Македонија
(Видео) Симовски: Нема попис во април, ќе се пролонгира

Април е непогоден термин за пописот и треба да се пролонгира, вели Апостол Симовски, директор на Државниот завод за статистика, откако доцна синоќа беше постигнат договор за предвремени парламентарни избори на 12 април. Во статистика велат дека се затекнати од решението за избори во април и најавуваат дека новиот датум за попис треба да го одредат Парламентот и Владата, што поскоро.
„Оваа гломазна, тешка операција и организација е невозможно да се спроведе пред изборите. Кога ќе биде новиот термин за пописот, е одлука што не ја носиме ние туку Парламентот, а претходно и Владата со оглед на тоа што предлагач на законот за попис е Министерството за правда“, рече директорот Симовски и нагласи дека тие можат само да посочат дека март или октомври се најповолни за попис оти подвижноста на луѓето е помала.
Тој објасни дека законот за попис сè уште не е донесен па предложениот датум од 1 до 21 април 2021 година не е дефинитивен. Го одбрале овој датум бидејќи бил меѓу два изборни циклуси, а одобрување за датумот добиле и од „Еуростат“.
Усвојувањето на законот за попис Симовски вели дека се развлекува со месеци и покрај тоа што прифатиле голем дел од барањата на опозицијата.
„Опозицијата имаше 23 барања, од кои најголемиот дел не се прифатени, но оние што беа издржани ги прифативме. Не е прифатено барањето државна пописна комисија да го спроведе пописот место Државниот завод за статистика, барањето методологијата да ја носи друг, надвор од Заводот и слични барања кои немаат допирни точки со стандарди“, рече Симовски.
За можно пролонгирање на пописот за 2021 година Симовски рече дека и самите би ја избрале за пописна година 2021, но доколку бил успешен пописот од 2011 година. Бидејќи не успеал тој попис во настојувањата што поскоро да се направи пребројувањето, а да не се поклопи со избори, бил избран април 2020 година, терминот кој сега треба да се пролонгира.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ги изгоревте децата со вашата алчност и негрижа“, родителите на жртвите од Кочани бараат оставки и одговорност

„Пожарот ги зеде телата, системот ги уби душите“, „Каде да фатиме врски за да ги вратиме другарите“, „Селективна одговорност е неодговорност“, „Не умираме од несреќи, умираме од корупција!“ „Ги изгоревте децата со вашата алчност и негрижа“, ова се дел од транспарентите што ги носеа учесниците на маршот на семејствата на жртвите во пожарот во дискотеката „Пулс“ во Кочани, што се одржува во Скопје.
Пред Јавното обвинителство тие побараа оставка од повеќе поранешни и актуелни функционери, обвинители, директори, градоначалници…
„Дали Зоран Заев е затворен, дали Крсто Муковски е затворен. Учесниците од 24 април 2017 може да ги прогласат за терористи со илјадници години затвор, а дали направиле некаква ревизија во дискотеката. Тие се соучесници затоа што го криеле криминалот. Вие сте узурпатори, не сте вие државата, ние сме државата. Ве плаќаме илјадници евра да правите криминали“, рече Владимир Апостолов, таткото на едно од загинатите деца.
Тој потоа читаше имиња и презимиња на актуелни и поранешни министри во МВР, во Министерството за економија, директори во Државниот пазарен инспекторат, директори во Дирекцијата за заштита и спасување, кои, според него, требало да бидат уапсени, а не се.
„Не знаат кој да апсат, имам список кои се највиновни – од Јавното обвинителство – господинот Коцевски, кој ќе го апси него, кој ќе го апси Љубомир Јовевски, дали се уапсени – не се уапсени. Панче Тошковски, кај се началниците што ги постави Тошковски. Дали се во затвор тие началници – не. Пред него Оливер Спасовски дали е приведен, не е, Наќе Чулев, Нухиу, Чавков, Јанкулоска – дали се уапсени – не. И министрите за економија, и директорите од Државниот пазарен инспекторат, и од Дирекцијата за заштита спасување. И градоначалниците на Кочани – не знаеле за тоа што се случува? Барем една проверка да направеа, еднаш да санкционираат“, рече Апостоловски.
„Повикуваме сите да излезете од Собранието, пуштени се некои ботови од родителите да го контаминираат овој наш марш. Не плашете се, не сме вооружени, дојдовме со срце затоа што ни убивте сè, ама не нè убивте и нас. Партијата не ве плаќа, ние ве плаќаме, напуштете ја оваа институција, еден по еден да си одите дома кај вашите деца – не плашете се, не сме терористи, само одете си. Тешко ќе се докажело кој е крив, ако е тешко, ако не ве бидува, марш, гитла“, рече Апостоловски пред зградата на Јавното обвинителство.
Тој праша што повеќе може да ни земат од ова. „И нашите души ни ги зедоа со душите на децата“, рече Апостоловски.
Маршот продолжува кон Собранието.
Македонија
Исени на средба со бугарскиот амбасадор

