Македонија
СДСМ: Нема место за горди работници во гордата Македонија на Мицкоски

ВМРО-ДПМНЕ од ден во ден потврдува дека ќе води политика која ќе значи минимални плати без раст и понижени работници кои ќе ја губат вербата во државата, велат од СДСМ.
Политиките кои ги најавува Мицкоски, според оваа партија, не само што нема да доведат до раст на платите, туку ќе предизвикаат зголемување на сиромаштијата, зголемување на социјалните разлики и следствено на тоа, огромно разочарување на работниците.
„ВМРО-ДПМНЕ и Мицкоски имаа шанса да ги прифатат амандманите на СДСМ и да покажат дека добрите политики на растот на платите треба да продолжат и дека знаат да го ценат трудот и се грижат за стандардот на луѓето.
Наспроти тоа, тие само покажаа дека ќе водат политики во интерес на мал круг на луѓе. Нивниот економски концепт е заснован на промовирање на евтината работна сила.
Граѓаните знаат дека и во најтешките економски услови, во услови на кризи и економска апокалипса, СДСМ се грижеше секој да живее достоинствено и парите ги насочуваше да им помогне на луѓето полесно да го поминуваат секојдневието.
Дојде власт која очигледно верува само во суров капитализам каде тие се возат со бизнис класи, а граѓаните врзуваат крај со крај.
Работниците брзо ќе дојдат по своето и ќе ја препознаат огромната измама наречена економска преродба во ново пакување која ја сервира ВМРО-ДПМНЕ“, истакнуваат од опозициската партија.
Од оваа политика, додаваат од СДСМ, единствено ќе се преродат функционерите на ВМРО-ДПМНЕ и грст луѓе околу нив, додека народот ќе пати.
СДСМ, истакнуваат, останува на страна на работниците и на политиките кои гарантираат повисоки плати, а не на политиките каде растот на платите е по желба и одлука на малкумина.
„Овој модел еднаш доживеа тешка катастрофа, а сега ВМРО-ДПМНЕ ни го сервира на уште побрутален начин. Ваква Македонија, нема да биде горда. Ќе биде понижена и осиромашена“, реагираат од опозициската партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Процесот на пристапување кон ЕУ мора да се темели на заслуги и реформи, со јасни критериуми, ова не е услуга што се дава произволно, туку е праведно признание

Премиерот и претседател на ВМРО-ДПМНЕ, Христијан Мицкоски, се обрати на конгресот на ЕПП.
„Мојата Влада останува длабоко посветена на конзервативните вредности: вредностите на семејството, одговорноста, економската слобода и почитувањето на владеењето на правото. Од овие принципи сме водени дома и го инспирираат нашиот ангажман со Европа. Замислуваме заедничка европска иднина, цврсто стоиме на овие трајни вредности.
Сепак, искреноста ме принудува отворено да се осврнам на предизвиците со кои се соочуваме. Европскиот проект ветува еднаквост, правичност и можности – но, понекогаш, ние доживуваме поинаква реалност. Нашиот народ, гордите македонски граѓани кои ги претставувам, од прва рака ја почувствуваа тежината на двојните стандарди. Стандарди кои ја поткопуваат довербата, го намалуваат ентузијазмот и ризикуваат да го ослабат самиот европски дух што го застапуваме“, рече Мицкоски.
„Мојата нација направи значителни жртви и реформи, цврсто посветена на нашиот европски пат. Сепак, постојано бевме сведоци на менување на целите и дополнителни услови, кои се применуваат селективно, прикривајќи ја транспарентноста и правичноста што ги ветува Европа. Овој пристап не ја зајакнува Европа – го слабее нашиот колективен кредибилитет и ги намалува нашите заеднички цели.
Од клучно значење е лидерите на ЕПП, и во институциите на ЕУ и во земјите-членки, да станат движечка сила зад проширувањето на Западен Балкан во Европската унија. Вашето лидерство и проактивен ангажман значително ќе го подобрат кредибилитетот и ефективноста на процесот на проширување.
Јасно да кажеме: интеграцијата на Западен Балкан во Европската унија не е само чин на добротворност – тоа е стратешки императив. Тоа обезбедува мир, стабилност и безбедност не само за нашиот регион, туку и за цела Европа. Процесот на пристапување мора да остане заснован на заслуги, воден од јасни критериуми и транспарентни проценки. Ова не е услуга што се дава произволно, туку е праведно признание за напорите и реформите.
Цврсто верувам дека нашата колективна иднина лежи во обединето европско семејство. Наша заедничка одговорност е да го поддржуваме интегритетот на овој процес, потврдувајќи ја нашата посветеност на правичност и еднаквост. Македонскиот народ заслужува да види дека неговата посветеност и жртви вистински се почитуваат и се признаваат.
Заедно, да ја обновиме нашата посветеност: Европа силна и обединета, изградена на вредности, доследност и меѓусебно почитување“, изјави премиерот Мицкоски.
Македонија
(Видео) Меџити: И покрај нашите понуди тие одлучија да бидат заедно со ДУИ и со Ахмети, Таравари има пофалби за владеењето на ДУИ, а избега од тоа владеење

