За да ја зголеми безбедноста, „Специјал“ го намалил рокот на траење на крофните поделени на учениците од ООУ „Димитар Миладинов“ од пет, на три дена, извести денес директорката на училиштето Маја Ангелова. Родители на деца од ова училиште се пожалија дека принцес крофната поделена вчера како ужинка била кисела и со рок на траење до денес. Датум на производство на крофните нема. Директорката Ангелова до „Макфакс“ испрати реакција со известувања од „Специјал“ и од Советот на родители.

„ Во однос на настаната ситуација со десертот принцес крофна  кој беше доставен на 15.02.2019 би сакале да ве известиме дека одговорно стоиме позади квалитетот на истиот бидејќи реалниот рок на производот е 5 дена, а од наша страна намален е рокот со цел да се зголеми безбедноста на истиот, односно производот е произведен на 14.02.2019 година со рок на траење до 16.02.2019 – 3 дена. Веднаш по забелешката за квалитетот на производот беше известен нашиот оддел за контрола на квалитет и беше констатирано дека производот е во рок на траење со добар квалитет и структура. Од испорачаната шаржа во нашиот оддел за контрола на квалитет има сочувано примерок кој сугерира и аргументира исправен производ. Дополнително беше извршена следливост согласно HACCP и ISO  протоколите и не беше констатиран техничко- технолошки пропуст или неусогласеност на производот“, стои во известувањето потпишано од „Специјал“.

Советот на родители, како што стои во реакцијата од директорката, известува дека до нив не стигнала никаква поплака или жалба за храната која била послужена вчера.

Родителите најавија дека случајот ќе го пријават во Агенцијата за храна и ветеринарство.