Македонија
(Видео) Седум булевари ќе бидат затворени поради посетата на папата, МВР повикува на трпение

Портпаролот на МВР, Тони Ангеловски, на денешната прес-конференција за сервисни и безбедносни информации по повод посетата на папата Франциско изјави дека полицијата е целосно подготвена и способна да организира големи настани, како посетата на папата, и дека утрешниот ден ќе помине во најдобар ред. Од МВР повикаа граѓаните да имаат трпение со оглед на тоа дека улиците во централното градско подрачје ќе бидат затворени за сообраќај, како и да се почитуваат наредбите на полициските службеници.
„Во појасот Голем ринг во текот на утрешниот ден од 6 до 19 часот ќе има забрана и ограничување на сообраќајот и тој ќе биде пренасочен на други улици. Рестриктивната зона каде што нема да биде дозволено движење со автомобили почнува од улицата 11 Октомври, од раскрсницата со улицата Кочо Рацин до раскрсницата со улицата Димитрие Чуповски, забрана за возила исто така ќе има и на улиците Даме Груев, Македонија, Васил Главинов, Св. Климент Охридски и Илко војвода. Булеварот Мајка Тереза кај Клиничкиот центар исто така ќе биде забранет за возила од 8.15 до 10.15 часот и во попладневните часови. Сообраќајот ќе се одвива по споредни улици“, информира Ангеловски.
Непречено движење на сообраќајот ќе има на улиците Кочо Рацин, 11 Октомври до Борис Трајковски, Св. Кирил и Методиј, булеварот Партизански одреди, улицата Самуилова и улицата Гоце Делчев.
„Доколку граѓаните што живеат во делот на Големиот ринг и сакаат да ги користат своите возила во текот на утрешниот ден, денеска ќе мора да ги извадат возилата од рестрикивната зона. Сите паркинзи ќе бидат бесплатни од денес од 16 часот до утре преку целиот ден. Апелираме сите граѓани да користат јавен превоз“, вели Ангеловски.
Од 7.30 до 9 часот ќе биде затворен за сообраќај во двете ленти и патот од „Меѓународниот аеродром Скопје“ до влезот на градот, а сообраќајот на автопатот Велес-Скопје ќе се одвива преку Миладиновци-Идризово.
„Сите што утре имаат лет од скопскиот аеродром, треба да тргнат порано бидејќи сообраќајот по алтернативите патишта ќе трае подолго, апелираме да се користи железничкиот превоз, кој ќе биде бесплатен“, вели Ангеловски.
Движењето во Малиот ринг ќе биде непречено, освен во рестриктивните зони, каде што ќе се влегува со билети. Во обезбедената зона ќе се влегува преку 8 влеза, односно преку Управен суд на улицата Орце Николов, хотелот „Мериот“ на улицата Максим Горки, кај кафе „Тренд“, улицата Димитрие Чуповски, улицата Даме Груев кај Министерство за финансии и портата „Македонија“.
Мостот на уметноста и Камениот мост ќе бидат затворени.
Следењето на литургијата не е дозволена од прозорец или балкон на зградите во центарот.
Целосна интерактивна мапа од посетата можете да ја видите на следната интернет врска – https://www.google.com/maps/d/viewer?mid=1s3pH9_P_eLfWft6MceurZzGeZmvvxmh6&ll=41.99551418332732%2C21.43057529777684&z=15
Целосните промени и правила на движење можете да ги видите на следната интернет врска – https://papa.mk/soobrakjaj/
Целосните промени за движење на автобусите во јавниот градски превоз можете да ги видите на следната интернет врска – http://jsp.com.mk/vest.aspx?vest=912
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски и Филипче утре ќе се сретнат во Владата

Премиерот Христијан Мицкоски и претседателот на СДСМ, Венко Филипче, утре ќе остварат средба во владината зграда.
Претходно денес, Мицкоски изјави дека е подготвен да го прими на средба лидерот на СДСМ, Венко Филипче, во кое било време.
„Стојам на располагање во секое време, ќе го прераспределам мојот распоред – ако треба на полноќ, или после полноќ за да го сослушам неговиот план и да видиме дали по тој план нешто може да се реши. Но ако планот опфаќа пристап каков што беше во минатото за време на ковидот, тогаш јас такви планови не можам да прифатам“, изјави Мицкоски одговарајќи на новинарски прашања.
Пред новинарите денес се обрати и Филипче, кој пак предложи нов концепт за политички и општествен дијалог. Тој очекува во фокусот на средбата да бидат бразованието, здравството, правосудството, заштитата на животната средина и партизацијата во институциите.
Македонија
Сиљановска-Давкова: Децата со аутизам се само поразлични, не се деца со маана