Првиот заменик претседател на Владата и министер за животна средина и просторно планирање Изет Меџити на прес-конференција извести дека вечерва нема да се одлучува кој ќе биде претседател на коалицијата ВЛЕН.
„Денеска треба претседателството на ВЛЕН да се конституира, за другото, формирање на штаб, влегуваме во кампања за локални избори, анкети, штабови, избор на кандидати, листи ќе бидат предмет на новото претседателство на ВЛЕН“, кажа Меџити.
Во однос на тоа кога ќе биде изборот за претседател, Меџити одговори дека работат на тоа.
На прашањето дали ќе има предвремени парламентарни избори, министерот одговори дека не гледа потреба за тоа.
„Избори ќе има локални во октомври, може да се мериме, граѓаните ќе го кажат своето мислење и за нив и за нас. Не гледам потреба за предвремени избори, ни бројките го наложуваат тоа, ниту ситуациите, има стабилна Влада која што можеби има најголем број на пратеници во историјата на Македонија“, кажа Меџити.
Министерот на прес-конференцијата информираше дека ВЛЕН ќе има заеднички кандидати, заеднички листи, заедничка програма на претстојните локални избори.
„Немало пример во историјата на државата, но можеби и во регионот, каде што една коалиција функционира во владата, а на локални избори да оди со посебни листи. Тоа го нема ниту во македонскиот, ниту во албанскиот блок. Тоа е само да се приближат до Демократската унија за интеграција, да се вратат кај ДУИ, и покрај нашите понуди тие одлучија да бидат заедно со ДУИ и со Ахмети. Тоа се гледа од изјавите на Таравари којшто има пофалби за владеењето на ДУИ, а избега од тоа владеење.
Но, тоа е нивна работа. Тие треба да објаснат кај членството зошто требаше да се подели Алијанса за да избега од ДУИ. Немаше да има потреба, ќе имаше една Алијанса, а не сега дел од Алијанса да се врати таму. Ставот на ВЛЕН е дека ВЛЕН ќе има заеднички кандидати, заеднички листи, заедничка програма. ВЛЕН се отвора кон невладиниот сектор, кон најдобрите, најшколуваните, најпрофесионалните Албанци. Ќе имаме и независни кандидати коишто ќе имаат поддршка од ВЛЕН. Не мора да има партиски дрес за да биде кандидат за градоначалник поддржан од ВЛЕН. Се отвораме кон граѓаните, кон цивилниот сектор, кон професионалците и мислам дека на тој пат ќе опстоиме и ќе биде доволно за уште еднаш да ја потврдиме победата од парламентарните на локалните избори“, изјави Меџити.
Претходно Министерот за здравство и лидер на едното крило од Алијансата за Албанците, Арбен Таравари, кажа дека не отстапува од одлуката на локалните избори да одат со сопствени советнички листи иако на власт дојдоа како дел од коалицијата „Вреди“.
Македонија
Mеџити: Kичево дефитивно ќе добие колекторски систем и пречистителна станица

По предлог на Министерството за животна средина и просторно планирање, Владата на денешната седница ја усвои информацијата за реализација на проектот за подобрување на управувањето со отпадни води во Кичево.
На денешната прес-конфереција во Медиа-центарот на Владата, првиот заменик претседател на Владата и министер за животна средина и просторно планирање Изет Меџити рече дека проектот опфаќа изградба на колекторски систем и секундарна канализациона мрежа и поврзување на постојната пречистителна станица.
„Овој чекор го презедовме бидејќи граѓаните на Кичево го заслужуваат овој проект, а бидејќи уште на почетокот беа забележани проблеми со организацијата и капацитетот на изведувачот, бевме приморани да го раскинеме договорот со изведувачите кои и покрај бројните опомени и состаноци, не покажаа значителен напредок, и на 5.12.2024 година, беа поминати 21 од планираните за градба 24 месеци, а реализацијата беше само 17 отсто’, изјави Меџити.
Меџити информира дека во наредниот период преку повеќегодишна јавна набавка Министерството за животна средина и просторно планирање ќе обезбеди буџетски средства за овој проект, бидејќи предвидените ИПА средствата во рамки на Секторската оперативна програма за животна средина и климатски акции, програмски период 2014-2020 веќе нема да можат да се користат поради неисполнување на обврските од изведувачот.
Сo овие средства ќе се инвестира во над 20 локации, меѓу кои е и изградба на главен канализационен колектор Зајас – Кичево, кој ќе се простира од населеното место Зајас до влезот во град Кичево и проаѓа покрај Зајашка Река, а од постојни мрежи долж колекторот Зајас – Кичево постојат секундарни мрежи кои се комплетно изградени во местата Трапчин Дол, Горно и Долно Строгомиште. Овие секундарни мрежи ќе се поврзат на колекторот Зајас – Кичево.
Планирана е изградба на главен канализационен колектор Зајас – Кичево со должина околу 11 км. Истиот треба да ги прифати отпадните води од населбите Зајас, Грешница, Долно и Горно Строгомиште, Колибари, Длапкин Дол и Трапчин Дол. Отпадната вода од колекторот Зајас-Кичево оди кон станицата за третман и пречистување на отпадна вода.
Министерството за животна средина и просторно планирање за реализација на овој проект ќе инвестира преку повеќегодишна јавна набавка над милијарда денари (1.088.550.000) во текот на наредните четири години, 2025, 2026, 2027 и 2028 година.
Проектот опфаќа два договора – договор за градежни работи за рехабилитација и проширување на канализационата мрежа во општина Кичево и договор за надзор над градежните работи.