Македонија
Рекордери во тендери за 2018 – секој месец по 2 милиони евра од државата
Градежни фирми, фирми за медицинска опрема и лекови и добропознатата „Пуцко Петрол“ за нафтени деривати се на врвот на листата на компании кои годинава добивале тендери од државата.
Анализата на „Макфакс“ покажува дека непобледива е фирмата „Пуцко Петрол“ во сопственост на семејството на градоначалникот на Пласница, Исмаил Јахоски, која годинава заработила дури 28 милиони евра од тендери, или во просек по 2.3 милиони евра месечно. Ова е за 12 милиони евра повеќе од 2017 година, кога Пуцко Петрол добил 16 милиони евра само од државни тендери.
На листата на фирми со добиени највисоки суми од тендери се и „Алкалоид Конс“, акционерското друштво за лекови и медицинска опрема „Д-р Пановски“, а од градежните претпријатија „Жикол“ Струмица и „Пелистер“ Битола.
„Макфакс“ ги собираше податоците користејќи ја алатката на агрегаторот Тиме.мк, каде што се објавени систематизирани податоци од електронскиот систем за јавни набавки, со можност за попрецизно пребарување.
Јавни претпријатија, министерства, општини, болници, училишта, судови се само дел од органите во државата кои „Пуцко Петрол“ ги снабдува со нафта и нафтени деривати. Над 240 тендери има добиено оваа компанија во последнава година, односно само околу 100 дена во годината „Пуцко Петрол“ не добива тендер.
Исмаил Јахоски, кој до 2014 беше сопственик на „Пуцко Петрол“, пред да ја преземе неговиот син Асмир, од 1996 година е градоначалник на Пласница. Во последниве две децении тој не бил градоначалник само во мандатот од 2004 до 2009 година, а потоа продолжува да ја води општината.
„Пуцко Петрол“ ја основа во 1993 година и фирмата располага со повеќе бензински пумпи и се занимава со промет на нафтени деривати, градежни материјали и други дејности.
Зависно од изборната година Јахоски бил кандидат од СДСМ или од ДУИ.
Во декември лани Министерството за одбрана го раскина договорот со „Пуцко петрол“ за снабдување со мазут поради немање лиценца за трговија со мазут. Случајот го открија медиумите, а дури потоа следуваше реакцијата на Министерството за одбрана за раскинување на договорот. Тогаш Регулаторната комисија за енергетика објави дека „Пуцко петрол“ без лиценца за мазут снабдувал и други државни институции, но одговорност за случајот немаше.
Фирмата Д-р Пановски, која е во сопственост на Златко Пановски, татко на директорката на Клиниката за хематологија Ирина Пановска Ставридис, е исто така на врвот на листата по добиени тендери годинава, односно во просек, месечно добива по околу милион евра. Министерството за здравство, Агенцијата за лекови, голем број клиники и здравствени установи склучуваат договори за набавки на лекови од оваа веледрогерија.
Пановска Ставридис лани во септември до Антикорупциската комисија поднесе изјава за нејзино изземање од сите постапки за јавни набавки каде како потенцијален понудувач може да се јави веледрогеријата на нејзиниот татко, а комисијата со писмено известување му укажа на менаџментот на клиниката, за вакви случаи да овласти друго лице за спроведување на јавните набавки. Сепак, отворено останува дали Пановска како директор не може да влијае при изборот за најповолен понудувач да се избира токму семејната фирма. Во медиумите се отвори случајот кога токму Клиниката со која раководи Пановска, доби тендер од фирмата на нејзиниот татко во вредност од над 2 милиони евра. Откако случајот беше обелоденет во јавноста, Клиниката демантираше дека директорката имала било каква поврзаност, бидејќи таа не одлучувала за тендерот, а постапката била спроведена транспарентно и без никакви привилегирања.
„Жикол“, пак, е фирма на Никола Пандев, поранешен советник од ВМРО-ДПМНЕ во општина Струмица и неговиот татко Живко Пандев. Пандев го напушти советничкото место во општината откако беше утврден конфликт на интереси во однос на двете позиции што тој ги држеше.
Градежното претпријатие „Пелистер“ на Силјан Муцевски, пак, годинава има добиено само два тендери, но на високи суми, што го става на врвот на листата. Осум милиони евра чинат двата тендери на АД ЕЛЕМ за ископ на јаглен и јаловина во РЕК Битола, кои ги добива оваа компанија.
