Советничката група на ВМРО-ДПМНЕ и коалицијата во Град Скопје изгласа заклучоци, со кои се задолжуваат градоначалничката Данела Арсовска и Градот Скопје да извршат низа мерки за утврдување одговорност кај надлежните за скандалот со ѓубрето, како и превенција таквиот настан да не се повтори.

Заклучоците изгласани се следни:

1. Се задолжуваат градоначалникот на град Скопје и ЈП „Комунална хигиена“ – Скопје да ги преземат следните мерки:
– Редовно чистење и миење на сите сообраќајници во град Скопје,
– Дезинфекција и дезинсекција на сите места каде што се наоѓаат контејнерите и во блиската околина,
– Дезинфекција, дезинсекција и редовни одржувања на контејнерите,
– Итна набавка на 5 нови камиони и механизација за собирање отпад,
– Итна набавка на 5 нови модерни еколошки чистачи на улици и сообраќајници,
– Детаљна проверка на договорите за вработување на вработените за кои има сомнеж дека не се појавуваат на работа, а остваруваат право на плата, како и на оние со нерегулиран статус повеќе од 5 години,
– Одговорност за сите што директно или индиректно учествувале во креирањето на ваквите состојби во ЈП „Комунална хигиена“,
– Проверка на состојбите со договорите за вработување и во другите ЈП во соработка со надлежните државни институции,
– Ревизија на работата на членовите на УО и НО на ЈП „Комунална хигиена“ – Скопје во врска со членот 36 став 1 точка 6 од Законот за локалната самоуправа,
– Формирање работно тело за надзор над работата на јавните претпријатија во согласност со чл. 36. став 1 точки 9 и 11,
– Редовни и чести координации помеѓу градоначалникот на град Скопје, претседателот на Советот и координаторите на советничките групи,
– Соработка помеѓу сите ЈП на Град Скопје во надминување на состојбите во градот,
– Изработка на функционална анализа на сите установи и институции вклучувајќи ја и администрацијата на Град Скопје, да се изработи непристрасно, темелно и независно за да може да служи како основа за унапредување на јавните услуги,
– Во кризниот штаб да се вклучат и претставници од членовите на Советот на Град Скопје,
– Да се достави извештај за работата на ЈП „Комунална хигиена“ – Скопје во рок од 3 дена,
– Да се достави извештај за спроведувањето на програмата за јавната чистота,
– Да се реализира јавна дебата за разгледување на можностите за децентрализација на некои од надлежностите на ЈП „Комунална хигиена“ – Скопје.

Овој заклучок изгласан од советниците ќе биде доставен до градоначалничката Арсовска, која има обврска да го спроведе.

„Очекуваме Арсовска, наместо да бега од дебата и работа, да овозможи скопјани да може да ги имаат основните услуги за кои плаќаат даноци. Скопје не смее да се соочи со нова катастрофа како таа со ѓубрето на улиците и за таа цел се донесени овие заклучоци. Арсовска да постапи“, порачаа од ВМРО-ДПМНЕ.