Од просторот кај хотел „Бристол“ што порано беше парк, но таму се изгради голема зграда, од СДСМ порачаа дека ова никогаш повеќе нема да се случува со зелените површини ниту во Скопје, ниту во другите делови на Македонија.

„Нема да има повеќе згради во паркови и зелени површини! Веќе имаме подготвено закон за заштита на зеленилото и за зголемување на процентот на зеленилото во градовите. Веднаш по формирањето на новото парламентарно мнозинство ќе го пуштиме во собраниска процедура на усвојување. Површините планирани во Генерален урбанистички план и во Детален урбанистички план, со намена зеленило, спорт и рекреација нема да може да се пренаменуваат во што било друго“, рече Благој Бочварски, претседател на Комисијата за транспорт и врски на СДСМ.

Во градежните парцели наменети за станбени куќи и станбени згради ветуваат дека процентот на зеленило ќе го зголемат од 30 отсто, на минимум 40 отсто, а на сметка на тоа ќе биде намален процентот кој е предвиден за градење во парцела, од 70 отсто на максимум 60 отсто.

„Ова се дел од одредбите од законот со којшто ќе ги заштитиме зеленилата како клучен фактор за заштита на здравјето на граѓаните. Во Македонија досега се правеа урбанистички планови за бизнис интереси на криминалната власт на ВМРО ДПМНЕ, без да се води грижа за хуманото живеење. Исекоа многу паркови. Уништија многу зелени површини за непотребни градби, што немаат никаков придонес за развој на градовите. На тој начин е нарушена циркулацијата на воздухот. Тоа е и една од причините зошто Скопје е во првите три најзагадени градови во Европа, а на врвот по загадување на воздухот се и Тетово и Битола“, велат од СДСМ./крај/со/бб