Гордана Силјановска и официјално е избрана за претседателски кандидат на ВМРО-ДПМНЕ од страна на делегатите на партијата на денешната конвенција во Струга.

Со 408 од 519 гласа, Силјановска доби огромна поддршка како претендент за претседател и победата во гласањето со кое се одлучуваше меѓу деветмина кандидати ја однесе уште во првиот круг.

„Чест ми е што дојде време жена да биде кандидат за претседател бидејќи Македонија е во женски род, исто како и Европа. Во оваа прилика сакам да упатам порака дека ЕУ сега треба да ни подаде рака на нас бидејќи како таква ЕУ е недосвирена симфонија и не може без Балканот. А таму и на Македонија и е местото“, порача Силјановска која ја совладаа емоциите.

„Владата треба да има тим. Не ми се допаѓа оваа синтагма ‘Едно општество за сите’, проблематична e, ние имаме две општества, две влади, тоа не може така да функционира. Ќе го споменам и Уставниот суд кој не се одважи да донесе мрека за укинување на еден закон. За ова што го говорев велат дека сум била во групата на средни националисти, но ќе ви откријам нешто – не сум националист. Родена сум во турска куќа, а мојот брат има побратимство со албанско семејство, па можам ли да бидам националист“, порача таа додека во салата се слушаше гласно скандирање „ВМРО-ДПМНЕ“.

Силјановска го цитираше Кенди, кој како што кажа, рекол дека многу добил од САД, а таа рече дека од Македонија како родна земја добила многу и сега е нејзин ред да врати.

За Претседател на Република Македонија ќе се гласа на 21 април, а вториот круг ќе биде на 5 мај.