Македонија
Сопругата на загинатиот полицаец по вандализмот: До ова немаше да дојде ако работеа камерите кај бистата на Горан
Семејството на загинатиот полицаец во кумановско Диво Насеље, Горан Стојменовиќ, и денес е вознемирено по вчерашното вандализирање на неговата биста и на иконите во паркот во скопско Инџиково, кој му е посветен нему. Неговата сопруга Ане Стојменовиќ за „Макфакс“ вели дека и порано имало оштетувања, но биле на клупите и на летниковецот, никогаш досега вандалите не посегнале по бистата.
„Уште се тресам, не можам да се смирам. Вандалите тоа го направиле среде бел ден, вчера, на празник. Јас отидов кај бистата околу 20 часот и сѐ беше исчкртанo. Соседите, кои живеат веднаш до паркот, велат дека утрото бистата била чиста. Веднаш пријавив во полиција. Дојдоа, направија увид, направија записник и си заминаа. Вакви оштетувања првпат прават. Досега ги кршеа клупите и опремата наоколу, но никогаш не ја оштетија бистата“, вели сопругата на загинатиот полицаец.

Во паркот и порано имало оштетувања, но вандалите првпат посегнале по бистата
Бистата на загинатиот полицаец Стојменовиќ вчера беше исчкртана со син спреј, а пречкртани се и иконите околу неа. Сопругата на Стојменовиќ вели дека не се сомнева во некој посебно.
„Тука доаѓаат и многу луѓе од страна, не само локалното население. Порано, додека работеа камерите во паркот, вакви работи не се случуваа. Се појавил некаков проблем и камерите беа исклучени, одамна не снимаат. До ова немаше да дојде ако работеа камерите. Јас сега ќе настојувам тие пак да проработат, ако не, спремна сум да платам и обезбедување за да не доживееме нешто слично оти за нас е многу болно“, низ солзи вели сопругата Стојменовиќ.

Градоначалникот на Гази Баба доцна синоќа преку „Фејсбук“ најави дека оштетувањата ќе бидат поправени
Таа сѐ уште жали и за златото на сопругот, кое им го украле крадци што пред извесно време им упаднале дома. Имало кражби и во други куќи во околината, но во нивната улица нивната куќа била единствената што ја обиле.
„Ни ги одзедоа спомените. Пријавив и тогаш во полиција, уште нема трага од крадците иако помина многу време“, вели Стојменовиќ.

Вандалите, вчера, преку ден со син спреј ги оштетиле споменикот и иконите во паркот во Инџиково
Доцна синоќа градоначалникот на општина Гази Баба, Бобан Стефковски, во објава на социјалната мрежа „Фејсбук“ најостро го осуди вандализмот и им порача на граѓаните да бидат спокојни, оти и споменикот и иконите ќе бидат обновени, ќе продолжи традицијата на оддавање почит на херојот Горан Стојменовиќ и чествувањето на Соборот на 12-те апостоли во Инџиково.
Споменикот на Стојменовиќ беше откриен пред четири години на свеченост со министерот за внатрешни работи, Оливер Спасовски.
Горан Стојменовиќ загина во антитерористичката акција во кумановско Диво Насеље во мај 2015 година, во која животот го загубија и Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски и Ненад Серафимовски.
Сите посмртно беа одликувани од претседателот на државата со медали за храброст.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

