Македонија
Се молиме да е жив и здрав и некој да му даде вода во овие пеколни денови: Семејството трага по велешанецот Никола Попов

„Шест дена никаква трага и глас. Ние во болка, во исчекување, во агонија“ велат во семејството на велешанецот Никола Попов на кого веќе речиси една седмица му се губи секаква трага.
Неговата сопруга Македонка во разговор за „Макфакс“ вели дека 66-годишниот маж последен пат бил виден во средата вечерта кога семејството, односно фамилијата, била заедно на роденден. Никола бил на роденденската прослава и некаден околу 22 часот станал и кажал дека ќе си оди дома. Од тогаш како што кажува Македонка на нејзиниот сопруг му се губи секаква трага.
„Бевме сите заедно на роденден. Тој некаден кај 22 часот брзо стана и рече дека ќе си оди. Телефонот си го стави во џеб и замина. Ние останавме уште малку а кога си дојдовме дома јас видов запалено светло, но празна куќа и се испаничив. Почнав да го барам, да викам, да вртам по телефони. Сите од фамилијата се активиравме, почнавме да го бараме. Дел од роднините тргнаа назад по патот да проверат уште еднаш, но се беше залудно“, раскажува сопругата на Никола Попов.
Појаснува дека веднаш ја информирале и полицијата и им доставиле слики како изгледа човекот. И вели дека полицијата активно си ја врши својата работа и исто како и фамилијата бараат по сите можни места за кои постојат сомнежи дека би можеле да го најдат 66-годишниот маж.
Македонка вели дека Никола со себе го имал неговиот мобилен телефон кој што сега е исклучен и нема сигнал.
Раскажува дека нејзиниот маж бил добар човек и доста познат во Велес, што се вели чаршиски човек и дека многу луѓе го знаеле а меѓу пријателите и жителите на Велес бил познат како Коле или „Бибата“.
Ова како што истакнува му е прв пат на Никола да излезе и да не се врати.
„Тој е чаршиски човек. Многу често знаеше да излезе од дома. Понекогаш и по два-три пати. Ќе излезе ќе купи нешто, ќе среди некоја работа и ќе се врати. Но вака никогаш не направил“, кажува потресената жена.
„Преоравме се и ридови и долови и Бабуна и се молиме на господ да го чува и пази. Се надевам дека некој го има прибрано во овие врели денови да му даде барем вода, оти без храна се може, ама без вода на вакви горештини не се може“, вели сопругата на исчезнатиот Никола Попов.
Семејството во статус на социјалните мрежи има оставено телефонски број на кој можат да се јават сите кои имаат некаква информација за исчезнатиот Никола.
Македонка додава дека досега во изминатите шест дена имаат добиено некои штури информации дека првично наводно некој го видел Никола Попов кај Т.Ц во Велес но вели дека се останало на тоа.
„Со верба во бог, недежта не ја губиме“, истакнува сопругата на исчезнатиот Никола Попов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.