Македонија
СДСМ: Бараме одговори, дали актуелните командири и началници од МВР се изземени од истрага?

„И по 24 часа од поставените легитимни прашања на СДСМ кон МВР и Јавното обвинителство, одговор нема. Ова е крајно загрижувачки, ако се земе предвид сериозноста на на трагедијата за која мора да има целосна одговорност на сите сегашни и минати функционери, службеници и политичари“, велат од СДСМ.
СДСМ е многу загрижена дека оваа истрага е селективна и води само кон минати функционери и службеници, а воопшто не кон оние кои биле на функции денот кога се случила трагедијата. Ова е правна небулоза и искрено сакаме да веруваме дека истрагата ќе ги опфати сите кои се одговорни не само оние кои се политички подобни за власта.
СДСМ уште еднаш најостро укажува: селективната правда не е никаква правда. Ако се штитат поединци блиски до власта, довербата на граѓаните ќе биде целосно урната, а чувството на неправда – уште подлабоко.
„Уште еднаш ги поставуваме клучните прашања. Овој пат се надеваме на одговор од институциите, МВР и Јавното обвинителство, не од Бране Петрушевски и ВМРО-ДПМНЕ. Дали е точно дека ниту еден од командирите, инспекторите и раководството на БЈБ и МВР во ОВР Кочани и СВР Штип – кои биле одговорни по закон да го обезбедат настанот – не се во притвор?
Дали и против кого од нив се води истрага? Ако не се води, како е можно да не се истражуваат лица кои вечерта биле на одговорни позиции со законска должност да постапат – но не го сториле тоа?
Дали е точно дека сите седум вработени во МВР кои се приведени, не биле на функции вечерта на трагедијата?
Уште еднаш јасно порачуваме, ако наместо институциите почнува да зборува партијата, тогаш уште повеќе се подгрева сомнежот за селективна правда и политички манипулации со случајот. Јасно му порачуваме на ВМРО-ДПМНЕ да не одговара во име на независните институции“, посочуваат од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.