Македонија
СДСМ ги објави кандидатите за градоначалници во Центар, Битола, Куманово, Струга и уште 13 општини

Генералниот секретар на СДСМ, Љупчо Николовски, попладнево соопшти уште 17 кандидати за градоначалници од СДСМ на претстојните локални избори.
Во Куманово кандидат за градоначалник е Оливер Илиевски, дипломиран економист, директор на „Водостопанство – Куманово“ и секретар на општинската организација на СДСМ.
„Во Куманово актуелниот градоначалник самиот отиде против себе и партијата и самиот се исклучи од партијата. СДСМ има еден кандидат за градоначалник на оваа општина, тоа е Оливер Илиевски“, рече секретарот Николовски.
Како општина во која имаат предност пред ВМРО-ДПМНЕ и очекуваат сигурна победа, Николовски ја кажа Општина Центар во која за кандидат за градоначалник е избран Горан Герасимовски, сегашен директор на Државниот завод за индустриска сопственост.
Во Ѓорче Петров можност за втор мандат ќе добие Александар Наумовски оти имал голем број реализирани проекти и бил најдобриот предлог со огромен учинок.
Кандидат на СДСМ во Битола, е Христо Кондовски, кого Николовски го претстави како еден од најпознатите стопанственици, успешен човек менаџер, со широка поддршка од повеќе политички субјекти надвор од коалицијата.
„Менџерското искуство ќе биде од корист за трасирање на патот за понатамошен развој на Битола. Води на сите анкети што ги направивме, а СДСМ во оваа општина има предност пред ВМРО во сите истражувања“, рече Николовски.
Соња Стаменкова, психолог, е кандидатка во Македонска Каменица, а во Шуто Оризари кандидат на СДСМ со голема предност е Асан Ферат, приватен стопанственик.
Нов кандидат за градоначалник во Кривогаштани е Николче Мисовски, инженер-агроном и стопанственик.
Кандидат за градоначалник на Струга е Димче Шипинкаровски, економист, кога Николовски го претстави како човек со 30-годишно искуство во приватниот сектор, но и раководител на подрачната служба на Фондот за здравство кој работел на проектот рецептите да им бидат достапни на пациентите во целиот месец, а не само во првите неколку дена.
Во Гевгелија за кандидат е утврден актуелниот градоначалник Сашко Поцков кој имал недвосмислена предност и со него Николовски смета дека СДСМ оди на сигурна победа.
Нов кандидат СДСМ има и во Дебарца, Игор Крцковски, правник, директор на комуналното претпријатие.
И во Чучер Сандево, општина во која Николовски вели дека победува СДСМ, има нов кандидат, Сашко Комненовиќ, криминалист.
Извршниот одбор едногласни му дал поддршка на актуелниот градоначалник на Македонски Брод, Живко Силјановски, оти бил домаќин човек и покажал како една општина се раздолжува и истовремено води сметка за потребите на граѓаните.
Во Долнени СДСМ го кандидира Аднан Џаферовски, поранешен директор на Агенцијата за заштита и спасување.
За градоначалник на Врапчиште е предложен Џеми Мамути, директор на приватна фирма.
Во Радовиш СДСМ оди со нов кандидат. Пратеникот Коле Чаракчиев, електроинженер, со работно искуство и во приватниот и во јавен сектор е кандидат за градоначалник на Радовиш каде што СДСМ има предност од осум проценти, според анкетите.
„Во мојот роден град Крива Паланка, бастион на социјалдемократијата, СДСМ има огромна предност и ќе сигурен победник во прв круг. Кандидат за градоначалник е Сашко Митовски, млад докажан менаџер во приватниот сектор, дипломиран економист“, рече секретарот Николовски.
Како бастион на социјалдемократијата Николовски ја претстави и Струмица.
