Македонија
Роднини на осудените во „Монструм“ не знаат ништо за денешната најава, тие ќе протестираат идниот петок

Еден од роднините на осудените за случајот „Монструм“ Бедри Ајдари, кој е и организатор на протестите кои требаше да се случат денеска, вели дека се работи за недоразбирање и дека овој настан ќе се одржи идниот петок, на 2 април.
Тој вели дека зад денешната најава не стои никој од роднините на осудените и доколку имало некој обид за организирање протести не е поврзан со нив.
„Не знам како се случило ова недоразбирање или дезинформирање. За денеска немаме најавено протести ниту во МВР, ниту, пак, сум известен дека некој од роднините на осудените за ‘Монструм’, повикува на протести. Нашиот настан е закажан за идниот петок , а за деталите и маршутата на движењето на присутните, дополнително ќе ја информираме јавноста“, изјави Ајдари за „Макфакс“.
Инаку, на минатите протести полицискиот кордон кој беше распореден кај „Мавровка“ не дозволи протестниот марш, кој почна од Чаир, да заврши пред кривичниот суд и Владата, по што протестите ескалираа и демонстрантите насилно со фрлање предмети кон полицајците се обидоа да го пробијат. Се фрлаа камења, бекатон-плочки, пластични шишиња, канти за отпадоци кон полицискиот кордон, којшто сепак успеа да го спречи движењето на демонстрантите кон кривичниот суд. Полицијата на крајот возврати со шок-бомби и успеа да ги потисне демонстрантите кон Бит-пазар. Епилогот од протестите за пресудата за „Монструм’ беше осум приведени лица кои учествуваа во насилствата и седум повредени полицајци, а беа нападнати и новинарски екипи, при што двајца новинари беа повредени.
Протестите ги најавија роднините на првостепено осудените во случајот, кои се жалат дека тие се невини и осудени без докази. Со првостепената пресуда која Основниот кривичен суд во Скопје ја изрече на 23 февруари, на доживотен затвор за тероризам беа осудени Алил Демири, Африм и Агим Исмаиловиќ, Хаки Азири на 9, а Фејзи Азири на 15 години за помагање. Сами Љута доби ослободителна пресуда откако Обвинителството се откажа од негово гонење поради немање докази за вмешаност во петкратното убиство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вреди“: Формирана заедничка работна група меѓу Македонија и Косово за изградба на патот Тетово-Призрен

Формирана е заедничка работна група меѓу Северна Македонија и Косово за стратешкиот проект за изградба на патот Тетово-Призрен, информираат од „Вреди“.
Ова, како што велат е проект кој со години, според нив, бил сон за граѓаните, а сега со конкретни чекори го претвораат во реалност.
„Со формирањето на оваа група започнуваме нова фаза на дејствување и посветеност. Преку овој проект ќе поврземе два историски града и ќе го олесниме движењето на граѓаните. Дел од оваа работна група од коалицијата „Вреди“ е и заменик-министерката за Транспорт, Калтрина Зеколи Шаќири, која ќе ги надгледува сите потребни процедури, со цел овој проект да започне што поскоро и да оди напред со незапирливо темпо. Ние сме за промени, не за ветувања, туку за конкретни резултати. Затоа што граѓаните заслужуваат проекти кои директно влијаат на нивните животи, а овој пат е еден од најважните“.
Имињата на членовите на групата, според соопштеното, се веќе избрани од двете страни. Во иднина се очекуваат блиска координација и брзи чекори кон фазата на дизајнирање и потоа имплементација на терен.
Буџетот, соопшти „Вреди“ за фазата на проектирање на тунелот е веќе распределен во годишниот буџет на нашата држава, што, како што оценуваат, гарантира финансиска стабилност и волја овој проект да се заврши до крај.
Патот Тетово-Призрен ќе стане реалност, прецизираат од коалицијата.
Македонија
ДУИ до Мицкоски: Ако целта е уривање на Охридскиот договор, која е алтернативата

Премиерот Мицкоски, со своето однесување, изјави и постапки, постапува на начин кој ги поткопува стандардите и одговорноста што се очекуваат од еден државен лидер, реагираат од ДУИ.
„Однесување што можеби би му се толерирало на претседател на партиска општинска организација, но никако на премиер на мултиетничка држава.
Тој урива сè што е градено со труд и посветеност со години – меѓуетничките односи, довербата меѓу граѓаните, лојалноста и чувството на заедништво во оваа држава.
Со напаѓање на клучните столбови на Охридскиот мировен договор – јазикот, балансерот, правичната застапеност, легитимитетот и Инспекторатот за употреба на јазиците – тој го доведува во прашање унитарниот и интегративен карактер на државата“, велат од ДУИ.
Прашуваат, ако целта е уривање на Охридскиот договор – која е алтернативата?
„Зашто во политиката нема вакуум. Ако толку жестоко се спротивставувате на договорот што донесе мир, интеграција, децентрализација и зачувување на унитарноста, тогаш мора отворено да кажете што нудите на негово место“.
Граѓаните, додаваат од ДУИ прашуваат, и сè повеќе се загрижени.
„Ако има намерна промена на државниот курс, тогаш време е за отворена и искрена дебата за тоа која е алтернативата на Охридскиот договор.
Бидејќи ние не можеме бесконечно да ја носиме одговорноста за неговата неодговорност“, посочуваат во реакцијата од партијата на Ахмети.
Македонија
Левица: И таткото на Тошковски бил дел од бизнисот со мито за инвалидски пензии

Додека се обидува да изгради слика дека го руши корумпираниот систем, фактите кои се обзнануваат во јавност укажуваат како и фамилијата Тошковски била дел од овој систем. Имено, токму таткото на министерот на МВР во 2013 година бил осуден за измама на 8 лица заради примање мито при посредување за инвалидски пензии, обвини партијата Левица.
Според партијата таткото на Тошковски бил осуден на две години условна казна, затоа што од оштетените лица противправно наплатил речиси 25.000 евра, ветувајќи им дека ќе стекнат право на инвалидска пензија.
„Односно, таткото на Тошковски безобзирно манипулирал со поединци кои очигледно во незавидна положба, биле принудени да плаќаат огромни суми за да се изборат против аномалиите на системот. Бидејќи министерот Тошковски и за време на претходната влада на Груевски бил дел од институциите на системот (преку министерството на Миле Јанакиевски), очигледно тоа што бил дел од власта било доволно за неговиот татко да прави матни зделки со инвалидските пензии. Дополнително, потсетуваме дека Тошковски уште нема одговор за скандалот со апсењето на обезбедувањето на премиерот Мицкоски, односно нема никаква информација во јавноста кое е второто лице кое е уапсено. Ако се има во предвид дека лицето кое го обезбедувало Мицкоски било дел од Шестата управа, истото не можело да располага информации за криминални истраги. Тошковски упорно одбива да даде одговор од каде обезбедувањето на Мицкоски имало информации за криминални истраги и од кој ги добил тие информации“, велат од Левица.
Селективниот пристап на Тошковски и за огромната трагедија во Кочани, каде ниту еден актуелен началник од полицијата не е дел од истрагата, велат од Левица, претставува кулминација на ужасното владеење на новата влада.
„Наместо системски реформи – сведочиме како власта ги одбива сите добри законски решенија на Левица; наместо апсење на поранешниот премиер Зоран Заев – сведочиме како премиерот Мицкоски веќе не го ни спомнува неговот име; наместо меритократија и департизација – сведочиме како сестрата на премиерот и баџанакот на Тошковски стануваат универзитетски професори. Нема промена на корумпираниот систем со партии кои 35 години го граделе токму тој систем“, се наведува во соопштението.