Претседателката Гордана Сиљановска-Давкова денеска прими родители од Здружението на граѓани за третман на лица со аутизам, АДХД и Аспергерог синдром „Во мојот свет“, по повод 2 април – светскиот ден за подигање на свеста за аутизмот.
На средбата, родителите истакнаа дека сè уште се сами во борбата за подобрување на животот на своите чеда. Отсуствува системско решавање на проблемите. Родителот, велат тие, нема никаква поддршка. Има многу малку лични асистенти кои им помагаат, тешкиот товар паѓа на нив и затоа дел од нив не работат. Истовремено, поради отсуство на емпатија, секојдневно се соочуваат со чудни погледи и стигматизација на нивните деца. Најболно и најстрашно за нив, истакнуваат, е кога ќе помислат кој ќе се грижи за детето по нивната смрт.
Слушајќи ги проблемите со кои се соочуваат родителите, претседателката потенцираше дека децата треба да ни се најважни, бидејќи, како што рече, „убедена сум дека секое дете може да дојде до израз ако му се даде шанса“.
Таа, во волонтерството препознава едно од можните решенија на проблемот. По примерот на САД и многу други држави, учениците, средношколци и студентите, како волонтери би добивале поени што ќе се земаат предвид при евалуацијата. „Да дадеш нешто, без да бараш ништо за возврат, тоа е едноставно љубов“, смета таа.
Уште еден голем проблем на којшто посочија родителите е отсуството на разбирање и прифаќање, за жал, не се разговара ниту во семејството. Децата уште од градинка треба да учат дека некои нивни врсници се поразлични од нив и да ги прифатат како такви. Само на тој начин ќе се развие инклузивната свесност, велат родителите.
Во оваа насока претседателката се заложи за креирање интегрално решение, коешто ќе вклучи измени не само во законите за основно и за средно образование, туку и во други закони каде посебен дел ќе им биде посветен на децата со попреченост. „На тие деца им е потребно да учествуваат во социјалниот живот, а не да бидат оставени на маргините на општеството“, заклучи таа. Час поскоро треба да се обезбеди простор за Центарот за аутизам во Тетово, со оглед на веќе пристигнатата бугарска донација.
Од здружението „Во мојот свет“ укажаа дека забрзано расте бројот на лица со аутизам, од 2000 година до сега, пораснал за 317%. Поради недостиг на национален регистар, според статистиката на ЕУ и на СЗО, се претпоставува дека во земјава има од 15 до 20 000 лица со аутистичен спектар на нарушување кои нестрпливо очекуваат разбирање и помош.
Македонија
Муцунски во работна посета на Брисел: Проширувањето мора да биде врвен политички приоритет со јасна и предвидлива траекторија

Министерот за надворешни работи и надворешна трговија, Тимчо Муцунски, од денеска до петок престојува во работна посета на Брисел, Кралството Белгија.
Во рамки на посетата, министерот Муцунски одржа одделни обраќања пред претставници на неколку бриселски тинк-тенкови, како и пред Центарот за европски политики (EPC), каде говореше за стратешката определба на државата – членството во Европската Унија.
Министерот изрази искрена благодарност до Европската Унија и земјите членки за покажаната солидарност и брзата реакција по трагичната несреќа во Кочани, оценувајќи ја како автентичен пример за европски вредности на дело.
Говорејќи за евроинтегративниот процес на државата, Муцунски ја нагласи целосната усогласеност на земјата со Заедничката надворешна и безбедносна политика на ЕУ, како и посветеноста на Владата на реформската агенда. Тој истакна дека државата е технички подготвена за отворање на првиот кластер од пристапните преговори и очекува јасен, предвидлив и кредибилен пат напред – без нови одлагања и блокади.
Министерот подвлече дека членството во ЕУ е стратешка определба на државата, а процесот на проширување не смее да се третира само како техничко прашање, туку како прашање поврзано со економски раст, стабилност и заеднички европски вредности.
Муцунски порача дека Европската Унија мора да го задржи проширувањето како врвен политички приоритет, со јасна и предвидлива траекторија, предупредувајќи дека евентуално одложување на процесот би имало сериозни последици за кредибилитетот на политиката на проширување во регионот на Западен Балкан.