„Во родната Струмица на нашиот лидер разликата е огромна и предноста на СДСМ е огромна. Кандидат за градоначалник е Костадин Костадинов, актуелен пратеник и портпарол на партијата. СДСМ победува во прв круг тука, нема друг кандидат како и во некои други општини“, рече секретарот Николовски.
Со кандидатот за Струмица, задно со оној за Кочани кој дополнително ќе биде соопштен, Николовски рече дека СДСМ има свои кандидати во 69 општини, а во останатите ќе ги поддржи коалициските партнери.
„Во останатите општини ќе ги поддржиме кандидатите на нашите коалициски партнери со кои договоривме заеднички настап и взаемна поддршка. Тоа се Гостивар, Дебар, Чаир, Сарај, Липково, Пласница, Боговиње, каде што СДСМ нема да истакне кандидати, но секако советнички листи ќе има во сите општини“, најави секретарот Николовски.
Овие кандидати биле утврдени на вчерашната седница на Извршниот одбор на партијата, а кандидатот за градоначалник на Кочани ќе биде соопштен утре.
СДСМ претходно, во два наврата, ги соопшти кандидатите за градоначалници во 51 општина и за Град Скопје. Предложените кандидати се избрани по теренски анализи и испитувања на јавното мислење и по спроведени истражувања внатре во партијата во консултација со 82 илјади членови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ не се Албанците, ДУИ е криминалната коалиција на злото, велат од ВМРО-ДПМНЕ

Бујар Османи продолжува со истата матрица, секоја критика за криминалот на ДУИ да ја претставува како „поттик на поделби“, велат од ВМРО-ДПМНЕ како реакција на изјавите на Бујар Османи од ДУИ.
Вистината, според владејачката партија е сосема спротивна.
„Поделбите и неправдите во државата настанаа токму поради СДСМ и ДУИ и нивната власт заради криминалните тендери, корупцијата и злоупотребата на институциите.
Бујар, Артан, Заев, Али и Филипче се коалиција на злото која ја жртвува Македонија за да ја ограбат државата и народот.
Кога ќе бидат фатени со рацете во медот, Османи и неговите колеги се кријат зад етнички теми. Но Албанците не се ДУИ, ниту пак ДУИ има право да зборува во нивно име“.
Албанците во Македонија, нагласуваат од ВМРО-ДПМНЕ се чесни граѓани кои сакаат ред, правда и развој, а тоа, како што велат е спротивно од она што го нудат Али, Артан, Бујар, Филипче и Заев.
„Затоа, колку и да се обидуваат да ја претворат борбата против криминалот во „етничко прашање“, тие добро знаат дека нема да успеат. Народот кажа јасно: криминалот не се исплати, а ДУИ и СДС се минато“.
Македонија
Марковски како кандидат за градоначалник на Скопје: Градот е во агонија

Граѓанската платформа „Независни заедно“ на денешниот промотивен настан и официјално ја објави кандидатурата на деканот на Градежниот факултет при Универзитетот „Св. Кирил и Методиј“, професор д-р Горан Марковски, за градоначалник на град Скопје на претстојните локални избори.
Промоцијата ја отвори Јана Белчева-Андреевска, кандидатка за советничка за Град Скопје, која истакна дека по години гледање како се нижат проблеми, се губат и запустуваат јавни простори и јавни објекти, како горат и исчезнуваат пред нашите очи објекти со вредност и значење, има шанса за промена.
„Скопје е во агонија. Потребна му е визија ослободена од корупција, култура наместо популизам, стандарди наместо импровизации. Оваа моја кандидатура е повик за заедничка борба за град што ќе им служи на граѓаните, а не на тесни интереси“, истакна Марковски.
Посочи дека Скопје денес се соочува со сериозни предизвици – загаденост, урбан хаос и изгубен идентитет – и нагласи дека потребни се нови решенија, кои ќе донесат надеж, особено за младите.
