Македонија
Сведоштво на татко: Син ми беше нападат во Капиштец од деца додека играше кошарка, деликвентите ѝ се познати на полицијата
Малолетно момче било нападнато во паркот „Капиштец“ во неделата додека играло кошарка.
За случајот информира таткото на момчето, музичарот Петар Младеновски, познат како Пеце Суперхикс, преку социјалните мрежи, кој вели дека нападот врз неговиот син го извршиле четири малолетни лица на возраст од 12 до 16 години.
Раскажува дека син му добил шлаканици и клоци без никаква причина, а се обиделе и да му го украдат баскетот.
Полицијата му кажала на таткото дека станува збор за малолетни деликвенти, сторители на десетици дела, а се штитеници од Домот за деца без родители „11 Октомври“ и тие не може кривично да одговараат за сторените дела, ниту да бидат приведени.
„Добивме повик од синот дека е нападнат и веднаш се упатив кон местото на случката, но таму јас не успеав да ги затекнам. Трчајќи во правец на катната гаража кај ‘Беверли Хилс,’ тие беа препознаени од син ми и успеав некако да фатам и да задржам еден од нив по што мирно и спокојно дојдоа и другите по што повикавме полиција. Немаа никаков проблем да останат и да не избегаат (хм…) Морам да признам дека полицијата (станица Беко, двајца од интервентната и подоцна тројца во униформа) бргу реагира и се појавија на местото каде што бевме. Е, тука следува изненадувањето!
Од полицајците добивме инфо дека ова се веќе познати малолетни деликвенти и сторители на десетици дела, но дека тие се штитеници од Домот за деца без родители (од она што подоцна го дознав, деца со девијантно и проблематично однесување), за кои, искрен да бидам, првпат слушам иако живеам на неполни 700 м од куќата „25 Мај“, која се наоѓа на улицата Елисие Поповски, во близина на „Водњанска“, и дека тие никако не може кривично да одговараат за сторените дела, ниту да бидат приведени.
Имено, тие се дел од некаков, ајде да го наречам „дом-куќа-семејство“, и живеат шестмина во објектот (од вработените дознавам дека сите се проблематични и дека вакви дела се вршат катадневно на територијата на општина Центар и пошироко) и според мој впечаток, буквално се ОСТАВЕНИ САМИ НА СЕБЕ да се движат каде што сакаат и да прават што сакаат. Исто така, дознавам дека имаат и официјално назначени старатели, ама тие се во Штип, Битола итн. итн. и не знам на кој начин и зошто овие лица им се старатели на овие деца. Едноставно, ништо не разбирам и ова е несфатливо.
Мојот син има последици од настанот и трауми што ќе ги влече подолго време. Но, ние ќе продолжиме со пријава на делото во полиција и со прибирање на сите извештаи од лекари, психијатри итн. (иако е веќе дадена и изјавата, ама реакција нема никаква, за жал, барем за сега) и со преземање сите можни дејства за расчистување на случајот и некаква реакција овие малолетнички банди, кои очигледно оперираат подолго време низ Центар, да се стават под некаква контрола бидејќи ова ќе им се случува и на другите од соседството и нема тука да запре. Едноставно, овие деца ама НИКОЈ НЕ ГИ КОНТРОЛИРА. Не знам каков живот ги чека, искрено, ама ова не е во ред и е тажно и за нив.
Стапено е во контакт и со директорката на Домот, добив повик и од кабинетот на министерката Јована Тренчевска, која верувам и лично ќе се заинтересира за случајот и за оваа не баш пријатна состојба и самата ќе се запознае со случајот и ќе реагира. Би сакал со случајот да бидат запознаени (бидејќи ова веќе станува опасно, Капиштец станува Бронкс, а важеше за една од најмирните населби некогаш) Општина Центар и Горан Герасимовски.
Очекуваме помош и од полицијата и од сите што се надлежни да постапат по ова. Не се чувствуваме безбедни во сопствената населба и во паркот „Капиштец“. Ова не е прв инцидент. Се намножија во текот на годините. Реакцијата е млака или ја нема воопшто.
Драги соседи, бидете внимателни и чувајте ги вашите деца, но и себе“, пишува таткото на социјалните мрежи.