Заменик-министерот за внатрешни работи Астрит Исени оствари работна средба со амбасадорот на Република Бугарија во земјата, Жељаско Радуков.
На средбата беа потврдени заложбите за одржување и унапредување на односите меѓу двете соседни земји, а особено беше потврдена одличната соработка меѓу министерствата за внатрешни работи, и исто така заеднички беше констатирано дека работат врвни професионалци.
Со посебен фокус се разговараше и за можностите за дополнително унапредување на веќе воспоставената плодна соработка како од аспект на билатералните договори така и оперативната меѓусебна соработка на Министерствата за внатрешни работи на двете земји. Притоа и заменик-министерот за внатрешни работи Исени и амбасадорот Радуков изразија безрезервна отвореност за нејзино натамошно продлабочување.
Воедно, на состанокот стана збор и за меѓусебната соработка во рамките на меѓународните организации и регионалните иницијативи, кои се од заеднички интерес и придонесуваат за одржување и зајакнување на регионалната безбедност, стабилност и просперитет.
Македонија
СДСМ: Обвинителството да го истражи скандалот со Стефковски и да утврди одговорност за сите

Скандалот со братот на градоначалникот Бобан Стефковски кој дивееше по скопските улици, а потоа беше ослободен од страна на МВР го потврди она што сите многу добро го знаат: за функционерите на ДПМНЕ и нивните роднини не важат законите, изјави портпаролката на СДСМ, Богданка Кузеска.
„Министерот Панче Тошковски беше принуден јавно да го признае скандалот но само откако СДСМ го обелодени случајот.
Граѓаните не се наивни и многу добро знаат да не реагиравме ние, ова скандалозно самоволие ќе останеше скриено од очите на јавноста, а прекршителите недопирливи. Само затоа што се роднини на функционери од ДПМНЕ.
Но скандалот отвора и нови апсекти. Дали лично градоначалникот Стефковски се јавувал на посоченит началник во МВР за да врши притисок и да обезбеди ослободување на неговиот брат?
Дали ќе има кривична одговорност за тоа што казната му е напишана на друго лице?
Граѓаните заслужуваат чесно, одговорно и транспарентно раководење, а не злоупотреба на службени позиции за заштита на привилегирани функционери, нивните роднини и пријатели.
Овој настан ја покажува целосната нефункционалност на правниот систем под водство на ВМРО-ДПМНЕ и ја разоткрива нивната двојна политика: едно правило за обичните граѓани, друго за привилегираните блиски до нив.
Затоа прашуваме гласно и јасно:
Кој ќе ја преземе политичката одговорност за овој тежок скандал?
Дали Стефковски има доблест да поднесе оставка?
Дали министерот Тошковски ќе си замине од функцијата поради очигледната злоупотреба на полицијата во заштита на блиските функционери од ДПМНЕ?
Ги повикуваме сите надлежни институции, вклучително и Јавното обвинителство, веднаш да отворат истрага за постапките на полицијата и за евентуалната вмешаност на Стефковски.
СДСМ останува на страната на граѓаните и ќе продолжи бескомпромисно да се бори против сите злоупотреби, без разлика од каде доаѓаат.
Граѓаните сакаат правда, граѓаните сакаат институции што работат за нив, а не за заштита на блиските до врвот на ВМРО-ДПМНЕ!“, изјави Кузеска.