„Го почнувам овој пат од Камениот мост – симболот на поврзување и заедништво. Убеден сум дека со широка граѓанска поддршка можеме да изградиме град што ќе биде вистински европски дом, место со кое ќе се гордеат сите скопјани“, додаде тој.
Од „Независни заедно“ порачаа дека Марковски е личност со докажан професионален интегритет и долгогодишно искуство, кој зад себе има голем број реализирани проекти и генерации воспитани инженери. „Време е Скопје да го водат стручни лица со храбро лидерство и визија за поубав град по мерка на човекот“, велат од платформата.
Марковски истакна дека Скопје мора повторно да стане симбол на заедништво и поврзување, а вистинската промена може да се постигне единствено преку активни граѓани и независни личности, кои ќе изградат силни институции и здрава демократија.
„Независни заедно“ е широка граѓанска платформа, која ги обединува независните советници и локалните иницијативи од неколку скопски општини -„Шанса за Центар“, „Зелените за Гази Баба“ и „Групација 389“. Покрај град Скопје, платформата веќе објави дека цели на победа и во општина Центар, каде што ќе ја поддржи кандидатурата на истакнатата антикорупционерка Билјана Ивановска. „Независни заедно“ произлезе како одговор на разочараноста од традиционалните политички партии и има цел да ја врати локалната власт во рацете на граѓаните. Платформата ги повикува сите скопјани, поединци и групи, да се приклучат и заеднички да изградат нов модел на управување – чесен, стручен, транспарентен и посветен на јавниот интерес. „Само заедно можеме да му дадеме шанса на Скопје да стане град по мерка на човекот“, појаснуваат од платформата.
Македонија
Лефков до Апасиев: Димче не е тоа што беше, го расипаа кешот и квадратите деловен простор

И Димче не е тоа што беше. Разбирам дека вистината боли, па затоа Апасиев наместо да одговори на фактите – бега во навреди, напиша на социјалните мрежи пратеникот на ВМРО-ДПМНЕ, Миле Лефков, обраќајќи се до лидерот на Левица, Димитар Апасиев.
Суштината е јасна, додава Лефков.
„Не може да си политичар кој јавно е против ЕУ, кој секојдневно зборува дека ‘глобалистите и амбасадите’ ја корумпираат македонската политика, да држиш анти ЕУ став, а истовремено твојата најблиска фамилија да користи европски пари од Еразмус програмите.
Јас сум член на Комисијата за европски прашања и цел претходен мандат активно се спротивставував на злоупотребите на СДСМ и ДУИ со европските фондови. Ама сега ми е јасно зошто еден цел мандат додека Таљо преку Арбер ја злоупотребуваше комисијата Димче го немаше на ниту една комисија-во тоа време активно си користеле ЕУ финансии по дома!
Денес по веста за ЕУ финансирањето, со цел да ме омаловажи, самопрогласениот Енвер Хоџа на интернет подземјето, ја мобилизираше својата троловска армија со лаги и клевети. Но вистината е една – разобличен е до даска.
И нема лутење јавноста има право да праша:
– Кој му го среди станот по цена што обичен граѓанин никогаш не може да ја добие?
– Кој му ги плаќа одморите низ Европа додека глуми анти-ЕУ револуционер?
– Кој друг, освен тој и Артан Груби, успеа да добие дуќан по таква цена во центар“, прашува Лефков.
Такви двојни стандарди, како што оценува, не се политика, туку како што вели, тоа е лицемерие на квадрат.
Не можеш, додава лефков, да ја плукаш Европа да кажуваш приказни за имеријалистички сили, а да живееш од европски пари.
„Не можеш да проповедаш морал, а да бидеш шеф на троловско подземје што фабрикува лаги за политички противници.
Разобличен си лажго кој нарачува најдолни клевети ама нема лутење, толку ти е силна желбата да ме наклеветиш што изгледаш очајно, порано беше по креативен, те расипаа квадратите деловен простор и кешот другар“, пишува Лефков.