Европската комисија во извештајот за состојбата со владеење на правото во нашата земја констатира напредок во истрагите и поднесените обвиненија за кривични дела од областа на корупцијата, додавајќи дека долгите судски постапки и недоволните ресурси го отежнуваат гонењето на висока корупција, соопштија од Јавното обвинителство.

Во извештајот се нагласува упатството за давање приоритет на предметите од областа на корупцијата што го донесе Јавниот обвинител на Република Северна Македонија.

„Јавните обвинителства покажуваат зајакнат капацитет за истражување, подобра меѓуинституционална соработка, а четирите истражни центри сега се во функција”, се наведува во извештајот со кој се скенира состојбата во оваа област, по примерот на сличните извештаи што се изготвуваат за земјите-членки на ЕУ.

Освен тоа, извештајот забележува дека за обвинителството, особено за обвинителството за гонење на организиран криминал и корупција не се одобруваат доволно финансиски средства и вработувања, особено на финансиски експерти.

„Ограничените финансиски ресурси кои се доделуваат на правосудството, вклучително и на јавното обвинителство продолжуваат да влијаат на неговата финансиска независност“, констатира Европската комисија во извештајот. Во него се нотира дека Јавното обвинителство добива само 0,22%, наместо предвидените 0,4% од државниот буџет, а на судовите и на јавните обвинителства и натаму им е неопходно формално одобрување од Министерството за финансии за сите буџетски трошења што се одразува буџетска автономија.

Европската комисија во извештајот го истакнува недостатокот на човечки ресурси, како и предизвиците во однос на дигитализацијата, кои имаат ефект врз ефикасноста на правосудниот систем преку одолговлекување на судските постапки.

Ефектот на измените на Кривичниот законик продолжува значително да ги поткопува напорите за борба против корупцијата, се наведува во документот.

Мешањето и притисоците од останатите државни власти врз правосудството предизвикува сериозна загриженост по однос на независноста на правосудството, се констатира, при што особено се истакнува поведената постапка за разрешување на државниот јавен обвинител, која според Комисијата “ги разоткри недостатоците во постапката за разрешување и ризиците за нејзина политизација”.

Притоа Комисијата, коментирајќи ги основите по кои се предлагаше разрешување на државниот јавен обвинител, ја наведува формулацијата “несоодветно однесување со кое се нанесува штета на угледот на јавното обвинителство” како многу широка дефиниција за дисциплинска одговорност која создава правна несигурност и отвора можност за политизација на постапката за разрешување на државниот јавен обвинител.

Во целиот правосуден сектор се констатира дека се преземаат мерки за јакнење на транспарентноста, иако се уште има загриженост за постапките за избор на судии и јавни обвинители дека не се доволно транспарентни и аргументирани.

Првиот вицепремиер и министер за животна средина и просторно планирање, Изет Меџити, учествува на Конференцијата за обнова на Украина 2025 (Ukraine Recovery Conference 2025 – URC 2025), која се одржува во Рим, Италија.

Станува збор за четвртата по ред голема меѓународна конференција посветена на закрепнувањето и долгорочната обнова на Украина. Настанот е коорганизиран од владите на Италија и на Украина. Целта е мобилизација на владини, финансиски и приватни ресурси за поддршка за реконструкција на земјата погодена од војната.

Во Рим, вицепремиерот Меџити го повторил цврстиот став на Република Северна Македонија во поддршка на украинскиот територијален интегритет, како и подготвеноста да придонесе во процесот на обнова.

URC 2025 е продолжение на годишната серија високи политички форуми што од 2022 година обединуваат влади, меѓународни финансиски институции и стопански комори околу визијата за „брз, одржлив и европски пат на закрепнување на Украина“.

„Присуството на Северна Македонија на највисоко ниво уште еднаш покажува дека нашата држава останува доследен поддржувач на Украина и активен учесник во зацврстувањето на европската солидарност и партнерството со НАТО и ЕУ“, соопштија од Кабинетот на Меџити.

Координаторот на пратеничката група на СДСМ, Оливер Спасовски, на денешната прес-конференција најави дека СДСМ и коалицијата ќе ги повлечат сите преостанати амандмани на предложениот ребаланс на буџетот и ќе поднесат два нови – целосно насочени кон справување со последиците од трагичниот пожар во дискотеката „Пулс“ во Кочани и тековните пожари низ државата.

„Прво, еден комисиски амандман, ќе побараме Комисијата за финансирани буџет да го прифати, а кој што ќе се однесува за последиците од пожарот во дискотеката „Пулс“ во Кочани и за кој што ќе обезбедиме средства и за посебното законско решение за обесштетување на семејството на починатите, меѓутоа и за сите коишто се повредени од овој пожар. И вториот амандман кој што ќе го побараме, е да донесеме, односно да се прифати, амандман со кој што ќе одделиме финансиски средства, а за јакнење на капацитетите за справување со пожари“, рече Спасовски.

При тоа Спасовски посочи дека не може да има никакви оправдувања во однос на тоа дека има недостаток на пожарникари, недостаток на финансиски средства, недостаток на опрема.

„Ние сметаме дека државата, односно парламентот, ја има таа можност, меѓутоа ја има и обврска пред граѓаните преку определување на финансиските средства, пред сè да се обезбедат средства за вработување на пожарникари коишто токму за вакви моменти ќе се најдат на државата и на граѓаните. Второ, за зголемување на платите на пожарникарите во државата, заради тоа што не може и не смее државата да се сеќава на оваа категорија на работници, само во моменти кога имаме криза и кога тие се справуваат со таа криза“, рече Спасовски, додавајќи дека државата треба да помогне и во делот на финансиски средства за обесштетување, заради тоа што во пожарите има изгорени куќи, викенд куќи, фабрики.

„Еве ова се нашите две теми за коишто сметаме дека може да се постигне единство, може да се постигне консензус, и токму таа порака на соработка на единство и на консензус може да се покаже во овие моменти во кои што не треба да има различни погледи, не треба да има никакви поделби по ниту политичка, ниту било каква друга основа, туку напротив, да покажеме на граѓаните дека сме заедно, сплотени, единствени и таквата порака на соработка да ја покажеме токму во моменти кога најмногу е потребно за граѓаните на Македонија“, порача Спасовски.

Тој истакна дека ребаланост на Буџетот е нереален, и популистички и дека е буџет кој што предвидува повеќе средства отколку што за тоа има економска активност. СДСМ имаше над 160 амандмани во вредност од околу 11 милијарди денари.