Македонија
СОС Детско село кампања : Сети се кога беше дете!

СОС Детско село Ви ја претставува најновата кампања која е наменета за секое лице кој сака да се вклучи во иницијативата за споделување на пријатни спомени од своето деттство со цел подигнување на свесност за значењето на креирање на радосни спомени во раното детство кај секое лице.
СРЕЌНИ СЕЌАВАЊА ЗА СЕКОЕ ДЕТЕ
#СетиСЕ
Сети се кога беше дете!
Сети се на убавите моменти од твоето детство
Тешко е да се каже од каде е точно идејата и кој прв ја започнал, но со сигурност можеме да кажеме дека “предизвикот“ на социјалните медиуми привлекува внимание.
СОС Детско село реши да го искористи овој тренд на социјалните медиуми, да го иницира предизвикот #СетиСЕ и на еден интересен и забавен начин да покаже колку е важно секое дете да има убави сеќавања од своето детство.
„Искрено, колку време не си ги отворил старите албуми и кутии со слики? Аха, вистински слики, не слики во телефон. Епа, сега е вистински момент за тоа!“
„Отвори ги старите албуми и најди некоја слика која ќе ти предизвика убаво сеќавање од детството и најголема насмевка. Ќе има многу радости, смеење и емоции, ветуваме! Приклучи се на нашата кампања #СетиСЕ, номинирај твои пријатели и ајде заедно да создадеме убави спомени за секое дете!“
Во овој предизвик се вклучија бројни славни личности, меѓу кои и Каролина Гочева, Калиопи, Васил Зафирчев, Александар Тарабунов, Тамара, Јелена Јованова Периќ, Дарја Ризова, Катарина Ивановска, Лидија Кочовска, Амернис Нокшичи, Марјана Станојковска, Александар Михајловски, Ана Зафирова, Весна Петрушевска и уште многу други. Голема благодарност до сите кои се вклучија во кампањата #СетиСЕ. https://www.instagram.com/sosdetskoselo/
Ве предизвикуваме и Вас да се приклучите на кампањата #СетиСЕ! Сите информации и начинот како да го сторите тоа, на линкот кампања #СетиСЕ
СОС Детско село е хуманитарна организација која веќе 20 години работи во остварување на мисијата НИТУ ЕДНО ДЕТЕ НЕ ТРЕБА ДА РАСТЕ САМО.
Како организација која се грижи за добросостојбата на сите деца, млади и семејства на кои им е потребна поддршка, за овие 20 години обезбеден е топол дом и грижливо семејство за повеќе од 376 деца и млади без родителска грижа, додека на повеќе од 1200 деца е помогнато да не бидат разделени од своите биолошки семејства.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Докторот снимен додека „меша бело“ доби поддршка од колегите не Клиниката за неврологија

Колегите од Клиниката за неврологија преку писмо изразуваат поддршка на проф. д-р Игор Кузмановски како одговор на неодамна објавениот компромитирачки материал со кој, како што велат се дискредитира неговата личност и апелираат како што посочуваат, за воздржаност во јавниот дискурс, за почит кон човековото достоинство и за поддршка која е во согласност со вредностите на медицинската заедница и општеството во целина. Кузмановски беше снимен како меша бела прашката материја, за која вели дека е „бело“ што асоцира на дрога.
Писмото ви го пренесуваме во целост:
-Ние, неговите колеги, ја изразуваме нашата професионална и човечка поддршка за Проф. д-р Кузмановски, кој во текот на своето долгогодишно раководење со клиниката, од 2012 -2017, комплетно ја реновираше клиниката, воведе поеќе дијагностички методи и иновативни тераписки процедури. Во секојдневната работа со пациентите и во комуникацијата со колегите, секогаш се однесувал со највисока стручност, одговорност и етичка посветеност. Ниту во еден момент не е забележано однесување кое би било недолично, несовесно или спротивно на професионалните стандарди.
Дури и во ситуации кога се појавуваат сомнежи или јавни дискусии за постапки кои би можеле да се толкуваат како спротивни на моралните и етички принципи на докторската професија, неговото професионално функционирање останува непоколебливо, водено од интегритет и грижа за пациентите.
Во духот на медицинската етика и човековото достоинство, сметаме дека секој поединец, особено во моменти на јавна изложеност и лична ранливост, заслужува поддршка, разбирање и соодветна психосоцијална помош. Наместо осуда, неопходно е да се поттикне сочувство – не само кон професионалецот, туку и кон неговото семејство, кое невино се соочува со последиците од јавната реакција.
Со ова писмо апелираме за воздржаност во јавниот дискурс, за почит кон човековото достоинство и за поддршка која е во согласност со вредностите на медицинската заедница и општеството во целина, стои во писмото со поддршка за проф. д-р Кузмановски од колегите од Клиника за неврологија.
Македонија
141 болни и немоќни лица ќе гласаат на 18 октомври