„Макфакс“ испрати прашања до МВР дали случајот бил пријавен, од каде што очекуваме одговор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Арсовски од ЗНАМ: Ќе го департизираме секторот безбедност и ќе го решиме статусот на професионалните војници
Носителот на кандидатската листа за пратеници за ИЕ 3 од Движењето ЗНАМ – За наша Македонија, Павле Арсоски денеска одржа прес конференција на која зборуваше за мерките од нивната програма за паралментарните избори, „Проглас за достоинствена Македонија“, а кои се однесуваат на безбедносните и разузнувачки служби.
Арсоски нагласи дека ЗНАМ е политичка опција која во изминативе месеци ја бранува јавноста, го предизвикува интересот и раѓа нова надеж кај граѓаните на Македонија.
„Тоа се потврди и со бројот на гласови кои ги доби нашиот кандидат за претседател, Максим Димитриевски во првиот круг од претседателските избори. Всушност, над 83 илјади граѓани кои се одважија да ни ја дадат довербата се доказ дека сме на прав пат,тие се наш ветер во грб и им благодариме на сите. Нема да ги изневериме“, рече тој.
Арсоски додаде дека од ЗНАМ се цврсто решени да направат вонредни напори за стабилизиација на државата, за развој на економијата, запирање на иселувањето на младите. Но пред се, цврсто се решени да покажат поинаков начин на практикување на власт, на вистинска служба на народот, да работат посветено и одговорно, чесно и домаќински.
„Со работа, ред и поредок да ја вратиме вербата на граѓаните во институциите на системот, да ја вратиме надежта во подобар живот и подобра иднина на генерациите што доаѓаат. Да го вратиме вистинскиот патриотизам и љубов кон татковината“.
Арсоски рече дека му е чест како на генерал во пензија со големо искуство и како носител на листата во ИЕ-3, да се задржи на безбедносните и разузнувачки служби, како дел од програмата „Проглас за достоинствена Македонија“. Ова, како што рече тој, поради тоа што нема просперитет на една нација и држава, нема инвестиции и економски развој без мир и стабилност и продолжи: „Во „Прогласот за достоинствена Македонија“ јасно ги посочуваме аномалиите во безбедносниот и одбранбен сектор и ги наведуваме нашите решенија за истите. Ние од ЗНАМ имаме намера да воведеме целосна професионализација и департизација на сите безбедносни, разузнувачки и контраразузнувачки служби и нивно фокусирање исклучиво на мисиите и задачите за кои се формирани, во служба на безбедноста и стабилноста на државата. Недозволиво е униформата и струката да се исклучат од одлучувањето за кариерен развој на војниците и полицајите, за нивното вработување, школување и усовршување, за учество во операции надвор од државата и секакво друго одлучување од делот на службата, а сето тоа наместо нив да го преземат партиските носители на политички функции“.
Тој додаде дека во Програмата се предвидени мерки за подобрување на условите за работа и стандардот на вработените во Армијата и Полицијата, инвестирање во модернизација на нивната опрема.
„Во постојана комуникација со војниците и старешините од АРМ, со синдикатите во одбраната и особено со синдикатот на професионални војници во „Прогласот за достоинствена Македонија“ предвидовме конечно и трајно, системски и со закон, решавање на статусот на професионалните војници, кои се веројатно единствената категорија на вработени во државниот сектор уредена со Закон, со статус на определено време во текот на целата кариера. Нашата намера, како крајна цел е, тие да имаат статус и права како и останатите вработени во Армијата, затоа што на војниците им е доста од игнорирањете на нивниот статус, а особено се несериозни ад-хок ветувањата кои ги слушаат деновиве. Власта на СДСМ и ДУИ имаше долги 7 години да го реши овој проблем и не го стори тоа. Ние од ЗНАМ ќе го решиме ова прашање“, потенцира Арсоски. Арсоски ги повика граѓаните во среда, на 8-ми мај, што помасовно да излезат на избори и да ја потврдат поддршката со заокружување на бројот 7 и Движењето ЗНАМ-За наша Македонија, по онаа што му ја дадоа на кандидатот за претседател од движењето ЗНАМ – За наша Македонија, Максим Димитриевски.
