Македонија
СМС-пораки во „Титаник“: Црквите од дијаспората му помагале на ВМРО-ДПМНЕ за изборите во 2011

Од СМС-пораките што денеска се репродуцираат во судот на рочиштето за предметот „Титаник“, кој се однесува на изборни нерегуларности, може да се забележи како високи функционери од ВМРО-ДПМНЕ ги ставаат во служба на партијата црквите на МПЦ од дијаспората и амбасадите за изборите од 2011 година.
„Ова го тераме. Бројката за пријавени за гласање во дијаспората е катастрофа. Времето е кратко, сè што треба да направиме е да ги земеме адресите од иселениците од амбасадата или црквата“, стои во СМС-кореспонденција направена на 27 април 2011 во 18.55 часот меѓу поранешниот министер Миле Јанакиески и Мартин Протоѓер.
„Веќе го организирам ова, вклучив повеќе луѓе, барам паралелни списоци од МНР, МВР и од црквите“, стои во продолжение на разговорот.
Според СМС-пораките што ги презентира специјалното јавно обвинителство, за гласачите од дијаспората лично се погрижил и тогашниот министер за надворешни работи, Антонио Милошоски, кој од Њу Џерси, САД, директно го известува Јанакиески за преземените мерки.
„Бев со иселениците во ‘Св. Кирил и Методиј’ во Њу Џерси, поделивме околу 800 барања за гласачи. Конзулатот ќе работи и викендов, се очекува да има повеќе пријави“, му пишува Милошоски на Јанакиески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поплавени куќи, магацини и индустриски објекти во Студеничани, Батинци, Пинтија и Горно Лисиче

РЦУК – Скопје, известува дека поради врнежите од дожд, во текот на доцните попладневни и вечерните часови, дојдено е до зголемување на нивото на Маркова Река поради што истата е излеана преку мостот кај н.м.Љубош и низводно, и дојдено е до поплавување на неколку куќи, магацини и индустриски објекти во селата Студеничани и Батинци, како и делови кон Пинтија.
Исто така пријавено е и поплавување на дел од булеварот Борис Трајковски кај населба Пинтија, каде исто така имало пријави за поплавени магацини. Според информациите од лицето за контакт од ЕЛС Студеничани, интервенираат службите на ЕЛС Студеничани со локалните фирми, а исто така на терен има и претставници од ЕЛС Кисела Вода.
Во текот на ноќта, на Единствениот број за итни повици 112 добиени се и пријави за поплавени куќи во Горно Лисиче (општина Аеродром), каде интервенира ЕЛС Аеродром.
Исто така, на поплавените места интервенираат и БППЗ на град Скопје и Јавните претпријатија на град Скопје и ЕЛС.
АМСМ известува дека непроодни се локалниот пат село Горно Лисиче према село Долно Лисиче (општина Аеродром) и првиот мост во село Батинци (општина Студеничани).
ЈСП Скопје, известува дека поради поплавите од Маркова река, автобусот со број 70 сообраќа до почетна/крајна станица Дризла и автобусот со број 33 преку населба Драчево во двете насоки.
Македонски железници известуваат дека железничкиот патнички и товарен сообраќај, од 22:50 часот е во прекин во правец на Лисиче и Драчево и обратно, додека патничкиот сообраќај се одвива преку станицата Трубарево.
Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.
Македонија
Аеродром, Сопиште и Зелениково денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска, без напојување со електрична енергија ќе останат:
· од 08:00 до 15:00 часот, корисниците од дел од с. Долно Лисиче, општина Аеродром;
· во истиот термин од 08:00 до 15:00 часот, корисниците од објектите во околината на зградата на Алкалоид на ул. 3 -та Македонска Бригада., општина Аеродром;
· од 09:00 до 12:00 часот, корисниците од дел од с. Горно Соње, поточно улиците со бр. 10 и бр. 12, општина Сопиште;
· од 09:00 до 16:00 часот, корисниците од селата: Дејковец и Добрино, општина Зелениково.