Во Куманово медицинска сестра, вработена на Клиниката за пулмологија, дошла на работа без симптоми, но вчера ѝ се појавила зголемена температура и е позитивна на коронавирусот.

Министерот Венко Филипче истакна дека во изминатите два дена медицинската сестра работела со заштитна опрема, но интервјуирани се нејзините колеги со кои имала контакт.

„И една медицинска сестра од Куманово, која е на работно место на Клиниката за пулмологија, минатата недела била во резервен тим, без никакви симптоми дошла на работа во понеделникот. Вчера, почувствувала зголемена телесна температура, земен е брис и е позитивна на вирусот. Во изминативе два дена на Клиниката била со целосна заштитна опрема и маска и ракавици. Направени се интервјуа со колегите, медицинските сестри и ќе се постапи во согласност со податоците“, нагласи тој.

Четворица вработени во штипската болница, пак, ќе бидат во самоизолација бидејќи биле во контакт со пациентка на возраст од 80 години, која е позитивна на коронавирусот.

„Има пациентка од Штип, која таму била примена првпат на 26 март, првиот брис ѝ е негативен и тогаш е пратена на консултација и е вратена назад од Скопје. Пациентката има 80 години, се лекувала на одделението за инфективни болести, меѓутоа има влошување на состојбата. На 30 март повторно е упатена на Инфективната клиника. Тестот е позитивен, а како претпазливост четири медицински лица ќе бидат во самоизолација, тие се асимптоматски. Направена е прераспределба на медицинските сестри, осум дополнителни ќе ротираат во штипската болница, на одделението за инфективни болести, за да се надомести персоналот што ќе биде во самоизолација“, посочи министерот Венко Филипче.