Македонија
ДСЗИ ќе забрани на Токсикологија да работат лица со истечени договори оти директорката, која не зборува македонски, не им ги одзела пристапите
Организациската директорка на Клиниката за токсикологија Бесија Иљази, не постапила и не ја потпишала опомената од Државниот санитарен и здравстве инспекторат (ДСЗИ) која од неа бара да им ги одземе пристапите на единаесетмина, чии договори за ангажирање истекле со истекот на 2023 година, но и покрај тоа доаѓаат на работа и се евидентираат во електронскиот систем. Бидејќи не ја почитувала опомената, директорката Иљази сега ќе добие забрана за пристап на лица кои немаат договори за работа, а доколку не ја почитува ниту забраната, ќе следи парична казна.
„ДСЗИ изврши контролен инспекциски надзор на Клиниката за токсикологија по издадено решение за опомена со наложени инспекциски мерки. По истото беа должни во рок од три дена да испратат писмено известување дали е постапено по решението, но такво писмено известување не добивме. Со оглед на фактот дека на самиот надзор присуствуваа двајцата директори, медицинскиот и организацискиот, беше доставена документација во однос на листи од електронска евиденција на работно време и контрола на пристап во просториите. Од документите ДСЗИ констатираше дека под точка 1 и 2 од решението издадено за опомена не се постапува, односно здравствените работници и соработници кои што немаат договор за вработување односно договорот им истекол на 31.12.2023 година, истите се евидентираат и понатаму на Клиниката за токсикологија, што значи не е постапено по решението“, вели директорката на Државниот санитарен и здравствен инспекторат, рената Младеновска.
При контролниот увид на инспекторите им биле дадени документи кои покажуваат дека опомената со известување кои мерки треба да се преземат ја потпишал медицинскиот, но не и организациската директорка. ДСЗИ ги известил двајцата директори дека треба да им се одземат токените за идентификација и електронско евидентирање на работното време на лицата со истечени договори.
Директорката Младеновска денес извести дека од организациската директорка на Токсикологија добиле образложение зошто не потпишала. На вториот состанок со Иљази, исто како и на првиот се разбирале со преведувач оти таа не зборува македонски јазик.
„Таа има дадено изјава дека, во известувањето, од клиниката се бара да се одземат токените. Таа смета дека тоа не е мерка која е предложена од решението на ДСЗИ и побара да се вметне и тоа како мерка во самото решение за опомена па потоа да го потпише“, рече директорката Младеновска.
ДСЗИ ќе донесе уште едно решение за Клиниката за токсикологија во кое ќе забрани пристап на здравствени работници и соработници кои немаат никаков договор за вработување.
При контролниот надзор инспекторите констатирале дека клиниката единствено постапила по барањето да се свика Управниот одбор за да одлучува за актите во кои имаат заедничка надлежност медицинскиот и оргнизацискиот директор.
Клиниката за токсикологија веќе цел месец ја тресе скандалот со лицата ,кои и покрај тоа што немаат договори, доаѓаат на работа, многумина од лекарите јавно се пожалија дека немаат комуникација со организациската директорка, а мината недела, пак, пукна цевка за парно, направи поплава и се отвори нов скандал околу осигурувањето на клиниката.
Скопје
Нема да се наплаќа паркирањето во Центар за време на Велигденските празници, извести ПОЦ
Паркирањето во oпштина Центар за време на Велигденските празници ќе биде без наплата за сите граѓани. На 03.05.(петок), 05.05. (недела) и 06.05.2024 година (понеделник) граѓаните ќе можат да паркираат без надомест на сите паркиралишта со кои стопанисува ЈП Паркинзи на Општина Центар, извести ПОЦ.
Согласно програмата за неработни денови за 2024 година на Министерството за труд и социјална политика, 04.05.2024 година (сабота) е работен ден и следствено на тоа паркиралиштата со кои стопанисува ЈП ПОЦ ќе работат со вообичаено работно време.
Депото на „Пајак“ службата на ЈП ПОЦ ќе работи 24/7 за време на празниците.
Редовната наплата за паркирање на паркиралиштата и издавање на договори во Дирекцијата на ЈП ПОЦ ќе продолжи на 07.05.2024 година (вторник) со вообичаено работно време, се додава во соопштението на ПОЦ.