Македонија
Се чека решение од Таравари за да се прецизира кој е виновен за случајот со починатото бебе, велат од Лекарската комора
 
																								
												
												
											По добиениот извештај од извршен надзор над стручната работа на Универзитетската клиника за детски болести – Скопје и ЈЗУ Универзитетската клиника за респираторни заболувања кај децата „Козле“ – Скопје, подготвен од страна на комисијата за стручен надзор на министерот за здравство, а во врска со лекувањето и третманот на починатото дете Р. С., Комисијата за етички и правни прашања при Лекарската комора вчера одржа седница и заклучи дека најголем дел од пропустите нотирани во извештајот е системски пропуст во овие здравствени установи, информираат од Лекарската комора.
„Лекарската комора, на 16.10.2024 година, во попладневните часови од Министерството за здравство го доби извештајот од извршен надзор над стручната работа на Универзитетската клиника за детски болести – Скопје и ЈЗУ Универзитетската клиника за респираторни заболувања кај децата „Козле“ – Скопје“, подготвен од страна на комисијата за стручен надзор формирана од министерот за здравство, а во врска со лекувањето и третманот на починатото дете Р. С.“.
Комисијата за етички и правни прашања при Лекарската комора, утредента, на 17.10.2024 г., одржа седница на која го разгледа овој извештај и во однос на наодите Комората го дава следното мислење:
Комисијата за етички и правни прашања нема законски ингеренции да ја преиспитува работата на комисијата за стручен надзор формирана од страна на Министерството за здравство, ниту самоиницијативно да утврдува мерки, особено затоа што не располага со медицинската документација врз основа на која извештајот е изготвен.
Најголем дел од пропустите нотирани во извештајот е системски пропуст во овие здравствени установи за кои Комората нема директна надлежност, но изразува голема загриженост затоа што сериозно го засегаат работењето на здравствените установи и квалитетот на здравствените услуги. Веруваме дека здравствените установи како надлежни за овој сегмент од извештајот, во соработка со министерот за здравство, во зададените рокови ќе ги отстранат пропустите.
Во однос на стручните пропусти во третманот нотирани во извештајот, Лекарската комора може да постапува само во рамките на законски утврдена постапка во согласност со Законот за здравствената заштита, односно само врз основ на решение изготвено од страна на министерот за здравство. Во конкретниот случај вакво решение досега не е доставено до Комората, а таа и нема законска можност самоиницијативно да пристапи кон утврдување индивидуална одговорност и да предлага мерки само врз основа на доставениот извештај.
Лекарската комора ќе постапи веднаш, во согласност со своите надлежности и ингеренции, штом добие решение од министерот за здравство, со кое точно ќе се прецизира индивидуалната одговорност и ќе се предложат конкретни мерки во согласност со законските прописи. Целосно ја разбираме потребата на јавноста за побрзо лоцирање и утврдување одговорност, но постапувањето надвор од законските прописи и ингеренции носи ризик одлуките да бидат обжалени и прогласени за ништовни“, се истакнува во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
Без струја денеска делови од Чаир, Бутел и Шуто Оризари
 
														Од ЕВН Македонија АД известуваат дека денеска без електрична енергија ќе останат:
· во периодот од 08.00 до 11.00 часот корисниците од дел од улицата Бајрам Шабани и дел од улицата Чаирска, општина Чаир;
· во периодот од 09.00 до 10.00 часот корисниците од објектите околу Фитофарм-Визбегово, општина Бутел;
· во периодот од 09.00 до 12.00 часот корисниците позади бензинската ОКТА во Шуто Оризари, општина Шуто Оризари.
Македонија
Делови од Карпош и Шуто Оризари денеска без вода
 
														Од ЈП Водовод и Канализација известуваат дека денеска поради уличен дефект на улицата Демирхисарска бр 13 прекинато водоснабдување ќе имаат корисниците од улицата Демирхисарска, од 17:30 часот до завршување на дефектот, општина Шуто Оризари.
Од ЈП Водовод и Канализација исто така известуваат дека денеска поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхломска, општина Карпош.
Водоснабдувањето ќе биде прекинато од 09:00 часот до завршување со работните активности.
Македонија
Утрото постудено и магливо, преку денот сончево со мала до умерена облачност
 
														Утрото постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Времето во наредните денови
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла.


 
									 
																	 
									 
																	 
									 
																	 
									 
																	 
									 
																	 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											