АД ЕЛЕМ е на врвот на листата како нарачател на тендери – само годинава биле распишани јавни огласи за сума од над 40 милиони евра. Веднаш за АД ЕЛЕМ е ЈП претпријатие за државни патишта, а потоа следува ЕВН.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: ВМРО-ДПМНЕ ќе го истреби криминалот и за истиот ќе има одговорност, затоа ни треба поддршката од граѓаните на 8 мај за број 2
Многу е важно да се земе активно учество во овие избори. Резултатот во првиот круг беше би рекол историски. Владата е делегитимирана и треба да оди во опозиција и СДСМ и ДУИ, рече лидерот на ВМРО-ДПМНЕ, Христијан Мицкоски на денешниот митинг во Неготино.
Мицкоски посочи дека СДСМ денес се претвори во обичен измеќар на ДУИ, затоа ова што им се случува не е случајност.
„ДУИ и СДСМ мора да одат во опозиција. Мора да престане праксата ДУИ ќе биде малку со ВМРО-ДПМНЕ, па со СДСМ. ДУИ сака да го понижи македонскиот народ и да ја клекне на колена Македонија. Ми пречи криминалот на ДУИ. Тие повеќе од 20 години крадат од сите вас. Тие повеќе од 20 години ја урнисуваат Македонија. СДСМ мислеа дека противник им е ВМРО-ДПМНЕ, а не гледаа што прават од ДУИ“, кажа Мицкоски.
Затоа, додаде Мицкоски, сакам да предупредам за нешто за што имам информации дека се случува.
„Банди од ДУИ обиколуваат граѓани. Ќе се обидат да го купат гласот, ќе се обидат ДУИ да има пратеник во изборните единици 3 и 4. Секој бандит кој ќе нуди пари, практично ви нуди ваши пари, украдени од вас. Предупредувам да не биде дека не сум кажал. Мои браќа и сестри се сите граѓани, но нема простор за криминалците. Тие знаат што ги чека. Јас нема да правам пакт со криминалот, туку ќе го истребам. Мора да има одговорност за криминалот“, вели Мицкоски.
Мицкоски посочи дека ќе тропне на секоја порта.
„Македонија е држава на лојални граѓани без разлика на етничка припадност. Ќе побараме поддршка, ќе замолиме, ќе предупредиме дека ова се клучни избори. Секој човек ќе го убедам дека секој мора да излезе да ставиме крај на ова уништување на државата“, кажа Мицкоски.
Мицкоски укажа дека ова е момент да се обединиме.
„Ги повикувам сите, поддржувачи на СДСМ, оние кои останаа дома, сите да излеземе против оваа власт. Вашата доверба нема да ја изневериме потребна е поддршка за Македонија“, рече Мицкоски.
Македонија
Мицкоски сфати каде е тежината на албанскиот глас, вели Таравари
Ккандидатот за претседател од коалицијата „Вреди“, Арбен Таравари, вели дека е добро што ВМРО-ДПМНЕ ја сфатила, како што посочува, тежината на гласот и на пратениците Албанци.
Во напишаното на социјалните мрежи Таравари истакнува дека сега ќе се фокусираат на изборите, а после 8 мај при формирање на новата влада ќе се водат од националниот интерес на Албанците, од итната потреба да се исчисти власта од корупција и од нивната непреговарачка прозападна ориентација.
„Предлогот на Мицкоски покажува дека и ВМРО сфати каде е тежината на гласот и на пратениците Албанци.
Но, нашиот фокус како коалиција и како партија е работата за изборите на 8 мај, за најголем број мандати.
По изборите ќе се водиме од националниот интерес на Албанците, од итната потреба да се исчисти власта од корупција и од нашата непреговарачка прозападна ориентација“, порачува Таравари.
Ние како „ВЛЕН“, додава тој, сме пообединети од кога било. „Нашиот глас е мнозинство од гласовите на Албанците. Нашите мандати одат кај пратениците Албанци. Бидејќи ние го штитиме напредокот на Албанците, не ги продаваме и не ги купуваме“’, дециден е Таравари.
Македонија
(Видео) Пендаровски: За бојкот тие нека му ја мислат, во Крушево дојдов за да ви кажам дека и тука и во цела Македонија ќе победиме
Кандидатот за претседател Стево Пендаровски денеска ја продолжи кампањата со средба со жителите на Крушево.
„Борбата почнува од нула, како да немало прв круг“, рече Пендаровски пред крушевчани негирајќи ги обвинувањата на опозицијата дека ќе го бојкотира вториот круг од претседателските избори.
„Дали е логично да дојдам јас во Крушево, ако мислам да бојкотирам? Јас мислам со сите вас да победам! Кој сака нека бојкотира, ниту сум бојкотирал 2014-та, ниту 2019-та, ниту 2016-та, ниту оваа 2024-та нема да бојкотирам. Тие нека му ја мислат за крајниот резултат. Ние сите го знаеме и наместо бојкот ние ќе прославуваме’, истакна Пендаровски денеска во Крушево.