои ги наведувате во вашата статија ги задоволуваат сите критериуми за избор заради што имаат и високи оцени од конкурсните комисии. Станува збор за квалитетно изработени долгогодишни проекти, препознатливи во јавноста, преку кои недвосмислено се остварува локалниот интерес во културата. Оттука при носењето на одлуката за доделување средства за овие проекти не постои ниту конфликт на интереси, ниту каква било друга основа за злоупотреба.

Со цел поголема транспарентност и отчетност, доставувајќи ја во прилог листата на поддржани проекти Град Скопје и годинава ја продолжи праксата воведена лани за објавување на резултатите од Конкурсот за финансирање на манифестации, проекти и творештво  на  други корисници и чинители преку кои се остварува локалниот интерес во културата за 2019 година.

На конкурсот пристигнаа 411 комплетни апликации кои беа оценети од 6 стручни комисии, составени од претставници на Град Скопје и претставници од културните институции на Градот. Тие водејќи се според критериумите и насоките наведени во објавата на конкурсот, донеле одлука да се поддржат 231 предлог-проекти, односно 56% од пристигнатите пријави. За овој конкурс, Град Скопје издвои 16 милиони денари, при што годинава посебен акцент беше ставен на поддршката на младинските и на студентските проекти“.