„Новата влада ќе го поправи нарушениот углед на Македонија како една од земјите со најниски плати во регионот и во Европа“, порачаа денес од СДСМ, по секојдневните повикувања од ВМРО-ДПМНЕ да ги остварат ваквите предизборните ветувања место да дефокусираат со други теми.

„Доколку ВМРО-ДПМНЕ сакаше, имаше 11 години да работи на зголемување на платите и на животниот стандард на граѓаните. Но, спротивно на тоа, ВМРО-ДПМНЕ направи Македонија да биде една од земјите со најниска минимална и просечна плата во регионот и Европа.

Новата реформска Влада ќе работи во интерес на граѓаните и ќе ги поправи економските штети што ВМРО-ДПМНЕ и Никола Груевски им ги направија на граѓаните и државата.Минималната плата ќе се зголеми на 12.000 денари до крајот на оваа буџетска година и таа ќе важи еднакво за сите работници, вклучително и за работниците од индустријата за кожа, облека и текстил. Фирмите од оваа индустрија ќе бидат финансиски поддржани од државата што ќе ја гарантира сигурноста на работните места. Со одговорни економски политики новата Влада предводена од СДСМ ќе го поправи нарушениот економски углед на Македонија како една од земјите со најниски плати во регионот и Европа“, стои во реакцијата на СДСМ, со додавка дека , ако ВМРО ДПМНЕ навистина мисли на граѓаните, а не на криминалните интереси на Груевски ќе ги подржи економските владини политики за зголемување на платите и отворање на нови работни места.