Македонија
Сите пријатели на Куманово ќе имаат свое спомен-обележје, не само КБР, вели градоначалникот Димитриевски

Не само американската компанија „Келог, Браун и Рут“ туку и сите пријатели на градот ќе имаат своја табла со спомен-обележје во новиот парк во Куманово, вели градоначалникот на Куманово, Максим Димитриевски, за „Макфакс“. Тој додава дека ќе предложи паркот да го носи името парк на пријателството, а во него ќе има фонтана и спомен-плочи на благодарност на сите правни и физички лица што направиле значајни работи за граѓаните и градот.
– Правиме нов парк во Куманово, јас ќе предложам да се вика парк на пријателството и во него ќе има постамент со табли на сите пријатели на Куманово. Една од таблите ќе предложам да биде на КБР, тоа е компанија што последниве 15 години е најголем работодавец во Куманово. Потоа, ќе има табла и за УНДП и за сите пријатели на градот, вели Димитриевски.
Од Општината дообјаснуваат дека заедно со Советот ќе направиат листа на пријатели за кои ќе бидат изготвени и соодветни одлуки и благодарници.
Предлогот, како што кажа Димитриевски, ќе го достави на една од наредните седници на Советот на Општината. На вчерашната седница тој најави дека ќе предложи да се подигне споменик на компанијата КБР во знак на благодарност за придонесот што го дала преку ангажирањето кумановци за работа во Авганистан и Ирак бидејќи, како што образложи, компанијата инкасирала повеќе од една милијарда евра во Општината.
На предлогот негодуваат советниците од ВМРО-ДПМНЕ и велат дека ќе гласаат „против“ кога ќе дојде на дневен ред бидејќи, според нив, имало многу позначајни личности за градот кои заслужуваат да имаат спомен-обележје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.