Македонија
Рустеми: Јанева бараше да се утврди штетата во „Поштенска банка“ и да се затвори истрагата

Обвинителот Бурим Рустеми од поранешното СЈО сведочеше денеска пред судот за случајот „Рекет“ каде обвинети се Бојан Јовановски и ексшефицата на СЈО Катица Јанева. Рустеми го водеше случајот „Поштенска банка“, а на прашање на обвинителката Гордана Смаќоска за патните исправи, тој се сети дека на сугестија на шефицата Јанева дал позитивно мислење да му биде вратен пасошот на Томе Главчев, кој дал гаранција од милион евра во машини за шиење кошули.
Тој пред судот изјави дека се посомневал во олеснителните предлози на неговата тогашна шефица кога обвинителката од СЈО Лиле Стефанова му рекла дека дознала дека еден од становите кој бил замрзнат како имот во постапката, треба да го земе поранешниот директор на МЕПСО Сашо Василевски.
„Во истрагата не ми се мешаше Катица Јанева. Но, по начелното правно мислење од Врховниот суд настана хаос. Тоа предизвика удар врз предметите на СЈО, меѓу кои беше и ‘Поштенска банка’. На состанок кај Катица Јанева, таа предложи да се утврди штетата во ‘Поштенска банка’ и да се затвори истрагата. Ова мене ме збуни. Во април 2019 година на колегиум Катица Јанева го повтори својот предлог, со наредба штета да се пресмета во ‘Поштенска’ и во ‘Империја’, без предлози за затворски казни. Ни го кажа тоа и го заврши состанокот”, рече Рустеми пред судот.
Тој, како што рече, не ја послушал Јанева и предложил ублажени затворски казни за предметот, адекватни на признание на вина со спогодба.
За случајот „Поштенска банка“ замрзнати беа имотите на двајца осомничени, Главчев и Димитровски.
За случајот „Рекет“ треба да сведочат и апелациската судијка Мери Дика – Георгиевска, водителката Лила Филиповска и шефицата на кабинетот на Јанева, Сања Димовска.
Судењето продолжува утре.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Царина се пофали дека наплатиле 190,4 милиони евра, велат ќе се трошат за училишта, градинки, болници…

Царинската управа во текот на изминатиот месец наплати приходи во износ од 11,7 милијарди денари или 190,4 милиони евра, што е за 7,3 проценти односно 12,88 милиони евра повеќе од истиот месец минатата година. Притоа приходите од данок на моторни возила се зголемени за 20,5 проценти, од царина за 14,1 процент, а од акцизи за 16,3 проценти.
Како што информира денеска Царинската управа, вкупно од почетокот на годинава, за четири месеци се наплатени 41,2 милијарди денари или 670,27 милиони евра, што е за 26,5 милиони евра повеќе од лани истиот период.
Директорот Бобан Николовски вели дека овие средства значат повеќе инвестиции за капитални проекти, за училишта, градинки, болници, патишта, повисоки плати и пензии, за поконкурентна економија. Ваквите резултати, како што потенцира, се должат на зголемени контроли и зголемена тимска работа и делување на ниво на институција, а не на поединци.
– Царинската управа ќе продолжи да делува во насока на зачувување на финансиските интереси и стабилност на финансискиот систем преку поголема ефикасност на институционалните капацитети во наплатата на приходи, подобрување на услугите и сузбивање на криминалот и корупцијата, се наведува во соопштението.
Македонија
Мицкоски за делото на Делчев: Македонија е изградена од саможртвата на хероите кои ги дадоа своите животи за нашата слобода

Премиерот Христијан Мицкоски утрово преку својот фејсбук профил изрази почит по повод 122 години од смртта на македонскиот револуционер Гоце Делчев.
Како што наведува Мицкоски, Македонија е изградена од саможртвата на хероите кои ги дадоа своите животи за нашата слобода, а славата и делото на Гоце Делчев продолжуваат да живеат.
-Македонија не е само држава, туку и наша судбина, и мора да биде наша иднина. Таа е изградена од саможртвата на хероите кои се дадоа за нашата слобода. Еден од најцврстите карпи на тоа народно дело е Гоце Делчев чиј живот херојски згасна пред 122 години, а неговата слава и дело продолжува да биде живо.
Длабок поклон за великанот. Слава му, пишува премиерот Мицкоски.
Македонија
АХВ казни 14 месарници кои продавале небезбедно месо

Казни во вредност од 8.350 евра во денарска противвредност изрекоа инспекциските служби на Агенција за храна и ветеринарство (АХВ) на 14 месарници за утврдени недоследности во работењето, во рамки на спроведените 73 вонредни инспекциски контроли.
Надзорите, како што информира АХВ, биле реализирани на 30 април годинава на целата територија на државата, а како небезбедни се уништени 323 килограми храна.
-Со спроведените контроли на месарниците издадени се 23 решенија за отстранување на утврдени недоследности. Тројца оператори ставале во промет небезбедна храна, кај седум се утврдени недостатоци во поглед на спроведувањето на правилата на добра производстевна и хигиенска пракса, а четири месарници немале спроведено задолжителен санитарен преглед на вработените, наведува АХВ.
Неправилности во поглед на означувањето на призводите се утврдени кај три месраници, а кај исто толкав број е утврдено и дека не биле регистрирани како оператори со храна во АХВ