Европската унија и Брисел внимателно го следат проблемот со блокадата на граничнот премин „Евзони“ од страна на грчките земјоделци, а евроамбасадорот Самуел Жбогар очекува дека во најскоро време ќе следи реакција и обид за негово трајно решавање.

Жбогар за овој проблем разговарал и со градоначалникот Иван Франгов, при денешната посета на Општина Гевгелија, кој неодамна и преку писмо испрати барање за посредување и помош од ЕУ за деблокирање на границата, затоа што штетите на двете страни се огромни.

„Имам сознание дека двете влади се обидуваат да најдат начини како да го олеснат овој проблем со пренасочување на сообраќајот преку Дојран и Битола. Исто така добив информација дека добра кои се со ограничен рок на траење ќе биде дозволено да се пренесат преку овој граничен премин. ЕУ и Брисел внимателно го следат овој проблем и очекувам дека во најскоро време ќе следи реакција и обид за трајно решавање на овој проблем“, рече Жбогар одговарајќи на новинарско прашање при посетата на Гевгелија.

Прашан за политичката ситуација во земјата, евроамбасадорот само кратко одговори дека е оптимист, дека ќе се реши политичката криза во земјата и дека наскоро ќе се соберат потребните 61 потпис за формирање на влада во Македонија./крај/со/бб