Општинската изборна комисија во Битола претпладнево на седница утврди 141 болни и немоќни лица кои ќе гласаат на 18 октомври.
Претседателот на ОИК Битола Талевски истакна дека пријавувањето на лицата заврши синоќа, а ОИК Битола претпладнево ги потврди домашните адреси на сите болни и немоќни лица.
-Во законски определениот рок до ОИК Битола пристигнаа 151 апликација за гласање ден порано, односно на 18 октомври. Ние, членовите на ОИК Битола ги разгледавме сите барања и утврдивме дека право на глас во домашни услови имаат 141 болно и немоќно лице. За сите нив ќе ги обезбедиме законските услови за непречено гласање, изјави Талевски.
Од ОИК Битола информираа дека в сабота на 18 октомври ќе биде организирано гласање во старските домови и затворот во Битола.
-Новина оваа година е што освен во старски дом „Сју Рајдер“ ќе се гласа и во старски дом „Софија“. Во старскиот дом „Сју Рајдер“ право на глас имаат 60 стари лица, додека во старскиот дом „Софија“ ќе гласаат 37 лица. Според вообичаената пракса, в сабота на 18 октомври ќе се гласа и во битолскиот Затвор, посочи Талевски.
Како што е познато на овие локални избори во Битола конкурираат 8 кандидати за градоначалник и 16 листи со кандидати за членови на Советот на Општина Битола.
Македонија
Лабудовиќ: Денес не зборуваме за политика, туку за човечност

Во рамки на активностите по повод октомври – месец на свесност за ракот на дојка, кандидатот за градоначалник на Општина Центар од Движењето ЗНАМ – За наша Македонија, Мирослав Лабудовиќ, присуствуваше на настан во Градскиот парк, посветен на поддршка на жените кои ја водат својата најважна битка – битката за животот, стои во соопштението од ЗНАМ.
„Денес не зборуваме за политика, туку за човечност. Денес сум тука како син, сопруг, татко и пријател. Како човек кој верува дека здравјето е највисока вредност,“ изјави Лабудовиќ.
Тој ја истакна важноста на превенцијата и свесноста, најавувајќи конкретна мерка – доделување бесплатни ехо-прегледи на гради за жените во Општина Центар.
„Секој преглед може да значи спасен живот. Ова не е само гест – ова е порака: погрижете се за себе, животот е вреден,“ додаде тој.
Во своето обраќање, Лабудовиќ најави и нов концепт што ќе биде спроведен по неговата победа – „Центар – Здравствен хаб“, прв ваков модел во Македонија, наменет за граѓаните на Центар.
Овој хаб ќе биде модерен, достапен и пријателски простор за сите жители, со бесплатни услуги за проверка на здравствени параметри, совети од стручни лица, едукации за здрава исхрана, физичка активност, ментално здравје и родителство. Покрај тоа, ќе бидат поставени дигитални здравствени станици на неколку локации низ општината, каде граѓаните ќе можат самостојно да ги проверуваат притисокот, шеќерот, пулсот и другите вредности.
„Како иден градоначалник, мојата најголема обврска нема да биде само да градиме улици и паркови, туку да создадеме општина што се грижи за луѓето. Здрава заедница е темел на среќно општество,“ потенцираше Лабудовиќ.
Целта на проектот „Центар – Здравствен хаб“ е да ја врати грижата блиску до граѓаните, без чекање и бирократија, преку волонтерски ангажман на лекари, нутриционисти, психолози и физиотерапевти.
„Кога е здрава жената – здраво е семејството. Кога сите сме здрави – Центар живее и дише спокојно. Општината мора да биде партнер во здравјето на своите граѓани,“ заврши Лабудовиќ.