Македонија
Ристовски: Катица Јанева и Фатиме Фетаи продолжуваат да прават циркуз од себе

Специјалните обвинителки Катица Јанева и Фатиме Фетаи со своето непознавање на правото и недоличното однесување се срам за целокупниот правосуден систем во Република Македонија, сметаат од ВМРО-ДПМНЕ.
„Правната инфериорност и немањето докази доведоа до нова хистерична епизода на Јанева и Фетаи во која специјалните обвинителки наместо да го водат случајот решија да го блокираат. Ваквото недолично однесување и непочит на Јанева и Фетаи и конечно СЈО кон Судот во Република Македонија е уште едно парче во мозаикот во кој се добива целата слика на Специјалното јавно обвинителство“, рече Спиро Ристовски од ВМРО-ДПМНЕ.
Тој појасни дека заканите преку лични навреди до судијата на Јанева, Фетаи и СЈО се идентични како и заканите на Зоран Заев кој на сите судии кои не судат по негова волја им вети дека ќе бидат сменети ако тој дојде на власт.
„Уште еднаш целата правна фела беше засрамена од непознавањето на законите и процедурите од страна на Јанева и Фетаи. Ова не е ништо ново имајќи предвид дека истите луѓе покажувајќи нула правна логика, етика, морал и интегритет го ослободија Зоран Верушевски и по вторпат го аболицираа Зоран Заев. Исто така, СЈО не процесуира ниту еден случај против член на СДСМ и служи за заплашување на сите кои му стојат на патот на Заев или се двоумат во извршувањето на неговите антидржавни и криминални наредби. СЈО не се бори против криминалот, туку се бори исклучиво против ВМРО-ДПМНЕ рамо до рамо со аболицираниот криминалец Зоран Заев“, додаде Ристовски.
Прес-конференцијата на Ристовски доаѓа по денешното рочиште за настаните во Општина Центар во 2013 година, во која осомничен е лидерот на оваа партија Никола Груевски, каде обвинителките неколкупати ја обвинија судијката дека го крши законот, а за тоа беа казнети со по 2.000 евра заради непочитување на судот./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.